Read eten 2 ɛBiturus 1 Bible Online

2 ɛBiturus 1 - eten bible

2 ɛBiturus 1

¹ɛWee yɛwoo wo le ɛlɔ ɛSimɔn ɛBiturus ne ɛbhɛ ɛ so ɛkpuru ne ɛngɔn ne tom ɛYɛso ɛKiriti. Ɛbhɛ phɛɛs ɛlɔ ninyi ne kɛ lenɛ ne icik ɛTaanggbey ne ɛhaa ne phɔt njwɛɛn ɛYɛso ɛKiriti nibhɛ say ìnang ne itin ne iphɛ shɛs ne yɛnɛng te idee mos.

²Te izɛɛng gbik ne irway ne laal ɛTaanggbey hɔn ndɔ mon gbom lenɛ ne iseng ne ɛ kɛ seng ɛn ɛTaanggbey ye gbik ne ɛDaray njwɛɛn ɛYɛso ɛKiriti.

³ɛTaanggbey ya ndɔ ne ihwet ne ndiinday ɛbhɛ de kɛ nang njwɛɛn nikɔn na gbik nɛ nibhɛ yaa hɔn njwɛɛn te njwɛɛn yɛɛ ne shɛɛ ihywee ne ishwɛɛ da ne ifɛ so ivaa ninyi ɛTaanggbey da. Nikɔn nɛnaa wo ne so ninaa njwɛɛn gbik lenɛ ne ishweng njwɛɛn ne njwɛɛn kɛ seng ɛKiriti yegha gbom. Ɛ kɛ yel-le njwɛɛn te njwɛɛn shɛɛ ne ɛbhɛ njwɛɛn sɛ ihop ndɔ ne ndiinday ɛbhɛ.

⁴Kɛ ne lenɛ nɛ nikɔn nɛnaa wo ɛTaanggbey ya ne nang njwɛɛn ibol ɛbhɛ ne ɛ kɛ ku sim-mɛ, ne iphɛ shɛs ne yɛnɛng gbom. Te ne lenɛ ne nibhɛ te ɛ yɛɛ ne shɛɛ ɛn ne ɛbhɛ ndɔ ne iTaanggbey ɛbhɛ, ɛ ta phɔrɔt ɛn ndɔ ibebhe ɛzay de ne ihyop ne ibek ge i hɔ wo.

⁵iPhɛ ɛlɛy, ne ɛ mɔn ɛn ɛkɔn na ne aa yɛɛ ne mɔn ɛn te ɛ hante ɛn ne ìnang ne itin mon de ne iyɛnɛng, ɛ ji hante ɛn iyɛnɛng ngge ne iyɛɛ ɛTaanggbey ye.

⁶Daa ne iyɛɛ ɛTaanggbey ya ne ɛ hante ɛn ne wum ito mon, daa ne wum ito mon de ne ɛ hante ɛn ne irway nviit, daa irway nviit da ne ɛ hante ɛn ne ihywee ne ishwɛɛ ɛTaanggbey.

⁷Daa ne ihywee ne ishwɛɛ ɛTaanggbey da ne ɛ hante ɛn ne ishwim nigwaa, daa ne ishwim nigwaa da, ne ɛ hante ɛn ne ihywee ne ishwim ɛTaanggbey.

⁸Daa ɛli ne wu ɛ bok ɛn nikɔn nɛnaa wo gbom mo, ɛ ta i hɔnɔs ɛn ndɔ nibhɛ, nibhɛ yaa ne te ɛ te ɛn cwacwat ɛ yɛk ɛn ikpam lenɛ ne iyɛɛ ɛDaray njwɛɛn ɛYɛso ɛKiriti yegha.

⁹Daa ɛli ne gbik ɛnyi gha ne ɛ kɛ wɔs nikɔn nɛnaa wo, ne ɛ tɔ dilim, ɛ so ɛwil, ɛ kɛ ta te bap ne ikuus da ne kaa kuus ɛbhɛ ndɔ ne ɛfɔt ɛbhɛ wo ne ile de.

¹⁰iPhɛ ɛlɛy, nigwaa en ne ɛ mɔn ɛn ɛkɔn na ne aa yɛɛ ne mɔn ɛn te iphɛ tɔɔrek wu ɛTaanggbey ɛbhɛ kɛ yel-le ɛ ta kasa nyini. Wu ɛ kɛ mɔn ɛn ɛlɛ wo, sɔng aa ne kyibhɛ ɛn ɛ ta ho ɛn nang.

¹¹Yaa ne lenɛ ɛlɛ wo ne say nyini ne ibɔ iphaa ndɔ ne igbɔm ne inat ɛDaray njwɛɛn ɛYɛso ɛKiriti ɛhaa ne phɔt njwɛɛn.

¹²iPhɛ ɛlɛy, naa ne i tas nyini nɛ nikɔn nɛnaa wo cɛcɛɛy, gbik ɛli ne ɛ jung yɛɛ ɛn nibhɛ wo, ɛ kɛ ta kyinak ɛn gɛgɛy daa ne itin de ne ɛ kɛ say ɛn no.

¹³Nzi wɛɛ te iphɛ kɛ jam mɛ nzɛɛ ku i tas nyini nɛ nikɔn nɛnaa nggyɛ gbik nten de ne nzo ɛken,

¹⁴daa ɛli ne nzi yɛɛ naa yungaa tek ibek ne iku yɛdee wo, ɛli ne ɛDaray njwɛɛn ɛYɛso ɛKiriti gha kɛ ku tɔɔrek me wɛsɛrɛk ko.

¹⁵iPhɛ ɛlɛy, naa ne mɔn ɛkɔn na ne naa yɛɛ ne mɔn nɛ te n tek nyini nɛ nikɔn nɛnaa wo ne ɛ sɛɛ i tas ɛn nɛ ɛtsim ne iku nge gha.

¹⁶Sɔng ivol ne nggbyɛrɛs ne njwi kaa tas ndɔ ne ntsɛntsɛng mos njwi tɔng nyini nten de ne njwi kaa tɔng nyini ibol ne ihwet ɛDaray njwɛɛn ɛYɛso ɛKiriti gha gbik ne iyɛɛs ɛbhɛ da nang. Ne irwisɛ mos, njwi kaa yaang ito-ndiinday ɛbhɛ de.

¹⁷Njwi kaa sonɛ nten de ne ɛ kaa say ndiinday de ne igbom be ɛlɔ ɛTaanggbey ya ne ɛ so ɛTaa gha, nten de ne izɔlɔs ɛTaanggbey de ne ihywɛ shɛs ne igbom be kaa boote wo, ihywɛ yɔngɔ, “ɛNgɔn ngeghaa wo ne nzi sim ɛbhɛ gbom, ɛbhɛ ne n bok irway ihwala ne ɛbhɛ.”

¹⁸Njwit to ne ito mos njwi kaa phok izɔlɔs sɛdee nggyɛ wo ihywɛ le daa ne irywa nten de njwi kaa sonɛ ɛbhɛ daa ne igol ikang.

¹⁹iPhɛ ɛlɛy, njwi kɛ ne hante ne yɛk ihwet daa ne ivol ninabawa de nɛ nibhɛ kaa tɔng ngo. iPhɛ kɛ ne jam mɛ ɛ kyii ɛn ne ihywɛɛ mon yɛnɛng daa ne iphɛ, daa ɛli ne iphɛ so te igboo ne ifɛ tol i ndɔ gbyik ihwɛlɛ phyii wuru. iWɛwɛy ɛDaray de i ne tol ndɔ ne irway mon da te ɛli ne ɛyuyɔrɔ ɛraam ne ihwɛlɛ gha i tol ɛzay ya.

²⁰ɛKɔn na ne ɛ phyin no ɛbhɛ ghaa ɛlɛ, nzi sim te ɛ sɛɛ seng ɛn sɔng ɛnyi sonɛ ne ɛ sɛɛ yɛɛ ne kpɛl ivol ɛnɛbi da ne kɛ haa ndɔ ne ɛWee ne iBol ɛTaanggbey yo ne ito ɛbhɛ nang.

²¹Daa ɛli ne sɔng ivol ɛnɛbi da i le ne icwas ɛten ɛsii nang, ninyi na kaa yang bol ivol ɛTaanggbey da lenɛ ne iKabyik ɛTaanggbey ne iphɛ kaa so ndɔ nibhɛ.