Read eten 1 ɛBiturus 2 Bible Online

1 ɛBiturus 2 - eten bible

1 ɛBiturus 2

¹iPhɛ ɛlɛy, ne ɛ hosop ɛn nyini ne ibebhe de, ne irywɛɛk ga, ne iluk ga, ne waa irway da, gbik ne ivol ikpɛɛ da.

²Te ne ɛɛ sak ɛn nyini ne ire ne ikabyik ge ɛli nɛ ninɔn nishesheng nga i sak ghe ne mbalas da, te ɛ hɔn ɛn ndɔ ne ìphɔrɔt mon da,

³daa ɛli ne ɛ kɛ phɔwɔ ɛn iyɛnɛng ɛDaray de.[3]

⁴Yɛɛs ɛn cɛcɛk ɛlɔ ɛbhɛ, ne ɛbhɛ so ikɛɛ ne iken de. iKɛɛ de nɛ ninyi na kɛ mbaray yo, ikɛɛ de ne ɛTaanggbey ya bo iphɛ ɛ nang ɛbhɛ ne ndiinday ne iphɛ phyin gbik ko.

⁵Ne ɛ so ɛn te ikpɛɛ ne iken ne i lɔl ne ijwee ne ikabyik, te ɛ mɔn ɛn nitomɛ tɛ nibo ne kɛ tul ɛTaanggbey ye nɛ ndɔ ne ijwee yɛwoo nggyɛ wo, ɛ hap ɛn itsanga ne ikabyik lenɛ ne ɛYɛso ɛKiriti gha, ihywee de ne ɛTaanggbey i sim.

⁶Kɛ haa ndɔ ne ɛWee ne iBol ɛTaanggbey yo i bo, “Yaang ɛn, nggɛ ku kasa iKɛɛ, ne iphɛ phyin ne iyɛnɛng, nggɛ see iphɛ ndɔ ne iSihiyɔɔna, iphɛ ne so ɛkangashi yɛ. Gbik ɛnyi gha ne ɛ kɛ ne nang ne itin nɛ ne iphɛ, sɔng aa ne sɔ ncwa nang.”[4]

⁷Nyinɛn no ne ɛ kɛ ne nang ɛn ne itin nɛ wo, ikɛɛ yɛdee nggyɛ wo ne so nyini ɛkɔn ɛyɛnɛng. Ninyi na nɛ nibhɛ kɛ ne mbaray tang nang ne itin nɛ wo nang, “iKɛɛ de nɛ ninaa ne lɔl ijwee na kɛ ne mbaray yo, iphɛ kɛ ne kyii teye ɛkangashi yɛ.”[5]

⁸Kɛ haa ndɔ ne ɛWee ne iBol ɛTaanggbey i bo, “iKɛɛ yɛdee wo iphɛ yaa teye ɛkɔn ne kyibhɛ, ne ɛkɔn ne hoghɛse ninyi.”[6] iPhɛ ne so ɛlɛy ɛtsak! Ninyi na gbom kɛ kyibhɛ daa ɛli nɛ nibhɛ kɛ mbaray tang roos ibol ɛTaanggbey de. ɛLɛy ne kɛ ne ku ryɔng nibhɛ nɛ.

⁹Ne ɛ so ɛn ninyi ne ɛTaanggbey kɛ kasa, ɛguu nibo ɛTaanggbey ɛgbaang ɛgɔm, igbagha ne kɛ tul kang, idira ninyi nɛ nibhɛ so ninaa ɛTaanggbey. ɛTaanggbey ya kɛ tul nyini ndɔ gbyik ka ɛ yɛɛs ne nyinɛn ndɔ ne iwɛwɛy ɛbhɛ ne iphɛ so ɛkɔn ne kparat te ɛ sanga ɛn ibol nikɔn niyɛnɛng ne ɛ kɛ mɔn no.[7]

¹⁰Ne ile de, sɔng ɛ kaa so ɛn ninyi ne kɛ bo te ɛkɔn nang, ɛlyilyɛghaa wo, ne ɛ ji so ɛn ninyi ɛTaanggbey ya. Ne ile de, sɔng ɛ kaa say ɛn isan iyɔm ɛTaanggbey de nang, ɛlyilyɛghaa wo, ɛ kɛ ne say ɛn ìsan iyɔm ɛTaanggbey de.[8]

¹¹Nigwaa nge ne nzi sim, nzi bok nyini, daa ɛli ɛ so ɛn ninaa ne ikpoo na ndɔ ɛzay ya, ne ɛ hosop ɛn nyini ne roos ihyop ne ibek ge ne iphɛ so ɛfɔt to. iHyop pɛdee nggyɛ wo i ta itsom ne irway mon da.

¹²Shɛɛ ɛn ishwɛɛ iywɛnɛng ndɔ ninyi na nɛ nibhɛ sang yɛɛ ɛTaanggbey yegha. Te yaa ne sɛ nibhɛ bol ivol ne rip ba daa mon no nang, ne yang kyii lenɛ nɛ nikɔn niyɛnɛng nga ne ɛ mɔn ɛn no nibhɛ nang ɛTaanggbey ye ne ndiinday ɛtuk ka ne ɛTaanggbey ya sɛ yɛɛs ɛlɔ njwɛɛn na.

¹³Roos ɛn igbɔm ɛzay da gbik te sɛ i nang ɛDaray ye ne ndiinday. Roos ɛn ibol ɛgɔm ɛndiinday de daa ɛli ne ɛɛ re igbɔm ba daa ninyi na gbik.

¹⁴Roos ɛn ibol nigɔm-na de ne ɛgbaang ɛgɔm ma kɛ tom nibhɛ tɛ nibhɛ baasek ninyi nibebhe na nggbang ngga, nibhɛ ne jii dɛp ninyi na nɛ nibhɛ mɔn iyɛnɛng ngge.

¹⁵Daa ɛli ne icwas ɛTaanggbey da i sim te sɛɛ icwam ɛnu ninaa ne ivol iwamang ngge lenɛ nɛ nikɔn niyɛnɛng mon na ne ɛɛ mɔn ɛn no.

¹⁶Shɛɛ ɛn ishwɛɛ ne ito mon, sɔng ishwɛɛ ne ito mon da ne kyii te nyini ɛ yaa mɔn ɛn ɛfɔt nang, yang shɛɛ ɛn tɛ nikpuru ɛTaanggbey ya.

¹⁷Nang ɛn ninyi na gbik ne ndiinday. Sim ɛn nigwaa na nɛ nibhɛ soye ninaa ne roos ɛYɛso yegha. Phok ɛn ɛnik ɛTaanggbey. Nang ɛn ɛgɔm ma ne ndiinday.

¹⁸Nyinɛn nikpuru na, roos ɛn ibol nikyɛɛ ne idee mon de. Sɔng ne ɛ roos ɛn ibol ninaa nɛ nibhɛ kɛ jam nibhɛ so ihywee zɔng nang, ma roos ɛn ibol ninaa nɛ nibhɛ so nzɔwɔkɔk ne mang.

¹⁹Gbik ɛnyi gha ne ɛ kɛ bo ɛbɔk ka daa ne nggbang ngga ne ɛɛ sɔ daa ɛkɔn na ne ɛ kɛ sang mɔn no daa ɛli ne ɛ bok icwas ɛTaanggbey da, ne ɛ so ɛhaa ne sɛɛ dɛp.

²⁰Wu kɛ bak nyini nggbang ngga daa ne ibebhe de ne ɛ kɛ mɔn ɛn, ɛ ji rop ɛn iku de, ɛwɛng ngɛ ne ji so kyee? Wu kɛ ne bak nyini nggbang ngga daa ɛkɔn ɛyɛnɛng ne ɛ kɛ mɔn ɛn ɛ ji rop ɛn iku de, iphɛ ne ji so ɛkɔn ne dɛp ɛlɔ ɛTaanggbey ya.

²¹Daa ɛkɔn nɛghaa wo ne ɛTaanggbey ya kɛ yel-le nyini nɛ. Ɛ kɛ yel-le nyini te ɛ sɔ ɛn nggbang ngga ɛli ne ɛKiriti gha kɛ ma sɔ ɛlɔ mon na. ɛLɛ wo ne ɛ kɛ ne tek nyini ne ngkɔɔl lɛ ne aa roos ɛn.

²²ɛWee ne iBol ɛTaanggbey yo kɛ boote da ɛKiriti gha ɛbhɛ yɔngɔ, “Sɔng ɛ kɛ mɔn ɛfɔt nang, sɔng kɛ ne ku phok ɛbhɛ ne irywɛɛk nang.”

²³Kaa sɛ ninyi na i towos ɛbhɛ wo, sɔng ne ɛ kyii ne ɛkɔn nang. Kaa ne sɛ ɛ sɔ nggbang, sɔng ne ɛ yɔng wu yaa tal nang. Ɛ kaa yang ku sit irwisɛ ɛbhɛ daa ɛTaanggbey ne ɛbhɛ so ɛhaa ne bol ɛshara cik.[9]

²⁴ɛKiriti gha ne ito ɛbhɛ, ɛ kɛ bo ɛfɔt njwɛɛn no ne ibek ɛbhɛ daa ne ihon ne gangat te njwɛɛn te te ikpom ne kɛ ɛlɔ ne ɛfɔt to, kaabi ɛlɛy njwɛɛn so niken i ihywel icik. Te ɛli ne kɛ haa i bo, “Kɛ lenɛ ne inuu de ne kaa yaak ɛKiriti yegha nɛ wo, ɛ kɛ ne tes ɛn niken.”[10]

²⁵Ɛ kaa birit ɛn te ᐩigyol ntsabhak ne ihywɛ kɛ birit. ɛLyilyɛghaa wo, ɛ kɛ ne bhɛ kyii ɛn ɛlɔ ɛHaa ne Hyep nyini gha ne ɛ so ɛHaa ne Wɛɛ ikpen mon da.[11]