Read eten Nikɔn ne kɛ Phaal 12 Bible Online

Nikɔn ne kɛ Phaal 12 - eten bible

Nikɔn ne kɛ Phaal 12

¹Ne yaang nyu ɛdɛ gbaang ɛkɔn ne kparat ta daa ne irywa wo, ɛkuk ne ɛ kɛ cwaal le ne iroy te ɛzene, ifɛl so ne itiita ɛbhɛ, ɛkɔn ne ito ne igbɔm ne ɛ bok niyuyɔrɔ ɛnduwubɔ nɛ nibhɛ ifaa so daa ito ɛbhɛ.

²ɛKuk kɛ bok isik, ɛ san ɛlɔ ne ɛngɔn na i rɔ ne aa wuru.

³Ne ta yaang ɛdɛ ɛkɔn ne kparat ta daa ne irywa wo; ɛgbaang ne izɔ igywebhe isheng ngɛ. iHywɛ bok itso ɛniitaa, ne igbumɛ ɛnduwubɔ gbik nɛ nikɔn ne ito ne igbɔm ɛniitaa ne itso da.[68]

⁴iHywɛ ne bo ihwel ihywɛ yese ne ihop idaan ndɔ ne iphɛ itwat niyuyɔrɔ de ihywɛ sit ne ivel. ɛGbaang ne izɔ igywebhe de ne ji kyinak ɛnu ɛyisɛ ɛkuk ka ne aa yɛk ko te yaa sɛ ɛngɔn na wuusi ihywɛ wum ɛbhɛ ihywɛ reke.[69]

⁵ɛKuk ka ne yɛk ɛngɔn ɛbhɛ gha ɛras sɛ, ne ɛbhɛ sɛ re igbɔm ne igbagha ɛzay yo gbik. iGbɔm ɛbhɛ da sɛ ne bok ihwet te ɛntsɛng ne igyɔs. Ne shii bo ɛngɔn na i tel lɛ, i phɛ ne ɛbhɛ ɛlɔ ɛTaanggbey, i bhɛ tek ɛbhɛ dak ɛcuruu ne igbɔm ɛbhɛ.[70]

⁶ɛKuk ka ne ji tel ɛ phɛ ndɔ ɛhay ɛlɔ gha ne ɛTaanggbey ya kɛ ku ryɔng ɛbhɛ nɛ aa bhɛ shɛɛ nɛ i mɛɛ ɛbhɛ nituk ɛnom ɛdaan ne ikpɔl ifaa ne nzuwubɔ ɛtaraa (1,260).

⁷Ne yaa ta itsom daa ne irywa wo. ɛMakyɛl la nɛ nimalɛka ɛbhɛ i ta itsom be ne ɛgbaang ne izɔ wo, ɛgbaang ne izɔ wo nɛ nimalɛka ɛbhɛ na ne maa ta itsom be ne ɛMakyɛl la.[71]

⁸Ne re ɛgbaang ne izɔ wo ne itsom be, i phɔt ɛlɔ ɛbhɛ nɛ nimalɛka ɛbhɛ na daa ne irywa wo.

⁹Ne top ɛgbaang ne izɔ igywebhe de ndɔ ne ivel. iZɔ ne ile yɛdee nggyɛ wo ne i yeres ihywɛ ɛPhoo gha, ne ɛShɛtan na. Ɛbhɛ ɛɛ luk ninyi ɛzay ya gbik. Kaa top ɛbhɛ nɛ nimalɛka ɛbhɛ na ndɔ ɛzay ya.[72]

¹⁰Ne n ji phok ɛgbaang ne izɔlɔs daa ne irywa wo, ihywɛ bo, “Nten nɛdee wo ne iphɔrɔt ɛTaanggbey njwɛɛn da, ne ito ɛbhɛ de ne igbɔm ɛbhɛ, ne ito ɛKiriti ɛbhɛ de kɛ shwaak ghe. Daa ɛli ne kɛ top ɛhaa ne banga ikun na, ikun nigwaa njwɛɛn na ndɔ ɛzay ya. Ɛbhɛ ɛ banga ikun nigwaa njwɛɛn de ɛnu ɛyisɛ ɛTaanggbey njwɛɛn na, ne igbey ne ɛtuk gbik.[73]

¹¹Nibhɛ kɛ re ɛwɛng nga ne ɛhaa ne banga ikun njwɛɛn na, lenɛ nɛ neyi ɛNgɔn ne ɛpharak ka, gbik ne ishɛɛda nɛ nibhɛ kɛ nang. Gbik ɛli ne kɛ tɔk te yaa phoo nibhɛ wo, nibhɛ ne jung nang iken nibhɛ, kɛ sim nibhɛ ku.

¹²iPhɛ ɛlɛy, igyɛ ne irywa nɛ ninaa ɛdak kɛ gbik ne ɛ yɛk ɛn irway ihwala! iGyɛ ne ɛzay yo ne ɛling nga, ɛ so ɛn ɛKɔn ne ɛnik! Daa ɛli ne ɛPhoo yɛghaa wo kɛ tɔm ndɔ ɛlɔ mon na ne njenjek gbom, daa ɛli ne ɛ ku yɛɛ nten ɛbhɛ de kɛ mak ncɛt.”

¹³Ne sɛ ɛgbaang ne izɔ igywebhe wo kɛ seng wu kɛ top ɛbhɛ ndɔ ɛzay ya, ne ɛ yaa tel ɛ roos ɛkuk ka ne ɛ kɛ yɛk ɛngɔn ɛras sa.

¹⁴Ne shii nang ɛkuk ka ivaat ne ɛgbaang ne ika te ɛ yeret nɛ, ɛ phɛ ndɔ ɛhay ɛlɔ gha ne kɛ ku ryɔng ɛbhɛ nɛ ɛli ne hame ɛgbaang ne izɔ wo yaa sɛ ɛbhɛ. ɛNggyɛ wo, aa bhɛ shɛɛ nɛ, i bo nten, daa ɛco nten, ne ngguk ne nten i mɛɛ ɛbhɛ.[74]

¹⁵ɛGbaang ne izɔ wo ne phaal ɛnu, ɛyuus inɛn ne wuru nɛ te ihywel wu te mpɛ bhɛ kpuru ɛkuk ka.

¹⁶iVel ne phyik ɛkuk ka. iFɛ ku shii bala ɛnu ifɛ wɔl ɛyuus inɛn na ne ɛ kɛ wuru ɛnu ne izɔ gha.

¹⁷ɛGbaang ne izɔ wo ne te njenjek ne ɛkuk ka, ne ɛ ji phɛ ɛ yaa bhɛ ta itsom ne ɛbyin ne ihywee ɛkuk ge, nɛ ninaa nɛ nibhɛ roos ikpii ɛTaanggbey da nɛ ninaa nɛ nibhɛ kɛ kyinak gɛy ndɔ ne ishɛɛda de nɛ nibhɛ kɛ nang ne ibol ɛYɛso de.

¹⁸ɛGbaang ne izɔ wo ne ji kyinak ne imumu ɛnu ɛling.