Read eten iBirani 6 Bible Online

iBirani 6 - eten bible

iBirani 6

¹iPhɛ ɛlɛy, ne ɛ njwɛɛn re ɛnu ɛyisɛ te hɔn ndɔ ne imɛmɛ ne ibol ɛKiriti de, te njwɛɛn tek tɔk ɛli ne yaa kyii ta mɛmɛ njwɛɛn ne ilwing ne ibol ɛTaanggbey de. Sɔng njwɛɛn kyi ta yaa tɔk ɛli sɛɛ phok ibol ne ilwing ne ibol ɛTaanggbey de ne iphɛ tɔɔsel njwɛɛn ɛli ne yaa san ɛbɔk ka i tek nikɔn nikpɛɛ na, ne ìnang ne itin de ne ɛTaanggbey ya nang.

²Sɔng ɛ ta tɔɔ tɔk ɛn imɛmɛ ne ibatisima de, ne ivaa ne tek ɛnyi ne iwɔ daa ne ito i sit ɛbhɛ ne ɛwɛng, ne ivaa ne yiisitsik ne ikpuu da gbik ne ihyɛ ɛshara ɛtuk ne taal ɛzay ya nang.

³Wu ɛTaanggbey kɛ sim, njwɛɛn yaa ne re ɛnu ɛyisɛ ɛlɛ wo.

⁴Daa ne ito ninyi de nɛ nibhɛ kɛ kyii ne ɛtsim ma nibhɛ tek ìnang ne itin de, sɔng tang yɛɛ ne kyii nɛ nibhɛ nibhɛ san ɛbɔk ka nang. Daa ne ito ninaa nɛ nibhɛ kaa tsa nibhɛ so ndɔ ne ɛwɛwɛy ɛTaanggbey yo, nibhɛ phɔwɔ ɛnggɔnggɔɔt nikɔn niyɛnɛng ɛdaa ne irywa na, nibhɛ bok ihop ndɔ ne iKabyik ɛTaanggbey de.

⁵Ninaa nɛ nibhɛ kɛ ne ta phɔwɔ ɛnggɔnggɔɔt ne ibol ɛTaanggbey yo, gbik ne ihwet nten da ne ɛTaanggbey ya bok ne ihwet da,

⁶nibhɛ jung kyii nibhɛ tek ìnang ne itin nibhɛ de, sɔng ne tang yɛɛ ne kyii nɛ nibhɛ nibhɛ san ɛbɔk ka nang. iPhɛ so ɛlɛ wo daa ɛli nɛ nibhɛ kyii ta gangat ɛNgɔn ɛTaanggbey yegha dɔng, nibhɛ baasek ɛbhɛ ncwa wɛsɛrɛk.

⁷iVel da ne ifɛ sɔ inɛn da ne mpɛ reey yo ifɛ nang ɛhaa ne itson na ire iyɛnɛng ngge i ne say ɛwɛng ɛTaanggbey.

⁸iVel da ne ifɛ ne wuusi itsutsɔ ne mpun da zɔng ngo, sɔng ifɛ kɛ ne jam nang, ifɛ yaa ne yungaa sɛ ɛkawɛy ɛTaanggbey. ɛTsim mɛ gbik sɛ ne wɔɔ ifɛ.[24]

⁹Nigwaa nge ne nzi sim, ɛli ne njwii kyi bol ɛlɛ wo, njwi ne yɛɛ ncɛncɛng wu ɛ mɔn ɛn nikɔn niyɛnɛng nɛ nibhɛ kɛ tɔɔrek wu ɛ kɛ phɔrɔt ɛn.

¹⁰ɛTaanggbey ya ku so icik, sɔng aa te ne ɛtomɛ mon na bab nang. Sɔng aa ne te ne ishwim mon da ne ɛ kɛ tɔɔrek ɛn ɛbhɛ wo ndɔ iphyik ga ne ɛ kɛ phyik ɛn ninyi ɛbhɛ na, ɛ ma tɔɔ phyighis ɛn nibhɛ wo nang.

¹¹Njwi sim te ɛrɔngɔ sɛ tɔɔl ihywee ɛtomɛ yɛdee wo ɛ phyii bhɛ hɔn itaal lɛ te iphɛ ne te nyini ɛ sɛ ɛn nikɔn na ne ɛ kɛ sit ɛn irwisɛ da.

¹²Sɔng ɛ te ɛn nyini ninaa ne itek nang, yang mɛmɛ ɛn nɛ nɛ ninaa ne ìnang ne itin na, nɛ nibhɛ kɛ bo ɛbɔk ka nibhɛ i hyep nibhɛ yaa say ɛkɔn na ne ɛTaanggbey ya kɛ sim-mɛ wo.

¹³Nten de ne ɛTaanggbey ya kaa rop ibol de ne ɛBaraying nga, ɛ kaa ne lɛlɛm ihywa daa ne irywɛɛk ɛbhɛ, daa ɛli ne sɔng ɛnyi ta sonɛ ne ɛ phyin ɛTaanggbey yegha ne aa lɛlɛm ihywa de ne irywɛɛk ɛbhɛ wo nang.

¹⁴ɛTaanggbey ya kaa yɔngɔ, “Nggɛ ku rop naa sit tɛ ne ɛwɛng, naa ne ta yɛk ngɛ ihywee mo de ngisit gbom.”[25]

¹⁵ɛBaraying nga ne bo ɛbɔk ɛ hyep, ne ɛ say ɛkɔn na ne ɛTaanggbey ya kɛ ku sim-mɛ wo.

¹⁶I sɛ niten nisii na yaa lɛlɛm ihywa de, nibhɛ i ne yel-le irywɛɛk ɛnyi ne ɛ phyin nibhɛ ne igbom. iLɛlɛm ihywa yɛ i ne so te taal ibol i re ne ishamas.

¹⁷Daa ɛli ne ɛTaanggbey ya i sim aa tɔɔrek ninaa ne re isha ɛbhɛ na wu hang icwas ɛbhɛ da i sunuuy, ɛ kɛ ne lɛlɛm ihywa daa ne ibol de ne ɛ kɛ rop po.

¹⁸ɛTaanggbey ya kɛ nang nikɔn ifaa, ibol ne ɛ kɛ rop ne iLɛlɛm ihywa. Sɔng i ne yɛɛ ne hyere nikɔn nɛnaa nggyɛ wo nang, daa ɛli ne sɔng ɛTaanggbey ya i yɛɛ ne hyɛ irywɛɛk nang. iPhɛ ɛlɛy, njwɛɛn no ne kɛ tel bhɛ kyɛngɛy ɛlɔ ɛbhɛ gha, njwɛɛn yaa ne yɛɛ ne kyinak ne ihwet i hyep ibol ɛbhɛ de ne ɛ kɛ ku rop po ne njwɛɛn kɛ sit irwisɛ da.

¹⁹Sit ne irwisɛ njwɛɛn da ne so ngkangat te ɛgangat ne ɛ kɛ wum ivel gɛgɛy. iPhɛ ne te njwɛɛn sang to irway wɛlɛng ɛnik. iPhɛ ne bhɛ lel ndɔ ne ideng ngge, iphɛ phee ɛlɛbhɛlɛ gha, iphɛ bhɛ hɔn ɛlɔ ne shɛɛ ɛTaanggbey.[26]

²⁰ɛYɛso gha ɛbhɛ kɛ ne tsa ɛbhɛ lel ɛlɔ yɛghaa nggyɛ wo. Ɛ kɛ ne bhɛ lel ɛlɔ njwɛɛn, ne ɛ teye ɛGbaang ɛGɔm Nibo ɛTaanggbey, ɛhaa ne inat te ɛMakyisɛdɛk.[27]