Read eten 1 ɛYohana 2 Bible Online

1 ɛYohana 2 - eten bible

1 ɛYohana 2

¹Nyinɛn ninɔn nge ne nzi sim, nzi haa nyini ɛwee yɛwoo wo ɛlɔ ne ˆaa yung mɔn ɛn ɛfɔt. Wu ɛdɛ mon kɛ ne jung mɔn ɛfɔt to, njwɛɛn ne bok ɛhaa ne kyinak njwɛɛn nɛ ɛnu ɛyisɛ ɛTaa gha, kaabi ɛYɛso ɛKiriti gha ne ɛ so cik ko.

²ɛYɛso ɛKiriti gha ɛbhɛ ɛ soye itsanga de ne kɛ hap mɛ te ɛTaanggbey ya hana njwɛɛn ne ɛfɔt njwɛɛn no, sɔng ma yung so ɛfɔt njwɛɛn zɔng nang, gbik ne ɛfɔt ninaa ɛzay yo.

³Wu njwɛɛn kɛ ne roos ikpii ɛTaanggbey da, iphɛ kɛ ne tɔɔrek njwɛɛn wu njwɛɛn i yɛɛ ɛbhɛ wɛlɛng ito irway.

⁴Gbik ɛnyi gha ne ɛ ne bo wu i yɛɛ ɛbhɛ wo, ɛ sang kyi ta i roos ikpii ɛbhɛ da, ne ɛ soye ɛhaa ne irywɛɛk, sɔng itin de ne so ndɔ ɛbhɛ nang.

⁵Gbik ɛnyi gha ne ɛ kɛ ne roos ibol ɛTaanggbey de, ishwim ɛTaanggbey da kɛ ne shwaak ghe hyɔrɔ ndɔ ɛbhɛ. ɛLɛy ne njwɛɛn yaa ne seng wu njwɛɛn so ndɔ ɛTaanggbey ya.

⁶Gbik ɛnyi gha ne ɛ bo wu so ndɔ ɛTaanggbey ya, iphɛ ne so nggbinggbing ɛ hyel ihywel da ɛli ne ɛYɛso ɛKiriti gha kɛ hyel lo.

⁷Nigwaa nge ne nzi sim, sɔng nzi haa te i nang nyini ikpii ifas nang, yang so ikpii icwɛl da ne ˆɛ ku bok ɛn ne ile de. iKpii icwɛl lɛdaa wo ifɛ soye ibol de ne ɛ kaa ku phok ɛn.[4]

⁸Gbik ne iphɛ ɛlɛy, nzi ne haa nyini ikpii ifas, daa ɛli ne i yaang itin ne ifɛ ndɔ ɛKiriti gha gbik ne nyinɛn, igbyik ge i taasel le, ɛwɛwɛy ne itin de kɛ ne tsa itol.

⁹Gbik ɛnyi gha ne ɛ bo wu i so ndɔ ne iwɛwɛy de ɛ kyi ta i mbaray ɛgwaa ɛbhɛ gha ne ɛ kyi tɔ ndɔ ne igbyik ge.[5]

¹⁰Gbik ɛnyi gha ne ɛ ne sim ɛgwaa ɛbhɛ gha, ɛbhɛ ɛ ne shɛɛ ishwɛɛ ne iwɛwɛy da, sɔng aa ne teye ɛkɔn ne kyibhɛ ɛnyi nang.[6]

¹¹Gbik ɛnyi gha ne ɛ ne mbaray ɛgwaa ɛbhɛ gha ne ɛ so ndɔ gbyik, ɛ ta hyel ndɔ gbyik, sɔng ɛ yɛɛ ɛlɔ gha ne ɛ phɛɛs nang, daa ɛli ne igbyik ge kɛ hyere ɛbhɛ ɛ teye ɛhaa ne iwil.

¹²Nyinɛn ninɔn nge ne nzi sim, nzi haa nyini nɛ, daa ɛli ne kɛ hana nyini ne ɛfɔt mon no lenɛ ne irywɛɛk ɛYɛso.

¹³Nyinɛn nikyɛɛ, nzi haa nyini nɛ, daa ɛli ne ˆɛ yɛɛ ɛn ɛhaa ne ɛ ku sonɛ ne ile ne tum mɛ. Nyinɛn ninɔn niphas, nzi haa nyini nɛ, daa ɛli ne ˆɛ kɛ re ɛn ɛwɛng daa ɛbebhe yɛghaa wo. Nyinɛn ninɔn nge ne nzi sim, nzi haa nyini nɛ daa ɛli ne ˆɛ yɛɛ ɛn ɛTaa ye.

¹⁴Nyinɛn nikyɛɛ, nzi haa nyini nɛ, daa ɛli ne ˆɛ yɛɛ ɛn ɛhaa ne ɛ ku sonɛ ne ile ne tum mɛ. Nyinɛn ninɔn niphas, nzi haa nyini nɛ daa ɛli ne ˆɛ bok ɛn ihwet, ibol ɛTaanggbey de i ta shɛɛ ndɔ ne irway mon, ˆɛ kɛ ne ta re ɛn ɛwɛng daa ɛbebhe yɛghaa wo.

¹⁵Sɔng ˆɛ kyii ɛn ne irway mon daa ɛzay yɛghaa wo nɛ nikɔn na nɛ nibhɛ so ne ndɔ yɛwo nang. Gbik ɛnyi gha ne ɛ kɛ kyii ne irway ɛbhɛ da daa ɛzay yɛghaa wo, sɔng ishwim ɛTaanggbey da ne so ndɔ ɛbhɛ nang.

¹⁶Daa ɛli nɛ nikɔn na nɛ nibhɛ so ndɔ ɛzay ya, te ihyop igywebhe ne ibek, ne irisɛ ne gbik ɛdɛ ɛkɔn nɛ ninyi i hal ɛgyɛy daa nibhɛ, sɔng nibhɛ le ɛlɔ ɛTaa gha nang. Nikɔn nɛnaa wo yang le ndɔ ɛzay ya.

¹⁷ɛZay ya ne ihyop igywebhe nikɔn ɛzay de gbik i phebhe, gbik ne iphɛ ɛlɛy, ɛnyi gha ne ɛ ne mɔn ɛkɔn na ne aa nang ɛTaanggbey yegha irway ihwala, ɛ sɛ ne shɛɛ ishwɛɛ ne inat.

¹⁸Nyinɛn ninɔn nge wo, nten nɛdee wo soye nituk ɛtsim. Te ɛli ne ɛ kaa phok ɛn i bo ɛhaa ne iphup ɛKiriti gha yaaso wo, ɛlyilyɛghaa wo, ninaa ne iphup ɛKiriti na kɛ ne ku yɛɛs gbom. iPhɛ phɛ kɛ te njwi kɛ seng ɛli ne nten nɛdee wo soye nituk ɛtsim ma.

¹⁹Ninaa ne iphup ɛKiriti yɛnaa wo kaa so ndɔ njwɛɛn ne ile, nibhɛ kɛ ne tek njwɛɛn, daa ɛli ne sɔng nibhɛ gha ku soye ninaa njwɛɛn nang. Sɛ yɔng nibhɛ kaa ku soye ninaa njwɛɛn na, nibhɛ sɛ ne tɔ ne njwɛɛn no. Nibhɛ kɛ tek njwɛɛn, iwuru nibhɛ da kɛ ne tɔɔrek kpas wu hang nibhɛ soye ninaa njwɛɛn.

²⁰Nyinɛn no, ɛKiriti gha ɛhaa ne ɛ so kang ngo kɛ ne tul nyini kang, iphɛ ɛlɛy gbik mon no ˆɛ yɛɛ ɛn itin de.[7]

²¹Sɔng nggɛ haa nyini nɛ daa ɛli ne ˆɛ doo ɛn itin de nang. Nggɛ yang haa nyini nɛ daa ɛli ne ˆɛ yɛɛ ɛn itin de. ˆƐ ta yɛɛ ɛn sɔng itin de i yɛk irywɛɛk nang.

²²ɛHay ɛbhɛ ne ɛ soye ɛhaa ne irywɛɛk kaa? Nzo ɛnyi gha ne ɛ re ne mbaray wu hang ɛYɛso gha ɛbhɛ ɛ soye ɛKiriti gha. ɛNyi gha ne ɛ mbaray ɛTaa yegha ne ɛNgɔn na ɛbhɛ ɛ soye ɛhaa ne iphup ɛKiriti gha.

²³Gbik ɛnyi gha ne ɛ kɛ mbaray ɛNgɔn na, sɔng ne ɛ bok ɛTaa yegha nang. Gbik ɛnyi gha ne ɛ kɛ ne say ɛNgɔn na ne ɛ bok ìtsɛm ne ɛTaa gha.

²⁴Nyinɛn no, te imɛmɛ da ne ˆɛ kɛ phok ɛn ne ile ne ɛtum mɛ wo shɛɛ ndɔ ne irway mon. Wu iphɛ kɛ ne shɛɛ ndɔ ne irway mon da, ˆaa ne ma shɛɛ ɛn ndɔ ɛNgɔn na ne ɛTaa gha.

²⁵ɛKɔn nɛghaa ɛbhɛ soye ibol de ne ɛNgɔn na kɛ ku sim-mɛ aa nang njwɛɛn no, ɛ soye iken ne inat.

²⁶Nzi haa nyini nikɔn nɛnaa wo daa ne ibol ninyi de nɛ nibhɛ sim tɛ nibhɛ yaa luk nyini wo.

²⁷Nyinɛn no nang, ɛKiriti gha kɛ ne tul nyini kang lenɛ ne ɛ kɛ sit nyini ne iKabyik ɛbhɛ. ɛLi ne iKabyik ɛbhɛ de so ndɔ mon no, sɔng ne ˆɛ ta tɔtɔk ɛn ɛdɛ ɛkyɛɛ ne icwam ma kang ne aa mɛmɛ nyini nɛ nang. Daa ɛli ne iKabyik ɛbhɛ de i mɛmɛ nyini nɛ nikɔn na gbik, imɛmɛ ɛbhɛ da ne so itin nɛ sɔng irywɛɛk nang. iPhɛ ɛlɛy, ne ˆɛ roos ɛn imɛmɛ ne iKabyik ge te ˆɛ shɛɛ ɛn ndɔ ne ìtsɛm be ne ɛKiriti gha.

²⁸ɛLyilyɛghaa wo nyinɛn ninɔn nge ne nzi sim, ne ˆɛ shɛɛ ɛn ndɔ ɛKiriti gha te sɛ ne sɛ ɛtuk ka ne ɛ sɛ tɔɔl le wo, njwɛɛn kyinak ɛnu ɛyisɛ ɛbhɛ tang ɛnik ne ncwa.

²⁹Wu ɛ yɛɛ ɛn wu ɛKiriti gha so cik ko, ˆaa ne seng ɛn wu ɛnyi gha ne ɛ mɔn nikɔn nicik ka ɛ soye ɛngɔn ɛTaanggbey.