Read eten 1 ɛYohana 5 Bible Online

1 ɛYohana 5 - eten bible

1 ɛYohana 5

¹Gbik ɛnyi gha ne ɛ kɛ nang ne itin nɛ wu ɛYɛso gha ɛbhɛ ɛ soye ɛKiriti gha, ɛnyi yɛghaa nggyɛ wo ne soye ɛngɔn ɛTaanggbey. Gbik ɛnyi gha ne ɛ ne sim ɛTaa yegha, ɛ ne ma sim ɛNgɔn na.

²ɛLɛ ne njwɛɛn yaa seng wu njwɛɛn i sim ninɔn ɛTaanggbey ya: njwɛɛn yaa seng ɛlɛ wo wu njwɛɛn i sim ɛTaanggbey yegha i roos ikpii ɛbhɛ da.

³iShwim ba ne njwɛɛn i sim ɛTaanggbey yegha so ɛlɛ: te njwɛɛn roos ikpii ɛbhɛ, sɔng ikpii ɛbhɛ da ne so righitik nang,[15]

⁴daa ɛli ne gbik ɛnyi gha ne ɛ soye ɛngɔn ɛTaanggbey ya ɛ bok ihwet ne re ɛwɛng ne ɛzay ya. ìNang ne itin njwɛɛn de ndɔ ɛKiriti gha i te njwɛɛn re ɛwɛng daa ne ibebhe ɛzay de.

⁵ɛHay ɛbhɛ aa yɛɛ ne re ɛwɛng nga ne ɛzay yaa? iPhɛ so ɛnyi gha ne ɛ kɛ nang ne itin nɛ wu ɛYɛso gha soye ɛNgɔn ɛTaanggbey ya.

⁶Kaa phaal ɛYɛso ɛKiriti yegha ndɔ ne so ɛbhɛ ɛNgɔn ɛTaanggbey ya lenɛ ne ibatisima ɛbhɛ ndɔ inɛn gbik nɛ neyi ɛbhɛ ne ɛ kɛ lok daa ne ihon ne gangat. Kaabi sɔng kaa phaal ɛbhɛ ndɔ ne inɛn da zɔng nang, kaa phaal ɛbhɛ ne inɛn da gbik nɛ neyi. iKabyik ɛTaanggbey ne iphɛ so itin nɛ iphɛ phɛ kɛ nang ishɛɛda yɛ ɛlɛ wo.

⁷Nikɔn na so itwat nibhɛ kɛ nang ishɛɛda ɛYɛso de.

⁸Nibhɛ so ɛlɛ, iKabyik ɛTaanggbey, ne inɛn ne gbik nɛ neyi. Nikɔn itwat tɛnaa wo kɛ bol ɛkɔn ɛdaan nɛ.

⁹Njwɛɛn i say ishɛɛda ne niten nisii, ishɛɛda ɛTaanggbey de ne phyin idee niten nisii de gbom, daa ɛli ne iphɛ soye ishɛɛda ɛTaanggbey, idee ne ɛ kɛ nang daa ɛNgɔn ɛbhɛ.

¹⁰Gbik ɛnyi gha ne ɛ kɛ nang ne itin nɛ ne ɛNgɔn ɛTaanggbey ya, ne ɛ bok ishɛɛda yɛdee wo ndɔ ne irway ɛbhɛ. Gbik ɛnyi gha ne ɛ kɛ ne sang nang ne itin nɛ ɛTaanggbey ya, ɛ kɛ ne bo ɛTaanggbey yegha ɛ so ɛhaa ne irywɛɛk. Daa ɛli ne ɛ kɛ sang nang ne itin nɛ ne ishɛɛda ɛTaanggbey de ne ɛ kɛ nang daa ɛNgɔn ɛbhɛ gha.

¹¹iShɛɛda ɛTaanggbey de ne so ɛlɛ: ɛTaanggbey ya kɛ nang njwɛɛn iken ne inat, iken ne inat de ne so ndɔ ɛNgɔn ɛbhɛ.[16]

¹²Gbik ɛnyi gha ne ɛ bok ɛNgɔn ɛTaanggbey ya ne ɛ bok iken, ɛnyi gha ne ɛ sang bok ɛNgɔn ɛTaanggbey ya, sɔng ne ɛ bok iken nang.

¹³Nyinɛn no ne ˆɛ kɛ nang ɛn ne itin nɛ ne ɛNgɔn ɛTaanggbey ya, nggɛ haa nyini nikɔn nɛnaa wo te ˆɛ yɛɛ ɛn ˆɛ bok ɛn iken ne inat.

¹⁴Njwi i kyinak ɛnu ɛyisɛ ɛTaanggbey wɛlɛng ito irway, daa ɛli ne njwii yɛɛ wu njwi kɛ phom ɛbhɛ ɛkɔn na ne aa nang ɛbhɛ irway ihwala, aa ne phok njwii.

¹⁵Wu njwɛɛn i yɛɛ wu ɛTaanggbey ya i phok njwɛɛn no, njwɛɛn i ne yɛɛ wu njwɛɛn i sɛ gbik ɛkɔn na ne njwɛɛn kɛ phom ɛTaanggbey yegha.

¹⁶Wu ɛdɛ ɛnyi gha kɛ yaang ɛgwaa ɛbhɛ i mɔn ɛfɔt ne ɛbhɛ kɛ sang hɔn iku ne ikabyik, te ne ɛ boote ne ɛTaanggbey daa ɛhaa ne ɛfɔt ta, ɛTaanggbey ya yaa ne nang ɛbhɛ iken. Nzi bol daa ɛnyi gha ne hame ɛfɔt ɛbhɛ wo kɛ hɔn ɛli ne aa ku iku ne ikabyik. ɛDɛ ɛfɔt to ne sonɛ ne ɛbhɛ i hɔn iku de. Sɔng nzi ne bo wu te bol ne ɛTaanggbey ya daa ne ɛfɔt tɛwoo nggyɛ wo nang.

¹⁷Gbik iyɔm ne icik ge soye ɛfɔt, gbik ne iphɛ ɛlɛy, sɔng gbik ɛfɔt to ɛbhɛ i ne hɔn iku de nang.

¹⁸Njwɛɛn i yɛɛ wu gbik ɛnyi gha ne ɛ soye ɛngɔn ɛTaanggbey ya, sɔng ɛ re ɛnu ɛyisɛ ne mɔn ɛfɔt to nang, daa ɛli ne ɛYɛso gha ne ɛ so ɛNgɔn ɛTaanggbey ya i kyɛngɛse ɛbhɛ. Sɔng ɛShɛtan na yaa ne yɛɛ ne dat ɛbhɛ nang.

¹⁹Njwɛɛn i yɛɛ wu njwɛɛn soye ninɔn ɛTaanggbey, ɛzay ya gbik ne so ne iwɔ ɛShɛtan.

²⁰Njwɛɛn i ne ta yɛɛ wu ɛNgɔn ɛTaanggbey ya kɛ yɛɛs ɛ nang njwɛɛn ishweng, te njwɛɛn seng ɛTaanggbey yegha ne ɛ so itin de. Njwɛɛn ne bok ìtsɛm ne ɛTaanggbey ya ne ɛ so ɛhaa ne itin na, daa ɛli ne njwɛɛn i bok ìtsɛm bɛ ne ɛNgɔn ɛbhɛ ɛYɛso ɛKiriti gha. ɛYɛso gha ɛbhɛ ɛ soye ɛTaanggbey ne itin na, ɛbhɛ soye iken ne inat de.

²¹Ninɔn nge, nzi bok nyini, shɛɛ ɛn kyaam nɛ nikɔn ne hame nibhɛ soye ɛTaanggbey ne itin na.