Read eten iBirani 9 Bible Online

iBirani 9 - eten bible

iBirani 9

¹iBol de ne kaa tsa rop ne ìtsɛm ɛyisɛ de kaa bok ikpii ne re ntsong, gbik ne ipho ne re ntsong ngɛ ne kaa tul kang ndɔ ɛzay yɛghaa wo.

²Kaa ta ipho ne i hobhose iphɛ iduk iphaa, izuk ɛyisɛ yɛ kaa bok ɛntsɛng ne tes ifitila shak, ne ɛtɛbul, ne ibɛrɛdi ne kɛ tek ɛTaanggbey ye nɛ. Kaa ne i bok ɛlɔ yɛ ɛLɔ ne kɛ Tul Kang.[37]

³Kaa ne hobhose iduk ne ipho de ne ɛlɛbhɛlɛ, ne ji yaak ɛlɔ ne ifaa yɛ ne ɛ so ɛtsim ɛlɛbhɛlɛ gha ɛLɔ ne kɛ Tul Kang i Shɛs.

⁴Ndɔ ne izuk kɛwoo nggyɛ wo, ɛraa ne hap itsanga ne kɛ ryɔng ne izinariya kaa sonɛ, ɛKwaati ne Rop ìTsɛm ne sonɛ. Kaa ne yilɛm nikɔn ifaa yɛnaa wo ne izinariya. Ndɔ ne ɛKwaati yɛwoo nggyɛ wo, ɛkyee ne izinariya ne ɛ bok idɛ re de ne i bok iphɛ imana kaa ne sonɛ, ɛntsɛng ɛHaruna ne ɛbhɛ kaa yaa tuwusiy ne sonɛ, ikpɛɛ ibaghatak ne kɛ haa ne ibol ne ìtsɛm be ne sonɛ.[38]

⁵Nidɛng nikɔn na ne i bok nibhɛ iChɛrɔbim nɛ nibhɛ tɔɔsel ndiinday ɛTaanggbey kaa ne so daa ɛco ne ɛkwaati gha. Nibhɛ kaa bok ivaat ne ifɛ kɛ ne bɛrɛt ifɛ kyɛngɛ ɛlɔ gha ne i bok ɛbhɛ ɛlɔ ne han ɛfɔt ta. Sɔng nten nɛ kɛ ne ku shii hɔn ne yaa bol ivol nikɔn na gbik ɛlyilyɛghaa wo nang.[39]

⁶ɛLɛ wo ne kaa ryɔng nikɔn nɛnaa wo gbik, nibo ɛTaanggbey ya kaa ne jii leesel ndɔ ne izuk ɛyisɛ ne kɛ tul kang ngo nibhɛ mɔn ɛtomɛ nibhɛ gha cɛcɛɛy.[40]

⁷ɛGɔm nibo ɛTaanggbey ya zɔng ɛbhɛ ɛ lel ndɔ ne izuk ne ifaa wo ne kɛ Tul Kang i Shɛs so. ˆƐɛ ne lel ɛdaan ishay. Sɔng ɛɛ ne lel tang ɛ boos neyi nang. Neyi yɛnaa nggyɛ wo ne aa bhɛ nang ɛlɔ ne ɛfɔt ne ito ɛbhɛ gbik ne ɛwoo ninyi wo nɛ nibhɛ kɛ mɔn ndɔ ne iyɔm ne yɛɛ.

⁸Ndɔ nikɔn nɛnaa wo ne iKabyik ɛTaanggbey de ne imɛmɛ njwɛɛn nɛ wu ɛnkiinɛ ne lel ɛLɔ gha ne kɛ Tul Kang i Shɛs ririk ko ne kyi tɔ kyup, wu ipho ɛyisɛ yɛdee nggyɛ wo tɔ nɛ wo.

⁹iBol lɛdee wo i ne mɛmɛ njwɛɛn ne ɛkɔn ne izam mɛdee wo. iPhɛ tɔɔsel wu hang izɛɛng ngge, nɛ nikɔn na ne kaa i naas te hap ne itsanga de i yɛɛ ne nang ɛhaa ne re ntsong ngga irway ne laal hyɔrɔ.

¹⁰Nikɔn nɛnaa nggyɛ wo kaa so daa ne re ne sɔ gbik ne ikpii ne tes en wɛwɛy ihywee-ihywee. iKpii yɛdaa nggyɛ wo kaa ne so ivaa ne ibek zɔng te ji hyep nten de ne de sɛ yɛɛs ne ishwɛɛ ifas da.

¹¹ɛKiriti gha kɛ yɛɛs ɛ soye ɛGɔm Nibo ɛTaanggbey. Ɛ kɛ ne yɛɛs nɛ nikɔn niyɛnɛng nga nɛ nibhɛ so ɛbɛ wo ɛlyilyɛghaa wo. Kaa ne sɛ ɛ kɛ yɛɛs ɛlɛ wo, ne ɛbhɛ lel ndɔ ne ipho de ne iphɛ phyin ne igbom, iphɛ ta phyin ne iyɛnɛng. Sɔng ɛten ɛsii ɛbhɛ kɛ ryɔng iphɛ nang, sɔng iphɛ ne so idee ɛzay yɛdee nang.

¹²Sɔng ɛ kaa ne bhɛ lel lenɛ nɛ neyi ninɔn ne irwandɔng nɛ ninaa ne ᐩigyol nang. Ɛ kaa ku bhɛ lel ne ɛLɔ gha ne kɛ Tul Kang i Shɛs so ɛdaan zɔng, lenɛ nɛ neyi ɛbhɛ, ɛ sɛ njwɛɛn iphɔrɔt ne inat.

¹³Ndɔ ne iMɛmɛ ɛMuusaa da, ikpii yɛ i bo wu te phyimɛ ninyi na nɛ nibhɛ bok ivebhe ɛli ne ikpii da i bo wo, nɛ neyi ne ᐩigyol gbik nɛ ninaa ne irwandɔng gbik ne ntsong ɛngɔn ne irwandɔng ngɛ te i te wɛwɛy ɛli ne ikpii yɛ i bo wo.[41]

¹⁴Neyi ɛKiriti na ne phyin neyi nikɔn nɛnaa nggyɛ wo gbom. Kɛ lenɛ ne iKabyik ne inat tɛdee nggyɛ wo ɛKiriti gha ne ɛ sang ɛkɔn ne tok ka ne nang ɛTaanggbey yegha ito ɛbhɛ gbik. ˆƐ kɛ mɔn ɛlɛ wo te ɛ kuus icwas ne irway njwɛɛn, te njwɛɛn tek nikɔn na nɛ nibhɛ aa sang phyik njwɛɛn no, njwɛɛn yaa re ɛTaanggbey ne iken na ntsong.

¹⁵iPhɛ ɛlɛy, ɛKiriti gha ɛbhɛ ne so ɛhaa ɛceree ne ibol ne rop ìtsɛm ihywas de ne ihywɛ kɛ byinki ninyi na ne ɛTaanggbey ya, tɛ ninaa ne kɛ ku yel-le wo say isha ne inat de ne ɛTaanggbey kɛ ku sim-mɛ wo. iPhɛ kɛ te ɛlɛ wo daa ɛli ne ɛKiriti gha kɛ ku te ɛ phɔt ninyi na ndɔ ne ɛfɔt to nɛ nibhɛ kaa mɔn nten de ne ibol ne rop ìtsɛm itsɛl de kaa sonɛ wo.

¹⁶Wu ɛnyi gha kɛ haa ibol daa ninaa nɛ nibhɛ sɛ re isha ɛbhɛ de, iphɛ ne so nggbinggbing i seng ɛnyi yɛ kɛ ku nyɛɛn i kyi wɛɛ ibol ɛkɔn de ne ɛ kaa haa wo.

¹⁷Sɔng i mɔn ɛtomɛ ne ibol ne isha de ne ɛnyi gha kɛ haa wo ɛnyi yɛ tɔ ɛken nang, wu ɛnyi yɛ kɛ ku nyɛɛn ne ji kyi mɔn ɛtomɛ ne iphɛ.

¹⁸iPhɛ iphɛ kɛ te, sɔng ibol ne rop ne ìtsɛm ɛyisɛ de kaa bok ihwet nang, kaa ne kyi lok neyi nyɛɛn.

¹⁹Kaa sɛ ɛMuusaa gha kɛ tɔng ninyi na ikpii ne iMɛmɛ da gbik, ne ɛ ji bo neyi ninɔn ne irwandɔng nɛ ninaa ne ᐩigyol, ɛ byinki ne inɛn. Ɛ bo iwulu iseng, ne ibee ɛhon ne i bok ɛbhɛ ihyisɔp, ɛ phyimɛ ne ɛWee ne iHuhu wo ne kɛ haa ne iMɛmɛ da nɛ ndɔ yɛwo nɛ, gbik nɛ ninyi na.

²⁰Ɛ yaak nibhɛ, “Neyi yɛnaa bɛ ne ɛTaanggbey ya kɛ rop ne ìtsɛm be ne nyinɛn no, ɛ yɛk nyini nɛ wu te ɛ hyep ɛn no.”[42]

²¹ɛLɛy ne ɛMuusaa gha kaa ne ma ta phyimɛ iPho ɛTaanggbey de nɛ neyi na gbik nɛ nikɔn na ne i mɔn ne ɛtomɛ ndɔ ne re ntsong ngga.[43]

²²ɛTsak, iMɛmɛ ɛMuusaa da i bo wu nggbinggbing te phyimɛ nikɔn na gbik nɛ neyi i te nibhɛ wɛwɛy, wu hang yaa yɛɛ ne hana ne ɛfɔt tang kɛ lok neyi.[44]

²³iPhɛ kaa so nggbinggbing i te nikɔn nɛnaa wo, nɛ nibhɛ so izazurum nikɔn ɛdaa ne irywa de wɛwɛy ɛlɛ wo, daa ɛli nɛ nibhɛ kaa so izazurum nikɔn ɛdaa ne irywa na. iPhɛ kaa ne so nggbinggbing i te nikɔn ɛdaa ne irywa na nɛ nibhɛ ne ji sɔ ɛnting nikɔn nɛnaa wo wɛwɛy nɛ nikɔn ne hap itsanga nɛ nibhɛ phyin ninaa wo.

²⁴Sɔng ɛKiriti gha kaa lel ɛLɔ gha ne kɛ Tul Kang i Shɛs ne ɛten ɛsii ɛbhɛ kɛ ryɔng nang. ɛLɔ gha ne ɛten ɛsii gha kɛ ryɔng ngo soye izazurum ninaa ɛdaa ne irywa de. ɛKiriti gha kɛ ne bhɛ lel daa ne irywa wo, te ɛbhɛ tɔɔrek ito ɛbhɛ ɛnu ɛyisɛ ɛTaanggbey ya ɛlɔ njwɛɛn ɛlyilyɛghaa wo.

²⁵ɛGɔm Nibo niYahodawa na kaa ne i lel ɛLɔ gha ne kɛ Tul Kang i Shɛs so ɛdaan ishay nɛ neyi nɛ nibhɛ sang so ninaa ɛbhɛ. Sɔng ɛKiriti gha kaa ne ma yaa kyisi nɛ nang, ɛ kaa ku nang ito ɛbhɛ de ɛdaan zɔng.

²⁶Sɛɛ yɔng ɛlɛy yo, ɛYɛso gha saa ne i ku ɛ kyi ta mɔɔng ɛ ku ne ile ne tum ɛzay de. ɛYɛso gha kaa yang tɔɔrek ito ɛbhɛ ɛdaan zɔng nten de ne ɛtuk ɛshara gha yungaa shwaak ghe, te ɛ ba ɛfɔt to lenɛ ne ɛ kɛ nang ito ɛbhɛ de.

²⁷Kɛ ku ryɔng ngɛ, ɛnyi gha sɛ ku ɛdaan zɔng, ɛtsim mɛ ɛlɛy ɛ hyep ɛshara ɛTaanggbey.

²⁸ɛLɛy ne iphɛ ne ma so, kɛ ne nang ɛKiriti yegha ɛdaan zɔng te ɛ bo ɛfɔt ninyi gbom. Ɛ sɛ ne ta bhɛ kyii, ikyii ne ifaa yɛ, sɔng te ɛ ta ba ɛfɔt to nang, ɛ sɛ yang bhɛ kyii te ɛ phɔt ninaa nɛ nibhɛ hyep ɛbhɛ wo.[45]