Read eten Nikɔn ne kɛ Phaal 15 Bible Online

Nikɔn ne kɛ Phaal 15 - eten bible

Nikɔn ne kɛ Phaal 15

¹ɛTsim mɛ ɛlɛy ne n da yaang inyu ɛdɛ ɛgbaang ɛkɔn ne kparat ta daa ne irywa wo dɔng. niMalɛka ɛniitaa nɛ nibhɛ bok nggbang ɛniitaa ivaa ne taal ɛzay, daa ɛli yaa lenɛ nibhɛ wo i shwaak njenjek ɛTaanggbey de.

²Ne n yaang ɛdɛ ɛkɔn na ɛ so te ɛling ne kɛ ryɔng ne igyilas i kyɛrɛ ne igboo. Ne n da yaang ninyi na nibhɛ kɛ re ɛwɛng nga ne inyam igywebhe de ne izazurum ihywɛ de gbik ne ɛlamba ne irywɛɛk ne ihywɛ gha. Ninyi yɛnaa nggyɛ wo kɛ kyinasek ɛnu ɛling ne igyilas sa nibhɛ bok ᐩnzom ɛkyee ne ɛTaanggbey kɛ nang nibhɛ.

³Nibhɛ ne i yaak ne iywel ɛMuusaa ne ɛ soye ɛkpuru ɛTaanggbey gbik ne ihoo ɛNgɔn ne ɛpharak ko, nibhɛ bo, “ɛTomɛ mo gha so gbom, nibhɛ so ɛkɔn ne kparat, ɛDaray ɛTaanggbey ne iTo gbik ɔɔy. Nkpiinɛ mo da so cik, ifɛ so itin nɛ, ɛGɔm ne igbagha gbik.[88]

⁴ɛDaray, ɛhay ɛbhɛ yaa sang phok ɛnik mo woo? ɛHay ɛbhɛ aa sang nang ngɛ ne ndiinday ye? iGyɛ zɔng ɛ so kang. iGbagha wo gbik yaa ne yɛɛs, nibhɛ re yɛ ntsong, daa ɛli ne kɛ phaal ɛshara ɛcik mo gha.”

⁵ɛTsim nikɔn nɛnaa wo, ne n yaang kɛ phaal iDeng ɛdaa ne irywa de, ipho ne rop ìtsɛm be sonɛ ndɔ yɛ.[89]

⁶niMalɛka ɛniitaa yɛnaa nggyɛ wo nɛ nibhɛ bok nggbang ɛniitaa da ne wuusi ndɔ ne ideng ngge, ne itsura ne ililing ne ifɛ tol wɛwɛy, nigagha ne izinariya ne ji so nigyɛy nibhɛ.

⁷ɛDɛng ndɔ nikɔn niken inwaas sa ne nang nimalɛka ɛniitaa na ikpɛɛt ne izinariya ɛniitaa ne kɛ yɛk ne njenjek ɛTaanggbey de hyɔrɔ, ɛTaanggbey ne iken ne ishay-ishay.

⁸iDeng ngge ne te hyɔrɔ ne ngkoy ne mpɛ tɔɔsel ito-ndiinday ɛTaanggbey de gbik ne ihwet ɛbhɛ. iPhɛ ɛlɛy sɔng ɛnyi ne yɛɛ ne lel ne ideng ngge nang. Kaa hyep nggbang ɛniitaa da nɛ nimalɛka ɛniitaa na kɛ yɛɛs nɛwo kyi taal le nyɛɛn.