Read eten 2 ɛYohana 1 Bible Online

2 ɛYohana 1 - eten bible

2 ɛYohana 1

¹ɛWee yɛwoo le ɛlɔ ɛndiinday ɛYohana, ɛbhɛ phɛɛs ɛlɔ ɛgyinɛ ne ijwee ne ɛTaanggbey kɛ kasa gbik nɛ ninɔn ɛbhɛ[1] ninaa ne nzi sim gbom. Sɔng mee zɔng nzi sim nibhɛ wo nang, gbik nɛ ninyi na nɛ nibhɛ ma yɛɛ itin ne bol ɛTaanggbey de.

²Njwii sim nyini wo daa ɛli ne itin ne ibol so ndɔ mos, iphɛ yaa ne ku i shɛɛ ndɔ mos so ishwɛɛ ne inat.

³Te izɛɛng, ne san iyɔm gbik ne irway ne laal ɛTaanggbey ne ɛ soye ɛTaa gbik ne ɛYɛso ɛKiriti ne ɛ so ɛngɔn ɛTaa gha shɛɛ ne njwɛɛn, ndɔ ne itin gbik ne ishwim.

⁴iPhɛ kɛ nang me irway ihwala gbom ne nggɛ yaang nidɛng ninɔn mo na i hyel ndɔ ne itin de, ɛli ne ɛTaa gha kɛ ku yɛk njwɛɛn nɛ wo.

⁵ɛLyilyɛghaa wo ɛgyinɛ ne ijwee, nzi roro ne igyɛ, te ɛrɔngɔ sim ɛrɔngɔ. Sɔng ibol iphas ne nzi haa yɛnɛ nang, ibol yang ku so idee ne njwɛɛn kɛ ku phok ne ile de.[2]

⁶iShwim ba so ɛlɛ: te njwɛɛn i roos ikpii ɛTaanggbey da. iKpii da ne ˆɛ kaa ku phok ɛn ne ile de ifɛ ifɛ i bo wu te njwɛɛn hyel ndɔ ne ishwim ba.

⁷Nidɛng ninaa ne wul irywɛɛk ka, nɛ nibhɛ i bo wu hang ɛYɛso ɛKiriti gha kɛ yɛɛs ɛzay ndɔ ne ibek ɛten ɛsii de, kɛ ne shwalat ndɔ ɛzay ya ɛlyilyɛghaa wo. iHywee ninyi yɛdee nggyɛ wo nɛ nibhɛ luk ninyi na soye ninaa ne iphup ɛKiriti na.

⁸Wɛɛ ɛn nyini yɛnɛng ɛlɔ ne ˆɛ sɛ yung wɔs ɛn ilong ɛtomɛ mɔn de, te yang bhɛ tal nyini ilong mon de hyɔrɔ.

⁹Gbik ɛnyi gha ne ɛ kɛ sang kyinak daa ne imɛmɛ ɛKiriti da, ɛ ta hante ne ɛkɔn ne ɛdak kɛwo, sɔng ne ɛ bok ɛTaanggbey ye nang. Gbik ɛnyi gha ne ɛ kɛ ne kyinak daa ne imɛmɛ ɛKiriti da, ne ɛ bok ɛTaa yegha gbik ne ɛNgɔn na.

¹⁰Wu ɛdɛ ɛnyi gha kɛ ne yɛɛs ɛ mɛmɛ nyini ne idɛ imɛmɛ da kang ne imɛmɛ yɛdaa wo, sɔng ne ˆɛ say ɛn ɛbhɛ nang, sɔng ˆɛ ma yung kyili ɛn ɛbhɛ nang.

¹¹Wu ɛdɛ ɛnyi gha kɛ ne jung say ɛnyi yɛghaa nggyɛ wo, ɛ kɛ ne byinki ito ne ɛbhɛ ndɔ ɛtomɛ ɛbebhe ɛbhɛ gha.

¹²N bok nikɔn na gbom ne nzɛɛ haa yɛnɛ, sɔng nzi ne sim na mɔn ɛtomɛ ne ɛwee gbik ne ngkyi n haa yɛnɛ nang. Nzi yang sim te nzɛɛ yɛɛs, n yaang ngɛ ɛyisɛ ne ɛyisɛ te irway ihwala mos da te hyɔrɔ.

¹³Ninɔn ɛgwaa mo ɛkuk ka ne ɛTaanggbey ya kɛ kasa ɛbhɛ[3] wo i kyiisi yɛ.