Read eten 2 ɛBiturus 2 Bible Online

2 ɛBiturus 2 - eten bible

2 ɛBiturus 2

¹Ninabawa ne irywɛɛk kaa ne le ndɔ ninyi ɛTaanggbey ya, ɛlɛy nɛ nikyɛɛ ne icwam ne irywɛɛk ka sɛ ne ma le ndɔ mon. Nibhɛ sɛ mɛmɛ ninyi na ne ivol ne irywɛɛk ne ifɛ labhe, ne ifɛ yaa bees ninyi na. Nibhɛ sɛ ma yung yɛɛs ne ivol ne mbaray ɛDaray ye ne ɛ kɛ phɔt nibhɛ, nibhɛ mɛmɛ ninyi na nɛ gying, ɛli ne iphɛ sɛ hɔ nibhɛ ɛkɔn ne bees itso nibhɛ.

²Ninyi gbom sɛ ne roos ihywel ikpɛɛ nibhɛ da ne ifɛ so ivaa ne ishwɛɛ ne phok yɛnɛng nikɔn ne yɔm ncwa. Sɛ ne lenɛ ne ibol nibhɛ de ɛbyin ninyi na bol ivol ikpɛɛ daa ne ɛnkiinɛ ne itin no.

³Ndɔ ne irisɛ nibhɛ de, nikyɛɛ ne icwam mɛnaa nggyɛ wo sɛ ne tɔng nyini irywɛɛk nɛ nibhɛ kɛ ku ryɔng nge nɛ tɛ nibhɛ sɛ ɛkɔn ne ibek mon. ɛHaa ne bol ɛshara nibhɛ gha kaa ne ku hyɛ nibhɛ ɛshara gha ne ile, ɛshara nibhɛ gha i ne hyep nibhɛ.

⁴Sɔng ɛTaanggbey ya kaa san iyɔm nimalɛka de nɛ nibhɛ kaa mɔn ɛfɔt to nang, ɛ kaa yang yɛk ngɛ i robhos nibhɛ i cwaasek nibhɛ ndɔ ne ijwee ne igboo, ndɔ ne ivong igbyik ɛlɔ gha ne kɛ tek nibhɛ nɛ nibhɛ hyep ɛtuk ɛshara gha.

⁵Sɔng ɛTaanggbey ya kaa san iyɔm ninaa ne ile na nang, ɛ kaa yang phobho ninaa ne sang tel ɛnik ɛTaanggbey yo ne ɛgbaang inɛn. ɛNuhu zɔng ne ɛ kaa tɔng ibol icik gbik nɛ ninyi ɛniitaa nibhɛ kaa phɔrɔt.[1]

⁶ɛTaanggbey ya kaa phoo ɛgarang ne iSɔdɔm gbik ne iGomora nibhɛ teye ntsong te ɛ tɔɔrek ɛkɔn na ne ɛ sɛ sɛ̀ ninaa nɛ nibhɛ sang tel ɛnik ɛbhɛ wo.[2]

⁷ɛTaanggbey ya kaa phɔt ɛLuutu yɛ, ɛnyi ɛcik ne irway ɛbhɛ kaa so righitik daa ne ihywee ne ishwɛɛ ivebhe ninyi ne iSɔdɔm ba nɛ nibhɛ sang roos ikpii da.[3]

⁸ɛNyi ɛcik kɛghaa nggyɛ wo kaa i shɛɛ ndɔ nibhɛ, irway ɛbhɛ ne i shɛɛ righitik gbom daa ɛli ne ɛ kaa i tenes ɛ ta i wɛɛ ihywee ne ibebhe nibhɛ de izenge ne ihwɛlɛ.

⁹iPhɛ ɛlɛy, nikɔn nɛnaa wo kɛ ne tɔɔrek njwɛɛn wu te njwɛɛn seng wu ɛTaanggbey ya i yɛɛ ne phɔt ninaa ne tel ɛnik ɛbhɛ na nɛ nibhɛ so ndɔ ne tɛrɛk ga ihywee-ihywee de. ɛTaanggbey ya ne ta yɛɛ ɛli ne aa hyep nibebhe na phyii bhɛ hɔn ɛtuk ne hyɛ ɛshara gha.

¹⁰iHyɛ ɛshara yɛghaa nggyɛ wo sɛ ne phyin ne ihwet daa ninaa nɛ nibhɛ roos ihyop igywebhe ne ibek nibhɛ nɛ, gbik nɛ ninaa nɛ nibhɛ bɛɛs igbɔm. Sɔng nikyɛɛ ne icwam ne irywɛɛk kɛnaa nggyɛ wo bok ncwa nang, kɔɔ ncɛt! Nibhɛ tɔɔsek ito, sɔng bok ɛnik nang, nibhɛ ma yung towos nimalɛka ɛTaanggbey.

¹¹Gbik ɛli nɛ nimalɛka na phyin ninyi yɛnaa nggyɛ wo ne ihwet da ne igbom be, sɔng ɛdɛ ɛmalɛka gha kɛ ne ku boote ibol ne tok ɛnu ɛyisɛ ɛDaray ya daa ninyi yɛnaa nggyɛ wo nang.

¹²Ninyi yɛnaa nggyɛ wo i ne bol ivol ne bɛɛs daa ɛkɔn na nɛ nibhɛ sang yɛɛ ito yɛ. Nibhɛ so te inyam ɛhay ne ihywɛ sang yɛɛ ɛkɔn, ihywɛ roos ɛkɔn na ne ibek ne ihywɛ kɛ yɔngɔ. Nzo kɛ ryɔng inyam ɛhay de te i wum i hyɛ zɔng. Ninyi yɛnaa nggyɛ wo sɛ ne kus te inyam ɛhay de.

¹³Sɛ tal nibhɛ ne ibebhe daa ne ibebhe nɛ nibhɛ kɛ mɔn. Nibhɛ wɛɛ te iphɛ kɛ ji jam mɛ ne yaa phok yɛnɛng nikɔn nibebhe na ne ibek ge i sim mo ne itsara ne igbey de. iShwɛɛ nibhɛ da ndɔ mon no ne so ɛkɔn ncwa, ɛkɔn ɛbebhe dɔng. Nibhɛ re, nibhɛ sɔ ne nyinɛn, ne sɛ ɛtsim mon, nibhɛ ne ji mɔn ɛkɔn ne ɛ kɛ jam nibhɛ.

¹⁴iCwas nibhɛ da ku so ivaa ne nzangas, sɔng nibhɛ te kpos ne mɔn ɛfɔt to nang. Nibhɛ luk ninaa nɛ nibhɛ so kyɔkyɔt ndɔ ne ìnang ne itin. Nibhɛ kɛ ku tɔk irway nibhɛ da ne irisɛ. Nibhɛ ne so ninaa ɛkawɛy.

¹⁵Nibhɛ kɛ tek ɛnkiinɛ tsik ko nibhɛ roos ɛnkiinɛ ɛBalamu, ɛngɔn ɛBɛyor, ne kaa lenɛ ne sim ijam ɛbhɛ, ɛ yaa phok yɛnɛng ne mɔn ibebhe.

¹⁶ɛTaanggbey kaa ne nep ɛbhɛ daa ne ɛfɔt to ne ɛ kaa ku tas aa mɔn no. ɛJaakyi ne hame ɛ bol kaa ne bol ne izɔlɔs ɛten ɛsii te ɛ ring ɛnɛbi yɛghaa wo ne mɔn nikɔn nisan na.[4]

¹⁷Ninaa ne tɔng irywɛɛk kɛdaa nggyɛ wo so te irong ne iphɛ sang inɛn, te inɔp ne igbil i tobhos. ɛTaanggbey ya kɛ ne ku ryɔng nibhɛ ɛlɔ ndɔ ne ɛgbaang ne ibong gbyighilik.

¹⁸Nibhɛ rɛrɛ, nibhɛ ton itso nibhɛ daa ne ivol ɛbuu. I ne lenɛ ne sim phok yɛnɛng ne yɔm ncwa nibhɛ de, nibhɛ ne i sim tɛ nibhɛ sɛɛ hɔ ninyi na nɛ nibhɛ tɔɔ le ne iphɔrɔt ndɔ ne ishwɛɛ ne ɛfɔt da.

¹⁹Nibhɛ kɛ ku sim ninyi na nɛ nibhɛ bo wu nibhɛ kɛ roos imɛmɛ nibhɛ da, nibhɛ yaa sɛ ishwɛɛ ne ito nibhɛ, ɛlɛy nibhɛ wo, nibhɛ ne ma kyi soye nikpuru ne ibebhe de daa ɛli ne ɛnyi gha i soye ɛkpuru ɛkɔn na ne ɛ kɛ kpuru ihywɛɛ ɛbhɛ de.

²⁰Yung yaang ɛbɛ, ninyi na kɛ sɛ iphɔrɔt ndɔ ibebhe ne ɛzay yɛdee wo, lenɛ nɛ nibhɛ kɛ seng ɛDaray njwɛɛn ɛYɛso ɛKiriti ye ne ɛbhɛ ɛ so ɛhaa ne phɔt njwɛɛn. Wu nibhɛ kɛ ne kyi ta kyii nibhɛ lel ndɔ ne ibebhe yɛdee nggyɛ wo, nibhɛ teye nikpuru ne iphɛ, ɛtsak ishwɛɛ ɛtsim ninyi yɛnaa nggyɛ wo yaa ne phyin ivaa ɛyisɛ da ne ibebhe.

²¹iPhɛ kɛ jam mɛ, te sɛɛ yɔng nibhɛ kɛ sang ku seng ɛnkiinɛ tsik ko, ne ya yɔng nibhɛ kɛ seng ɛbhɛ wo nibhɛ ji kyi ta hyereey ne ɛtsim ma, nibhɛ tek ikpii ɛTaanggbey kang da ne kaa nang nibhɛ wo.

²²Ɛɛy! ɛKɔn na nɛ nibhɛ kɛ mɔn no ɛ so cɛcɛɛy ne ibol de ne iphɛ bo, “ɛBabu gha kɛ kyi ta lɛlɛm ihɔs ɛbhɛ da.” Ne idee ne iphɛ ta bo, “ɛTɔɔm mo ne kɛ kuus so kɛ kyi ta bhɛ bɔsɔm me ne ifɔm.”