Read eten 3 ɛYohana 1 Bible Online

3 ɛYohana 1 - eten bible

3 ɛYohana 1

¹ɛWee yɛwoo wo le ɛlɔ ɛndiinday ɛYohana, ɛbhɛ phɛɛs ɛlɔ ɛtaay nge ɛGayus se nɛ ɛhaa ne nzi sim ɛbhɛ nɛ ne itin nɛ.[1]

²iGyɛ ɛgwaa nge ne nzi sim, nzi bol ne ɛTaanggbey wu te ˆɛ shɛɛ ishwɛɛ ncaang daa nikɔn na gbik, ne ncenceng ne ibek ɛli ne nzi yɛɛ ˆɛ so ncaang ndɔ ne ikabyik ge.

³iPhɛ kɛ nang me irway ihwala gbom, nten de nɛ nidɛng nigwaa na kɛ yɛɛs nibhɛ tɔng me ɛli ne ˆɛ so sɛ kyinak daa ibol mo de ne ibol ne itin de, nibhɛ ta tɔng me ɛli ne ˆɛ hyel ndɔ ne itin de.

⁴Sɔng ɛdɛ ɛkɔn na i nang me irway ihwala da kang ɛli ne i sɛ nggɛ phok wu ninɔn nge na i hyel ndɔ ne itin de nang.

⁵ɛGwaa nge ne nzi sim, ˆɛ so sɛ kyinak daa ne ibol mo daa ɛtomɛ gha ne ˆɛ mɔn ndɔ nigwaa ninaa ne roos sa, gbik ɛli nɛ nibhɛ jung soye ninaa ne ikpoo na ɛlɔ mo gha.

⁶Ninyi yɛnaa nggyɛ wo ne ˆɛ kɛ phyik nibhɛ wo i naas ishɛɛda ne ishwim mo da ndɔ ne idira ninaa ne roos de. Re ɛnu ɛyisɛ ne phyighis nibhɛ ndɔ ne ihywel nibhɛ da ɛli ne iphɛ yaa nang ɛTaanggbey yegha irway ihwala.

⁷Ninyi yɛnaa nggyɛ wo i wuusi tɛ nibhɛ bhɛ tɔng ibol ne irywɛɛk ɛKiriti de, sɔng nibhɛ i ne say ɛkɔn ɛlɔ ninaa nɛ nibhɛ sang so ninaa ne roos sa nang.

⁸iPhɛ ɛlɛy, iphɛ kɛ ne jam mɛ njwɛɛn phyik ihywee ninyi yɛnaa nggyɛ wo te njwɛɛn teye nitaay ɛtomɛ na ndɔ ne itin.

⁹Nggɛ haa ninaa ne idira ne ninaa ne roos de ɛwee, gbik ne iphɛ ɛlɛy ɛDiyɔtirifɛs sa kɛ ne mbaray tang wɛɛ ɛwee yɛ te ɛkɔn daa ɛli ne ɛ tɔk ghe ndiinday.

¹⁰iPhɛ ɛlɛy, sɛ ne sɛ nggɛ yɛɛs, nzɛ ne phaal ɛbhɛ wɛsɛrɛk daa nikɔn na ne ɛ mɔn no. iVol ivebhe da ne ɛ kɛ bol daa ne ito mos de gbik ne irywɛɛk ga ne ɛ tɔng ngo! ɛKɔn ne ɛ so kpɛɛ ɛ shɛs so iphɛ so ɛ mbaray tang say nigwaa ninaa ne roos sa ne i sɛ nibhɛ kɛ yɛɛs ɛlɔ ɛbhɛ, ɛ ta i ring ninaa nɛ nibhɛ i sim tɛ nibhɛ yaa say nigwaa na, ɛ tuul ninaa nɛ nibhɛ sim tɛ nibhɛ yaa say nigwaa na ndɔ ne idira ninaa ne roos de.

¹¹iGyɛ ɛgwaa nge ne nzi sim, sɔng ˆɛ roos ibebhe de nang, yang roos iyɛnɛng. Gbik ɛnyi gha ne ɛ mɔn ɛkɔn ɛyɛnɛng nga ɛ soye ɛhaa ɛTaanggbey, ɛnyi gha ne ɛ ne mɔn ibebhe de nang, sɔng ɛ yɛɛ ɛTaanggbey yegha nang.

¹²ɛDɛmɛtiriyus sa ne bok ishɛɛda iyɛnɛng ɛlɔ ninyi na gbik. iTin de ne ito ne iphɛ kɛ ma nang ishɛɛda ɛbhɛ. Njwit to njwii ne ma naas ishɛɛda ɛbhɛ de, ˆɛ ne ma ku yɛɛ ɛn wu ishɛɛda mos de so itin nɛ.

¹³N bok nikɔn na gbom ne nzi sim naa haa yɛnɛ wo, sɔng nzi ne sim te naa mɔn ɛtomɛ ne ɛwee gbik ne ngkyi nang.

¹⁴Nggɛ yɛk ne irway yɛnaa yunga yaang ngɛ, njwi sɛ ne yaang en ɛyisɛ ne ɛyisɛ njwi bol.

¹⁵Te irway ne laal ɛTaanggbey shɛɛ ne igyɛ. Nitaay mos sa gbik i kyiisi yɛ. Kyili nitaay mos sa nɛ nibhɛ so ɛnggyɛ wo, kyili ɛrɔngɔ ne irywɛɛk ɛbhɛ.