Read eten Nikɔn ne kɛ Phaal 14 Bible Online

Nikɔn ne kɛ Phaal 14 - eten bible

Nikɔn ne kɛ Phaal 14

¹Ne nyɛɛn ne n yaang ɛNgɔn ne Pharak kɛ kyinak daa ne ɛWarang ne iSihiyɔɔna, nɛ ninyi na ninom ikɔl idaan ne nzuwubɔ nwaas nɛ nibhɛ nwaas, (144,000) na ne kɛ haa irywɛɛk ɛbhɛ ne ihoo ɛKyɛɛ ɛbhɛ wo ne icwiri nibhɛ da.[81]

²Ne n phok izok i le daa ne irywa te izok inɛn ne ivovoo, ne izok ɛlɔ ne wunga. iZok ge ne nggɛ phok ko ne so te izok ne ᐩnzom ɛkyee nɛ ninyi i rom.

³Nibhɛ ne i yaak ne idɛ iywel lo ifas sɛ ɛnu ɛyisɛ ɛcuruu ne igbɔm ma nɛ nikɔn niken nwaas sa gbik nɛ ninu nikɔɔn na. Sɔng ɛnyi i ne yɛɛ ne mɛmɛ ne iywel lɛwoo nggyɛ wo kang nɛ ninyi ninom ikɔl ne nzuwubɔ nwaas nɛ nibhɛ nwaas (144,000) sa nang. Ninyi na ne kɛ ku say nibhɛ ndɔ ninaa ɛzay ya.

⁴Ninyi yɛnaa nggyɛ wo ne hame nibhɛ kɛ ku bees ito nibhɛ ne tɔk nikuk, nibhɛ tɔ jejeb, nibhɛ kɛ ne roos ɛNgɔn ne Pharak ka gbik ɛlɔ gha ne ɛ phɛɛs. Kɛ say nibhɛ ndɔ ninyi na. Nibhɛ bhɛ ne soye te ire ɛyisɛ yɛ ne kɛ hap ɛTaanggbey ye ne ɛNgɔn ne pharak ka ne itsanga.

⁵Sɔng kɛ ku phok irywɛɛk ɛnu nibhɛ nang, daa ɛli ne hame nibhɛ bok ɛkɔn ne tok.[82]

⁶Ne n da yaang ɛdɛ ɛmalɛka gha dɔng, ɛɛ tel ɛceree ne irywa ne ivel, ɛ bok iBol iYɛnɛng ne inat ne aa tɔng ninaa ɛzay ya. Aa tɔng igbagha ɛzay yo, ne itaang ɛzay de, ilwem ɛzay da, ne ihywee ɛzay de gbik.

⁷Ne ɛ boote ne ɛgbaang ne izɔlɔs, ɛ yɔngɔ, “Phok ɛn ɛnik ɛTaanggbey yo, te ɛ nang ɛn ɛbhɛ ne ndiinday, daa ɛli ne nten ne bol ɛshara ɛbhɛ de kɛ tuu. Re ɛn ɛbhɛ ntsong, ɛbhɛ wo ne ɛ kɛ ryɔng irywa wo, ne ɛzay ya, ne ɛling nga, ne irong inɛn da.”

⁸ɛMalɛka ne ifaa yɛ ne ma kungke ɛ yɔngɔ, “Ɛ kɛ ho! ɛGbaang ɛgarang ne iBabila[83] wo kɛ ho. ɛGarang nga ne ɛ kɛ shɔk ninyi na nibhɛ lel ne nzangas ne sɔ inɛn ɛnap nibhɛ da, inɛn ɛnap ba ne mpɛ yɛɛs ne iku de.”[84]

⁹ɛMalɛka ne itwat tɛ ne kungke nibhɛ. Ɛ boote ne ɛgbaang ne izɔlɔs ɛ yɔngɔ, “Gbik ɛnyi gha ne ɛ kɛ re inyam igywebhe de ntsong ngga, ɛ ta say ɛlamba ne ihywɛ gha ne itiri ɛbhɛ de hang ne iwɔ ɛbhɛ yɔɔ,

¹⁰ɛbhɛ ɛ sɛ́ ne sɔ inɛn ɛnap ne njenjek ɛTaanggbey da. iNɛn ɛnap ba ne kɛ ku ryɔng hyɔrɔ ne ihwet ndɔ ɛhyihyangas ne njenjek ɛTaanggbey ya. Sɛ́ ne baasek ɛbhɛ nggbang ndɔ ne igboo ne isɔlifa ne ifɛ bok ihwet ifɛ phyin igboo ɛtuu, ɛnu ɛyisɛ ne nimalɛka ɛTaanggbey ya ne ɛNgɔn ne Pharak ka.

¹¹Ngkoy ne igboo da ne i baasek nibhɛ ne nggbang ngga ne ku i waase daa ne irywa ishay-ishay. Ninyi na nɛ nibhɛ kɛ re inyam be ne izazurum ne ihywɛ da ntsong ngga, nibhɛ ta say ɛlamba ne irywɛɛk ne ihywɛ gha, sɔng iphyonka ne so nibhɛ nɛ nang, ne igbey ne ɛtuk.”[85]

¹²iBol lɛdee wo i sim irop iku ɛlɔ ninyi na ne kɛ tul kang ngo nibhɛ roos ibol ɛTaanggbey de. Ninyi na nɛ nibhɛ so sɛɛ say ibol nibhɛ ndɔ ìnang ne itin nibhɛ de ne ɛYɛso gha.

¹³Ne n phok idɛ izɔlɔs de le daa ne irywa ihywɛ bo, “Haal ɛbɛ, yaa tsa ɛlyilyɛghaa wo, ɛhaa ɛwɛng ngaa nggyɛ ne aa ku ɛ bok ìnang ne itin de ndɔ ɛDaray ya.” iKabyik ge ne i bo, “ɛTsak! Nibhɛ sɛ́ phɔng ndɔ ne nggbang nibhɛ da daa ɛli ne ɛtomɛ nibhɛ gha sɛ́ roos nibhɛ.”

¹⁴Ne nyɛɛn ne n yaang inɔp ihala ne ɛdɛ ɛnyi gha ne ɛ so te ɛNgɔn ɛNyi ɛ kɛ soos ne inɔp be. ɛKɔn ne ito ne igbɔm izinariya so ne ito ɛbhɛ, ɛluwujɛ ne ɛbhɛ re ne so ne iwɔ ɛbhɛ.[86]

¹⁵ɛDɛ ɛMalɛka gha ne wuru ndɔ ne ideng ngge ɛ yel-le ɛhaa ne ɛ kɛ soos ne inɔp be ne ɛgbaang ne izɔlɔs, ɛ yaak ɛbhɛ, “Bo ɛluwujɛ mo wo te ɛ pha ne ɛzay ya, nten ne pha ɛzay de kɛ tuu.”

¹⁶ɛHaa ne ɛ kɛ soos ne inɔp be ne bo ɛluwujɛ ɛbhɛ wo ɛ pha nɛ ninyi ɛzay ya.

¹⁷ɛDɛ ɛmalɛka gha ne ta wuru ndɔ ne ideng ngge daa ne irywa wo, ɛ ma bok ɛluwujɛ ne ɛbhɛ re gbom.

¹⁸ɛTsim mɛ ɛlɛy, ɛdɛ ɛmalɛka gha ne ɛbhɛ ɛ wɛɛ igboo ɛraa ne hap itsanga gha ne wuru ɛraa ne hap itsanga gha. Ne ɛ yel-le ne ɛhaa ne ɛ bok ɛluwujɛ wo ne ɛbhɛ re wo ne ɛgbaang ne izɔlɔs, ɛ yaak ɛbhɛ, “Bo ɛluwujɛ mo wo ne ɛbhɛ re wo te ɛ pha ne ikpam ne ɛnap ɛzay da, ikpam mɛ kɛ bel.”

¹⁹iPhɛ ɛlɛy, ɛmalɛka gha ne bo ɛluwujɛ ɛbhɛ wo ɛ pha ne ikpam ne ɛnap ba daa nihon nɛ, ɛ ji kpuru ɛbhɛ sit ɛlɔ ne pharak kɛ. ɛKɔn nɛghaa wo i tɔɔsel njenjek ɛTaanggbey.

²⁰Ne pharak ikpam ne ɛnap ba ɛlɔ ne pharak kɛ ne ɛ so ɛtsim ɛgarang. Ne sɛ i pharak ko, neyi ne i wuusi te inɛn ne ihywel ɛyuus sɛ ne tel ɛli ne iphɛ sɛɛ hɔn nihyay ikpɔl icwat (300). iKyukyum mɛ ne hɔn ɛli ne iphɛ sɛɛ dad ɛdet ne inantse.[87]