Read eten Nikɔn ne kɛ Phaal 11 Bible Online

Nikɔn ne kɛ Phaal 11 - eten bible

Nikɔn ne kɛ Phaal 11

¹Ne nang me ɛntsɛng ne ɛbhɛ so te ihon ne tɛrɛk ɛlɔ, ne yaak me; “Cwi te ɛbhɛ tɛrɛk ideng ɛTaanggbey de gbik ne ɛraa ne hap itsanga gha. Ɛ tɔng ninyi na nɛ nibhɛ re ntsong ngga nɛ ne ndɔ yɛwo.[58]

²Sɔng ne ɛ ma ta tɛrɛk ɛsaa ne ideng ngge nang. ɛSaa ne ideng nga ne ɛ so ne izay yo, daa ɛli ne kɛ nang ninyi ne hame nibhɛ yɛɛ ɛTaanggbey ye. Nibhɛ yaa baasek ɛgarang ɛTaanggbey ya ne ɛ kɛ tul kang ngo nggbang iphɛl nzuwubɔ nwaas ne iphɛ ifaa.[59]

³Naa ne tom nishɛɛda nge ifaa ndɔ ne itsura ne ishwin. Ne nang nibhɛ ito ne tɔng ninyi na ibol ɛTaanggbey de nituk ɛnom ɛdaan ne ikpɔl ifaa ne nzuwubɔ ɛtaraa (1,260).”

⁴Ninyi ifaa yɛnaa nggyɛ wo ne so tɛ Niphaa ifaa na ne ihon ne te ɛpitila wo shak ko nɛ nibhɛ so ɛnu ɛyisɛ ɛDaray ɛzay ya.[60]

⁵Wu ɛnyi i ne sim te aa phok nibhɛ ikpom, igboo yaa ne wuru ndɔ ɛnu nibhɛ ifɛ re ɛbhɛ. Wu ɛnyi i ne sim te aa phok nibhɛ ikpom, ɛlɛ wo ne yaa ne i mɔn i phobho nibhɛ.

⁶Ninyi yɛnaa nggyɛ wo bok ito ne rop irywa inɛn shɛɛ tang reey nten de nɛ nibhɛ tɔng ibol ɛTaanggbey. Nibhɛ bok ito ne hyere inɛn da mpɛ teye neyi, nibhɛ bok ito ne yɛk ngɛ isha hywee-hywee lel ɛzay ya ɛli nɛ nibhɛ i sim.[61]

⁷Sɛ́ ne sɛ ninyi ifaa yɛnaa nggyɛ wo kɛ taal tɔng ibol ɛTaanggbey de, inyam igywebhe de ne ihywɛ wuusi ndɔ ne ibong kyukyum be ne tum irywen nɛ nibhɛ, ihywɛ ne re nibhɛ ne itsom be, ihywɛ phobho nibhɛ.[62]

⁸Sɛ ne tek ikpom nibhɛ da ne ɛnkiinɛ ɛgbaang ɛgarang ngo ne kaa ma gangat ɛndiinday nibhɛ gha nɛ wo. I ten ɛgbaang ɛgarang ngɛwoo nggyɛ wo ne iSɔdɔm, ne iMasad.[63]

⁹iKpom nibhɛ da sɛ ne shɛɛ nituk itwat ne ngguk, ihywee ɛzay de, itaang ɛzay de, ne ilwem ɛzay da gbik ne igbagha ɛzay yo i wɛɛ ifɛ, nibhɛ ring ne rɛrɛs ifɛ.

¹⁰Ninyi ɛzay ya gbik sɛ ne bok irway ihwala ɛlɔ nɛ ninyi ifaa yɛnaa nggyɛ wo kɛ kus so. Nibhɛ sɛ ne yel isham, nibhɛ naas en ire, daa ɛli nɛ nishɛɛda ifaa yɛnaa nggyɛ wo kɛ baasek ninyi ɛzay ya nggbang gbom.

¹¹Ne sɛ ɛtsim nituk itwat ta da ne ngguk ge, ifɔng ne le daa ɛlɔ ɛTaanggbey ifɛ lel nibhɛ, nibhɛ ne yiisitsik. ɛNik ne wum ninyi na nɛ nibhɛ kɛ yaang ikpom nishɛɛda ifaa da, nibhɛ ne yaa kparat.[64]

¹²niShɛɛda ifaa yɛnaa nggyɛ wo ne ji phok idɛ izɔlɔs de ihywɛ le daa ne irywa, ihywɛ bok nibhɛ, “Wara ɛn nyini te ɛ yɛɛs ɛn ɛbɛ!” iPhɛ ɛlɛy, nishɛɛda ifaa na ne roos inɔp nibhɛ wara en daa ne irywa wo, ninaa ne iphup nibhɛ na ne sit nibhɛ ne irwisɛ nibhɛ wɛɛ nibhɛ.[65]

¹³Nten nɛdee nggyɛ wo, ɛzay ya ne kyangkey ɛ sungket, ihop idaan ndɔ ihop ɛnduwubɔ ɛgarang nga ne bungaay. Ninyi na ninom ɛniitaa ne kus ɛlɔ ne ɛzay ya kɛ kyangkey ɛ sungket to. Ninyi na nɛ nibhɛ kɛ shɛɛ niken na ne yaa kparat, nibhɛ naas ɛTaanggbey ɛdaa ne irywa ye ne ndiinday.[66]

¹⁴ɛKɔn ne ɛnik ne ifaa da kɛ phee, iphɛ dee ɛhaa ne itwat tɛ ne yek cɛcɛk.

¹⁵ɛMalɛka ɛniitaa yɛ ne wuuti ɛntuntuung ɛbhɛ wo, ne n phok idɛ ᐩizɔlɔs nziinzay ihywɛ le daa ne irywa ihywɛ bo, “iGbɔm ɛzay da gbik kɛ teye ivaa ɛDaray mos ne ivaa ɛKiriti ɛbhɛ, ɛbhɛ ne ɛ so ɛhaa ne re igbɔm ne ishay-ishay!”

¹⁶Ninu nikɔɔn nzuwubɔ ifaa nɛ nibhɛ nwaas sa nɛ nibhɛ kɛ sooset nicuruu ne igbɔm nibhɛ na ɛnu ɛyisɛ ɛTaanggbey ya ne hoghɛse gup nibhɛ re ɛTaanggbey yegha ntsong,

¹⁷nibhɛ bo, “Njwi bok irway ihwala ne igyɛ, ɛDaray ɛTaanggbey ne iTo Gbik. ɛHaa ne ɛ sonɛ, ɛ kaa ne ku sonɛ, ˆɛ kɛ tɔɔrek ihwet mo gbom, ˆɛ kɛ tsa re igbɔm ba.

¹⁸Ninaa ne doo ɛTaanggbey yegha kaa tes njenjek, nten ne njenjek mo de kɛ ne tuu. Nten ne bol ninaa ne ikpuu na ɛshara gha. Nten ne mɔn ninyi iyɛnɛng nikpuru mo ninabawa, ninyi mo ninaa ne tel ɛnik mo, nihala ne igbaang ngɛ gbik. Nten nɛ kɛ tuu ne yaa bunga ninyi na nɛ nibhɛ kaa ma bunga ɛzay ya.”

¹⁹Ne ji phaal ideng ɛTaanggbey de daa ne irywa wo, ne yaang ɛKwaati ne ìtsɛm mo ne ndɔ yɛ. ɛLɔ gha ne yaa tes derep, ɛɛ wunga, ɛɛ tɛɛ, ɛzay ya sungket, igbaang ne nkpaaling ne i hoghɛ.[67]