Read eten 1 ɛYohana 1 Bible Online

1 ɛYohana 1 - eten bible

1 ɛYohana 1

¹Njwii haa nyini ibol ɛYɛso ɛKiriti de ne ɛ soye iBɔrɔk ne iBol de, ne ɛ ku sonɛ ne ile ne tum ɛzay de, iBɔrɔk ne iBol de ne njwi kɛ phok, njwi yaang ne irwisɛ mos njwi ta dat ɛbhɛ ne ibɔ mos de. iBɔrɔk ne iBol de ne iphɛ i nang iken de.[1]

²iKen nɛdee wo kaa ne phaal le njwi ne yaang. Njwi i ne naas ishɛɛda ne iphɛ njwi i ta tɔng nyini wu iphɛ iphɛ soye iKen ne inat, idee ne iphɛ kaa ku sonɛ ɛTaa gha ne ile de, iphɛ ne kɛ ne tɔɔl njwii wo.[2]

³Njwii tɔng nyini ibol ɛkɔn de ne njwi kɛ yaang, njwi ta phok, te ɛ ma byinki ɛn ìtsɛm be ne njwit. ìTsɛm mos de ne so ne ɛTaa gha gbik ne ɛNgɔn ɛbhɛ ɛYɛso ɛKiriti.

⁴Njwii ne haa nyini nɛ te irway ihwala mos da[3] te hyɔrɔ.

⁵iBol de ne njwi kɛ phok ɛlɔ ɛNgɔn ɛbhɛ gha ne njwii tɔng nyini wo i bo ɛTaanggbey ya so iwɛwɛy, sɔng igbyik so ɛlɔ ɛbhɛ gha nang, kɔɔ ncɛt.

⁶iPhɛ ɛlɛy, wu njwɛɛn i bo, wu njwɛɛn bok ìtsɛm be ne ɛTaanggbey ya, njwɛɛn ne kyii ta i hyel ndɔ gbyik ka, njwɛɛn ne so ninaa ne irywɛɛk, sɔng njwɛɛn i roos itin de nang.

⁷Wu njwɛɛn i ne hyel ndɔ ne iwɛwɛy de ɛli ne ɛTaanggbey ya so iwɛwɛy de, njwɛɛn i ne byingis ìtsɛm be nɛ nigwaa. Neyi ɛNgɔn ɛbhɛ ɛYɛso ɛKiriti na i ne kuus ɛfɔt njwɛɛn no gbik.

⁸Wu njwɛɛn kɛ ne yɔngɔ wu hang bok ɛfɔt to, njwɛɛn i ne luk ito njwɛɛn. Sɔng itin de ne so ndɔ njwɛɛn nang.

⁹Wu njwɛɛn kɛ ne tɔng ɛTaanggbey yegha ɛfɔt njwɛɛn no, ne ɛ so ɛhaa ne sɛ kyinak daa ne ibol ɛbhɛ, ne ɛ ta so ɛhaa ne itin, aa ne hana njwɛɛn ne ɛfɔt njwɛɛn no ɛ kuus iyɔm ne icik njwɛɛn de gbik.

¹⁰Wu njwɛɛn i ne bo wu hang kɛ mɔn ɛfɔt to, te kaabi njwɛɛn kɛ bo ɛTaanggbey yegha te ɛhaa ne irywɛɛk, sɔng ibol ɛbhɛ de ne so ndɔ ne irway njwɛɛn nang.