Read eten iBirani 5 Bible Online

iBirani 5 - eten bible

iBirani 5

¹I kasa ɛgbaang ɛgɔm nibo gha ndɔ n ninyi te ɛ mɔn ɛTaanggbey ye ɛtomɛ ɛlɔ ɛbyin ninyi na. Ɛbhɛ ne ɛ so ɛhaa ne ɛ naas ɛTaanggbey ye nikɔn na nɛ ninyi na i yɛɛset nɛ wo, ɛ ta i hap itsanga ne han ɛfɔt.

²ɛGɔm nibo gha ma bok ivaa ɛbhɛ taasek, iphɛ ɛlɛy, aa ne yɛɛ ne boos ninyi na nɛ nibhɛ doo wo, nɛ ninaa nɛ nibhɛ labhas en no ihywɛɛ.

³iPhɛ phɛ kɛ te ɛ hap itsanga de ɛlɔ ne ɛfɔt ɛbhɛ gbik ne ɛfɔt ninyi wo.[18]

⁴Sɔng ɛnyi i nang ito ɛbhɛ ɛtomɛ yɛghaa nggyɛ wo daa ɛli ne ɛ sim nang. ɛTaanggbey ɛbhɛ yel-le ɛnyi yɛ te ɛli ne ɛ kaa yel-le ɛHaruna ye.[19]

⁵iPhɛ phɛ kɛ te sɔng ɛKiriti gha ɛbhɛ kaa kasa ito ɛbhɛ ɛ teye ɛGbaang ɛGɔm Nibo gha nang. ɛTaanggbey ya ɛbhɛ kaa yel-le ɛbhɛ ɛ yaak ɛbhɛ, “Ɛ so yɛ ɛNgɔn nge izenge wo nggɛ te me ɛKyɛɛ mo.”[20]

⁶Ɛ kaa ne ta boote ne ɛdɛ ɛlɔ yɛ ɛ yɔngɔ, “Ɛ soyɛ ɛbo ne inat ɛli ne ɛMakyisɛdɛk kaa so.”[21]

⁷Nten de ne ɛYɛso gha kaa ne so ndɔ ɛzay ya, ɛ kaa ne bol ne ɛTaanggbey ya ne ɛbhɛ ɛ so ɛhaa ne aa yɛɛ ne phɔt ɛbhɛ ɛlɔ ne iku de. Ɛ kaa ne bol, ɛɛ roro ne ishwin gbom nɛ niyilis. ɛTaanggbey ya kaa ne phok ɛbhɛ daa ɛli ne ɛ so ɛhaa ne nang ɛTaanggbey ye ne ndiinday, ɛɛ roos ɛbhɛ nɛ.[22]

⁸Gbik ɛli ne ɛYɛso gha kaa soye ɛNgɔn ɛTaanggbey ya, ɛ kaa ne mɛmɛ ne roos ne ibol ɛTaanggbey lenɛ ne nggbang ngga ne ɛ kaa sɔ wo.

⁹ɛLɛ wo ne ɛYɛso gha kaa ne taal nikɔn ne ɛ kɛ yɛɛs ne mɔn no, ɛ ji teye itin ne iphɔrɔt ne inat ɛlɔ ninaa ne roos ibol ɛTaanggbey de.

¹⁰Kɛ ne ta lenɛ ɛlɛ wo ɛTaanggbey ya ne yɛk ngɛ ɛ teye ɛGbaang ɛGɔm nibo ne ɛli ne ɛMakyisɛdɛk kaa so.

¹¹Njwi bok nikɔn na gbom ne njwii sim te njwi sɛ tɔng nyini daa ne ibol lɛdee wo, iphɛ ne bok njwii nggbang ne kpɛl nyini nɛ, daa ɛli ne ɛ sang wɔɔ ne seng ɛn ɛkɔn.

¹²ɛLyilyɛghaa wo ɛlɛ, se yɔng ɛ kɛ te ɛn nyini nikyɛɛ ne icwam, gbik ne iphɛ ɛlɛy, ne ɛ tɔɔ tɔk ɛn te ɛhak ɛnyi ɛbhɛ sɛ mɛmɛ nyini ne ilwing ne ibol ɛTaanggbey de. Ɛ tɔɔ tɔk ɛn mbalas tɛ ninɔn nishesheng sɔng ire gɛgɛy nang.

¹³Gbik ɛnyi gha ne mbalas da mpɛ soye ire ɛbhɛ de, ne ɛ soye ɛngɔn ɛshesheng, sɔng ɛ yɛɛ ɛkɔn daa ne imɛmɛ icik ga nang.[23]

¹⁴iRe gɛgɛy de so idee ninyi nɛ nibhɛ kɛ hɔn lenɛ ne igbaat nɛ nibhɛ kɛ ku gbaat en, nibhɛ yɛɛ ne hosop iyɛnɛng ne ibebhe.