Read eten iBirani 13 Bible Online

iBirani 13 - eten bible

iBirani 13

¹Re ɛn ɛnu ɛyisɛ ne sim nyini tɛ nigwaa ndɔ ɛKiriti.

²Sɔng ˆɛ mbaray ɛn nyini tang say ninaa ne kpoo na ndɔ ne idee mon de nang, daa ɛli ne nɛ nidɛng ninyi na kaa phyii say ninaa ne kpoo na ne idee nibhɛ tang nibhɛ yɛɛ wu nibhɛ so nimalɛka.[93]

³Taate ɛn nɛ ninaa nɛ nibhɛ so ne ijwee ne nyang ngo te ˆɛ so ɛn ne inyang ngge nɛ nibhɛ. Ne ˆɛ ta taate ɛn nɛ ninaa nɛ nibhɛ sɔ nggbang ngga te ɛ sɔ ɛn nggbang ngga nɛ nibhɛ.

⁴Gbik mon no, nang ɛn ɛwɛrɛ gha ne ndiinday, te ɛrong-inwa ɛwɛrɛ gha ne shɛɛ ywɛywɛy, daa ɛli ne ɛTaanggbey ya sɛ hyɛ ninaa ne nzangas sa, nɛ ninyi na nɛ nibhɛ kɛ bees se wo ɛshara.

⁵Shɛɛ ɛn kyaam daa ne irway ne sim ijam be. Te ɛkɔn na ne ɛ bok ɛn no hɔn nyini. Daa ɛli ne ɛTaanggbey ya bo, “Sɔng naa tek kɛ nang, sɔng nzɛ ne hana yɛ nang.”

⁶iPhɛ ɛlɛy, njwɛɛn sɛ ne yɛɛ ne boote tɔrɔk i yɔngɔ; “ɛDaray ya ɛbhɛ ɛ so ɛhaa ne phyik me, sɔng naa ne phok ɛnik nang. iKyee ne ɛnyi gha yaa mɔn me nɛɛ?”

⁷Taate ɛn nɛ nindiinday mon na nɛ nibhɛ kɛ tɔng nyini ibol ɛTaanggbey de. Wɛɛ ɛn ishwɛɛ nibhɛ da, wɛɛ ɛn ɛli nɛ nibhɛ kaa taal. Roos ɛn ihywee ne ìnang ne itin nibhɛ de.

⁸Sɔng ɛYɛso ɛKiriti gha i sunuuy nang. ɛLi ne ɛ kɛ so ne ɛryɛ, ɛlɛy ne ɛ so izenge, ɛlɛy ne aa ne ku i shɛɛ ishay-ishay.

⁹Sɔng ˆɛ tek ɛn imɛmɛ ifas, ihywee-ihywee kpuru ihywɛɛ mon de nang. iPhɛ kɛ jam mɛ ˆɛ hante ɛn irway mon ne ihwet ne izɛɛng ɛTaanggbey, sɔng daa ne roos ikpii ne re ire nang. Sɔng ninyi na nɛ nibhɛ roos ikpii yɛdaa nggyɛ wo i sɛ iphyik nang.

¹⁰Njwɛɛn bok ɛraa ne hap itsanga ne sɔng kɛ nang nibo niYahodawa na nɛ nibhɛ mɔn ɛtomɛ gha ndɔ ne iPho ɛTaanggbey de ɛnkiinɛ ne re nikɔn ɛraa yɛ.

¹¹ɛGɔm nibo gha i bo neyi ne inyam ma ɛbhɛ lel lɛ ndɔ ɛLɔ gha kɛ Tul Kang i Shɛs so, te ɛ hap ne itsanga ɛlɔ ne ɛfɔt, i ji bo ibek kɛ bhɛ wɔɔ ne izay.[94]

¹²ɛLɛy ne ɛYɛso gha kaa ne ma bhɛ sɔ nggbang ngga ɛtsim ɛgarang nga, te ɛ te ninyi na iwɛwɛy nɛ neyi ɛbhɛ.

¹³iPhɛ ɛlɛy, nɛ njwɛɛn phɛ i bhɛ sɛ ɛbhɛ ɛtsim ɛgarang nga te njwɛɛn ma bhɛ sɔ ihywee ne itowos da ne ɛ kɛ sɔ wo.

¹⁴Daa ɛli ne sɔng njwɛɛn bok ɛgarang ne aa shɛɛ ishay-ishay ndɔ ɛzay yɛghaa wo nang, njwɛɛn kɛ yang sit irwisɛ i hyep ɛhaa ne ɛ yaaso wo.

¹⁵iPhɛ ɛlɛy nɛ njwɛɛn ku i dɛp ɛTaanggbey yegha lenɛ ne ɛYɛso gha, te iphɛ so te ihap itsanga njwɛɛn. iDɛp njwɛɛn da iphɛ so ihap itsanga de ne njwɛɛn i bol ne ɛnu, i bo wu ɛbhɛ ɛ so ɛDaray ya.

¹⁶Sɔng ne ˆɛ te ɛn bap ne mɔn iyɛnɛng ngge gbik ne ìtsɛm ne phyighis ɛn ninyi na nɛ nikɔn na ne ˆɛ bok ɛn no nang. Mɔn ɛlɛ wo daa ɛli ne ihywee ne hap itsanga yɛdee nggyɛ wo i nang ɛTaanggbey irway ihwala.

¹⁷Roos ɛn ibol nindiinday mon de, te ˆɛ mɔn ɛn ɛkɔn na nibhɛ bok nyini tɛ mɔn ɛn, daa ɛli nɛ nibhɛ bhɛ wɛɛ ishwɛɛ mon, nibhɛ sɛ ne bhɛ mɔng ɛTaanggbey ye ɛtomɛ gha nɛ nibhɛ kɛ mɔn. Wu ˆɛ kɛ roos ɛn ibol nibhɛ de, nibhɛ yaa ne mɔn ɛtomɛ gha ne irway ihwala, sɔng ne irway ishwii nang, daa ɛli ne sɔng ɛtomɛ ne irway ishwii gha yaa phyik nyini nang.

¹⁸Boote ɛn ne ɛTaanggbey daa ne ito mos. Njwi yɛɛ ncɛncɛng, sɔng irway mos da bok ɛkɔn ne tok nang, daa ɛli ne njwi sim te njwi sɛɛ ku i mɔn ɛkɔn na ne ɛ so cik.

¹⁹Nzi roro ne nyinɛn gbom, nzi sim te ˆɛ sɛɛ boote ɛn ne ɛTaanggbey ya ɛlɔ me wo, te phyɔngɔle i kyii ne mee ɛlɔ mon na.

²⁰ɛTaanggbey ne irway ne laal la kɛ yiisik ɛDaray njwɛɛn ɛYɛso yegha ne ikpuu. Ɛ mɔn ɛlɛ wo lenɛ nɛ neyi ne ìtsɛm ne inat ne kɛ rop. ɛYɛso yeghaa wo ɛbhɛ ɛ soye ɛGbaang ɛHaa ne Hyep ntsabhak ge.

²¹Nzi ne roro ne ɛTaanggbey ya te ɛ te nyini hyɔrɔ nɛ nikɔn niyɛnɛng gbik te ˆɛ mɔn ɛn ɛkɔn na ne ɛɛ sim. Nzi roro ne ɛTaanggbey te ɛ ku i mɔn ɛtomɛ ndɔ mon no lenɛ ne ɛYɛso ɛKiriti gha ne aa nang ɛbhɛ irway ihwala. Te ne nang ɛYɛso ɛKiriti yegha ne ndiinday idee ne ishay-ishay! Ɛɛy.

²²Nigwaa ɛn, nzi roro ne nyinɛn, nggɛ shii haal ɛwee yɛwoo wo ncɛt te n kpɛngke nyini, ne ˆɛ bo ɛn ɛbɔk, sɔng ivol lɛ kɛ ne kat nang.

²³Nzi sim naa yaak nyini wu kɛ tul ɛgwaa njwɛɛn ɛTimɔti yegha ne ijwee ne nyang ngo. Wu ɛ kɛ ne tuu dodooy, njwi sɛ ne yɛɛs ne ɛbhɛ njwi yaang nyini.

²⁴Kyili ɛn nindiinday mon na gbik ninaa ɛTaanggbey ya. Nigwaa mon na nɛ nibhɛ so ne iTaliya na i kyiisi nyini.

²⁵Te izɛɛng ɛTaanggbey de shɛɛ ne ninyi ɛn gbik.