Read eten ɛYakub 5 Bible Online

ɛYakub 5 - eten bible

ɛYakub 5

¹Phok ɛn, nyinɛn ninaa ne iryat ta, san ɛn, te ˆɛ banga ɛn ikun daa ɛmpyep pa ne ɛ yaaso daa ne ito mon de.

²iRyat mon de kɛ sa, nipharini kɛ ne ta re itsura mon da.

³iZinariya mon de ne ɛzurufa mon no kɛ sa. iSa yɛ phɛ sɛ ne nang ishɛɛda daa ne ito mon, iphɛ re ibek mon de te igboo. ˆƐ kɛ tumɛ ɛn itso mon iryat ndɔ nituk ɛtsim mɛnaa wo.[11]

⁴ˆƐ kɛ mbaray nyini tang tal ɛn ninyi na nɛ nibhɛ kɛ mɔn nyini ɛtomɛ ne ihap mon na, nibhɛ i ne san. iShwin ninaa nɛ nibhɛ kɛ pha nyini ire de kɛ ne bhɛ hɔn ɛlɔ ɛTaanggbey, ɛDaray ne iTo Gbik.[12]

⁵ˆƐ kɛ shɛɛ ɛn ndɔ ɛzay ya ndɔ ne phok ito mon iyɛnɛng, ˆɛ re ɛn ˆɛ sɔ ɛn ɛli ne ˆɛ kɛ sim ɛn. Ɛɛy, ˆɛ kɛ ne sal ɛn nyini ˆɛɛ hyep ɛn igbey ne hyɛ wo.

⁶ˆƐ kɛ hyɛ ɛn ninyi nɛ nibhɛ sang ɛfɔt ɛshara ˆɛ ta phobho ɛn nibhɛ, sɔng nibhɛ ne yaak nyini ɛkɔn nang.

⁷iPhɛ ɛlɛy nigwaa en, bo ɛn ɛbɔk te ˆɛ hyep ɛn nten ne yɛɛs ɛDaray de. Yaang ɛn ɛli ne ɛhaa ne ihwap pa i bo ɛbɔk ka ɛ hyep ire de ne iphɛ kɛ jam iphɛ shɛs so ne ihwap ba. Ɛ bo ɛbɔk ɛ hyep inɛn ne kang ne ihwap ne mbaa ɛlɔ ne iphɛl.

⁸Nyinɛn no ne mang, ne ˆɛ ma bo ɛn ɛbɔk. Kyinak ɛn nting, daa ɛli ne ɛDaray ya yek cɛcɛk.

⁹Nigwaa en, tek ɛn ivol mumuk ga ne ɛrɔngɔ i bol daa ɛrɔngɔ gha, daa ɛli ne sɛ yung hyɛ nyini ɛshara. iPhɛ dee ɛhaa ne hyɛ ɛshara gha yek cɛcɛk ne yɛɛs, ɛ ma yung so ɛnu ne izuk.

¹⁰Nigwaa en, taate ɛn nɛ ninabawa na nɛ nibhɛ kaa boote ndɔ ne irywɛɛk ɛDaray yo. Roos ɛn ngkɔɔl nibhɛ daa ne rop iku nibhɛ de ndɔ ne nggbang ngga.

¹¹ɛTsak, njwɛɛn i yeres ninaa nɛ nibhɛ kɛ rop iku de ninaa ɛwɛng. ˆƐ kɛ phok ɛn ihywee ne rop iku de ne ɛYuba gha kaa rop po, ne ˆɛ ta seng ɛn ɛli ne ɛDaray ya kɛ sit ɛbhɛ ne ɛwɛng nga ne ɛtsim mɛ wo. Daa ɛli ne ɛDaray ya so hyɔrɔ ne rɔ-irway gbik ne san iyɔm.[13]

¹²ɛKɔn na ne ɛ phyin gbik ko nigwaa en, sɔng ˆɛ lɛlɛm ɛn ihywa de nang. Sɔng ˆɛ lɛlɛm ɛn ihywa de ne ivel nang, sɔng ne ˆɛ lɛlɛm ɛn ne ɛdaa ne irywa nang, sɔng ˆɛ lɛlɛm ɛn daa ɛdɛ ɛkɔn na nang. Te “Ɛɛy” mon teye ɛɛy, te “Kwa,” mon teye kwa, ɛlɔ ne yaa yung hyɛ nyini ɛshara ne iku.[14]

¹³ɛDɛng ndɔ mon no i sɔ nggbang nge? Te ne ɛ boote ne ɛTaanggbey. ɛDɛng ndɔ mon no bok irway ihwala? Te ne ɛ yɛk ne iywel ne dɛp ɛTaanggbey ye.

¹⁴ɛDɛng ndɔ mon no so shwa? Te ne ɛ yel-le nindiinday ninaa ne roos tɛ nibhɛ boote ne ɛTaanggbey daa ɛbhɛ, nibhɛ sit ɛbhɛ ne inɔɔy ndɔ ne irywɛɛk ɛDaray.[15]

¹⁵iBoote yɛdaa wo ne kɛ boote ne ɛTaanggbey ya ndɔ ne ìnang ne itin de, i ne te ɛnyi ɛsha gha ɛken. ɛDaray ya yaa ne ta te ɛbhɛ ɛken. Wu ɛ kɛ ne ta mɔn ɛfɔt, yaa ne hana ɛbhɛ nɛ.

¹⁶iPhɛ ɛlɛy, te ɛrɔngɔ ne i tɔng ɛrɔngɔ ɛfɔt ɛbhɛ, te ɛrɔngɔ i boote ne ɛTaanggbey ya daa ɛrɔngɔ, te i tes nyini niken. iBoote ne ɛTaanggbey ya ne ɛnyi ɛcik ka kɛ boote wo bok ihwet, ifɛ i ne ta mɔn ɛtomɛ gbom.

¹⁷ɛNɛbi ɛLiya gha kaa ma soye ɛten ɛsii te njwɛɛn. Ɛ kaa ne boote ne ɛTaanggbey ya ndɔ ɛkyukyum ne irway ɛbhɛ wu te inɛn shɛɛ tang reey. iNɛn da ne shɛɛ tang reey yo ishay itat ne ngguk.[16]

¹⁸ɛTsim mɛ ɛlɛy, ne ɛ boote ne ɛTaanggbey ya dɔng, irywa wo ne nang inɛn da, ivel da ne ma ta nang ire de.[17]

¹⁹Nigwaa en, te yɔng wu ɛdɛ mon kɛ ne labhe ɛ tek itin de ɛdɛng i ji kyii ne ɛbhɛ ne nkiinɛ wo dɔng.

²⁰Ne ˆɛ seng ɛn ɛbɛ, gbik ɛnyi gha ne ɛ kɛ ban ɛhaa ne ɛfɔt ta ɛ kyii ne ɛbhɛ ne ɛnkiinɛ wo, aa ne phɔt iken ɛhaa ne ɛfɔt tɛghaa nggyɛ wo ɛlɔ ne iku, ɛ ta te i han ɛbhɛ ne ɛfɔt da gbom.[18]