Read eten ɛYahuza 1 Bible Online

ɛYahuza 1 - eten bible

ɛYahuza 1

¹ɛWee yɛwoo wo le ɛlɔ ɛYahuza ne ɛ so ɛkpuru ɛYɛso ɛKiriti, ɛ ta so ɛgwaa ɛYakub. Ɛbhɛ phɛɛs ɛlɔ ninyi na ne ɛTaanggbey kɛ yel-le, nɛ nibhɛ shɛɛ ndɔ ne ishwim ɛTaanggbey ne ɛ so ɛTaa, ninaa ne ɛYɛso i hyep nibhɛ.

²Te ɛTaanggbey nang nyini irway ne san iyɔm, ne irway ne laal gbik ne ishwim gbom.

³Nigwaa nge ne nzi sim, nggɛ ku bok icwas ne haa nyini nɛ daa ne ibol ne iphɔrɔt njwɛɛn de, ne nggyi yaang iphɛ kɛ jam mɛ nzɛ kyii haal nyini nɛ te n te nyini itsɔngɔl gɛgɛy ɛli ne ˆaa kyinak ɛn daa ne imɛmɛ ne itin ɛYɛso de ne ɛTaanggbey ya kɛ nang ninaa ne roos ɛbhɛ na ɛdaan na zɔng ngo.

⁴Daa ɛli nɛ nidɛng ninyi na sonɛ nɛ nibhɛ kɛ lel ndɔ mon no gying. Sɔng nibhɛ so ɛli ne ɛTaanggbey ya i sim mo nang. Nibhɛ kɛ misi izɛɛng ɛTaanggbey de iphɛ teye ɛnkiinɛ ne roos ihyop igywebhe ne ibek, nibhɛ ishamas ɛYɛso ɛKiriti yegha ne ɛbhɛ ɛ soye ɛndiinday ya gbik ne ɛDaray njwɛɛn na. Kaa ne ku haa ibol ne hyɛ nibhɛ ɛshara ne iku gha ndɔ ne ɛWee ne iBol ɛTaanggbey yo ne ile.

⁵Nzi yɛɛ ɛ ku yɛɛ ɛn ibol lɛdee wo, nzi ne sim na ne taate nyini nɛ wu ɛTaanggbey ya kaa phɔt ninyi ɛbhɛ na ne ivel ne iMasad da, ne ɛ kyii mɔɔng ɛ bunga ninaa nɛ nibhɛ sang nang ne itin nɛ wo.[1]

⁶Ne ˆɛ taate ɛn nɛ nimalɛka na nɛ ninaa nibhɛ kaa tek ɛlɔ ne igbɔm nibhɛ na, nibhɛ ta tek ijwee ne itin nibhɛ wo nibhɛ shompeey yo. Nimalɛka yɛnaa wo, ɛDaray ya kɛ ne bhɛ robhos nibhɛ ndɔ ne nyang ɛlɔ gbyik nibhɛ hyep ɛgbaang ɛtuk ne hyɛ ɛshara gha.

⁷Ne ˆɛ taate ɛn ne iSɔdɔm ne iGomora wo gbik ne ɛbyin nigarang nga nɛ nibhɛ so cɛcɛk nɛ nibhɛ wo. Ninyi nilɔ yɛnaa nggyɛ wo kaa ma ra nzangas de, nibhɛ roos ihyop ne ibek ge ne hame iphɛ so cɛcɛɛy ɛli ne ɛTaanggbey kɛ ryɔng ngo, ɛTaanggbey ya na bak nibhɛ nggbang ne inat te iphɛ teye ɛkɔn ne njwɛɛn yaa mɛmɛ nɛ.[2]

⁸Ɛlɛy nɛ ninaa ne mɔn ibebhe na ne bo wu kɛ tɔɔl en ndɔ nibok, nibhɛ ne jii bees ibek nibhɛ, nibhɛ mbaray tang roos ibol ne igbɔm, nibhɛ ta i bol ivol ne bɛɛs daa nikɔn niken ɛdaa ne irywa ne kɛ tul kang.

⁹Yung yaang ɛn ɛndiinday nimalɛka gha ne kaa bok ɛbhɛ ɛMakyɛl la, kaa sɛ ɛli nɛ nibhɛ sin en ne ikom ɛMuusaa de ne ɛShɛtan na, sɔng ɛMakyɛl la kaa hyɛ ne ɛShɛtan negha ɛshara ɛ boote ne ɛbhɛ ibol ne bɛɛs nang, ɛ kaa yang yaak ɛbhɛ, “Te ɛDaray sit tɛ ne ɛbung!”[3]

¹⁰Gbik ne iphɛ ɛlɛy, ninyi yɛnaa nggyɛ wo i ne bol ivol ne towos daa nikɔn na nɛ nibhɛ sang yɛɛ, nibhɛ mɔn nikɔn na tang icwas te ᐩinyam ɛhay ne ᐩihywɛ sang icwas, nikɔn nɛnaa nggyɛ wo bhɛ sɛ ne bunga nibhɛ.

¹¹iPhɛ so nibhɛ ɛkɔn ne ɛnik! Nibhɛ kɛ hyel ihywel ɛKɛɛnu. iRisɛ ne ijam kɛ te nibhɛ mɔn ɛkɔn na ne ɛBalamu kaa mɔn.[4] Nibhɛ bɛɛs nindiinday ɛli ne ɛKɔɔra kaa mɔn, ne bunga nibhɛ gbik te ɛKɔɔra gha.

¹²Ninyi yɛnaa nggyɛ wo ne soye ishis ndɔ ìtsɛm mon de, nibhɛ i re nibhɛ i sɔ tang ncwa. Nibhɛ so tɛ ninaa ne hyep ᐩigyol nɛ nibhɛ sal itso nibhɛ zɔng, nibhɛ so te inɔp ne iphɛ i tumɛy igbil kyii te iphɛ shwaa, sɔng inɛn nɛ kyii reey nang. Nibhɛ so tɛ nihon ne ilwing ngɛ kɛ howoso en nibhɛ kus tang yɛk ikpam.

¹³Nibhɛ sos te igbugbung inɛn, nikɔn ncwa nibhɛ na ne so te ifurum mɛ ne ifɛ i phele ifɛ kyi ifɛ phu, ifɛ birit. Nibhɛ so tɛ niyuyɔrɔ nɛ nibhɛ kaan shwaa, ninaa ne kɛ ku tul ɛlɔ gbyighilik ne inat kang i tek nibhɛ nɛ.

¹⁴ɛNɔk ka ne ɛ so ɛhaa ne izam ɛniitaa yɛ lenɛ ne ɛDɛmu ma, kaa ne ma ku boote daa ninyi yɛnaa wo ɛ yɔngɔ, “Yaang ɛn ɛDaray ya yaaso nɛ nimalɛka ɛbhɛ ne kɛ tul kang nɛ nibhɛ kɛ hɔn ninom ma daa ɛco ninom ne ᐩishin daa ɛco ne ᐩishin,

¹⁵te ɛ hyɛ ninyi na ɛshara gbik. Ɛ sɛ ne tɔɔrek ninyi na nɛ nibhɛ sang i shɛɛ ihywee ne ishwɛɛ ɛTaanggbey da nitomɛ nibhɛ na nɛ nibhɛ sang soye ninaa ɛTaanggbey ya. Ɛ sɛ ne phaasel gbik ivol ivebhe da nɛ ninaa ne ɛfɔt ta nɛ nibhɛ sang i shɛɛ ihywee ne ishwɛɛ ɛTaanggbey da kɛ bol daa ne ito ɛbhɛ de.”

¹⁶Ninyi yɛnaa nggyɛ wo i bol ivol mumuk, nibhɛ tɔk iben nidɛng. Nibhɛ roos ihyop igywebhe nibhɛ nɛ. Nibhɛ hal ɛgyɛy ne itso nibhɛ, nibhɛ bok ilem ibel tɛ nibhɛ sɛ ito nibhɛ ɛkɔn.

¹⁷Nyinɛn nigwaa en ne nzi sim, ne ˆɛ taate ɛn ne ɛkɔn na nɛ ninɔn ne tom ɛDaray njwɛɛn ɛYɛso ɛKiriti gha kaa ku tɔng wu ɛ sɛ te wo.

¹⁸Nibhɛ kaa yaak nyini, “Sɛ́ sɛ nten ɛtsim be kɛ tuu, nidɛng ninaa ne bɛɛs sa sɛ ne wuru nɛ, nibhɛ sɛ roos ihyop ne ibek nibhɛ nɛ ne hame ihywɛ so izee ne roos ɛTaanggbey ye.”[5]

¹⁹Ninyi yɛnaa nggyɛ wo ne soye ninaa ne yɛɛs ne hosop nɛ ninaa ne roos ihyop ne ibek ngɛ. Sɔng nibhɛ bok ikabyik ɛTaanggbey de nang.

²⁰Nyinɛn no nigwaa nge ne nzi sim, te ɛrɔngɔ ne phyik ɛrɔngɔ te ˆɛ lɔl ɛn itso mon daa ne ɛtum ne ìnang ne itin mon de ne kɛ tul kang i shɛs so. Bol ɛn ne ɛTaanggbey ya ndɔ ne ihwet ne iKabyik ɛbhɛ de.

²¹Shɛɛ ɛn ndɔ ne seng wu ɛTaanggbey ya i sim nyini, nten de ne ˆɛ hyep ɛn isan iyɔm ɛDaray njwɛɛn ɛYɛso ɛKiriti de ne iphɛ yaa phɛ ne nyini ne iken ne inat de.

²²Nɛ i san ɛn iyɔm ninaa ne to irway da.

²³Phɔt ɛn ɛbyin nɛ te ˆɛ kɛ tul ɛn nibhɛ ndɔ ne igboo. Te ˆɛ san ɛn iyɔm ɛbyin nɛ ndɔ ne ɛnik ɛTaanggbey, ˆɛ phok ɛn ishis ne itsura nibhɛ da nɛ nibhɛ kɛ bees ne ihyop ne ibek nibhɛ de.

²⁴Te ne dɛp ɛTaanggbey yegha ne ɛbhɛ ɛ bok ihwet ne aa phyik njwɛɛn ɛlɔ ne njwɛɛn yaa yung ho wo, ɛ yɛɛs ne njwɛɛn ɛlɔ ɛbhɛ gha, wɛlɛng ɛkɔn ne tok ka, ɛnu ɛyisɛ ne ito-ndiinday ɛbhɛ de ne irway ihwala da gbom mo.

²⁵Te ne dɛp ɛTaanggbey yegha ne ɛbhɛ ɛ soye ɛTaanggbey ya zɔng lenɛ ne ɛDaray njwɛɛn ɛYɛso ɛKiriti ɛhaa ne phɔt njwɛɛn. Te ndiinday, ne igbom, ne ito, ne igbɔm teye ivaa ɛbhɛ, lenɛ ne ɛtum ɛzay yo, ne ɛlyilyɛghaa, gbik ne ishay-ishay! Ɛɛy.