Read eten Nikɔn ne kɛ Phaal 16 Bible Online

Nikɔn ne kɛ Phaal 16 - eten bible

Nikɔn ne kɛ Phaal 16

¹Ne n phok idɛ izɔlɔs nziinzay de le ndɔ ne ideng ngge ihywɛ boote nɛ nimalɛka ɛniitaa na ihywɛ yɔngɔ, “Cwi te ɛbhɛ sit ɛn njenjek ɛTaanggbey de ne mpɛ so ne ikpɛɛt ɛniitaa da ndɔ ɛzay ya.”

²iPhɛ ɛlɛy, ɛmalɛka ɛyisɛ yɛ ne bhɛ sit ɛkɔn na ne ɛ so ne ikpɛɛt ɛbhɛ wo ndɔ ɛzay ya. iNuu ibebhe ne wuusi ninyi na nɛ nibhɛ bok ɛlamba ne inyam igywebhe gha, nibhɛ kɛ kyi ta re inyam be ne izazurum ne ihywɛ de ntsong ngga.

³ɛMalɛka ne ifaa yɛ ne bhɛ sit ɛkɔn na ne ɛ so ndɔ ne ɛkpɛɛt ɛbhɛ wo ndɔ ɛling. iNɛn ɛling ngga ne teye neyi tɛ neyi ɛnyi ne ɛ kɛ ku. Nikɔn niken ndɔ ɛling nga ne kus gbik.

⁴ɛMalɛka ne itwat tɛ ne bhɛ sit ɛkɔn na ne ɛ so ndɔ ne ɛkpɛɛt ɛbhɛ wo ndɔ ne ihel gbik ne irwong, inɛn nɛ ne hyereey mpɛ teye neyi.[90]

⁵Ne n ji phok ɛmalɛka gha ne ɛ wɛɛ inɛn da i bo, “iGyɛ ne ɛ so Kang, Ɛ kɛ mɔng itin nɛ ndɔ ne bol ɛshara mo gha, igyɛ wo ne ɛ sonɛ ɛlyilyɛghaa wo, ne ɛ kaa ku sonɛ wo.

⁶Daa ɛli nɛ ninyi na kaa loghɛ neyi ninyi mo na nɛ ninaa ninabawa mo na. iPhɛ dee, ɛ kɛ ne ji nang nibhɛ neyi na tɛ nibhɛ sɔ, iphɛ kɛ jam nibhɛ nɛ.

⁷Ne n ji phok izɔlɔs le ɛraa ne hap itsanga gha kɛ kyii nɛ ihywɛ yɔngɔ, ɛDaray ɛTaanggbey ne iTo Gbik, ɛshara mo gha soye itin nɛ, ɛ ta so cik.”

⁸ɛMalɛka ne nwaas se ne sit ɛkɔn na ɛ so ndɔ ne ɛkpɛɛt ɛbhɛ wo ne iroy. Ne sim iroy de nɛ iphɛ rarat ninyi na te igboo.

⁹ɛKpikpiy yo ne rarat ninyi na gbom, nibhɛ bol ivol ne bɛɛs irywɛɛk ɛTaanggbey ne ɛbhɛ ɛ bok igbɔm nikɔn ne nggbang ngɛdaa wo. Gbik ne iphɛ ɛlɛy, sɔng nibhɛ ne san ɛbɔk, nibhɛ nang ɛTaanggbey yegha ne ndiinday nang.

¹⁰ɛMalɛka ne iwii yɛ ne bhɛ sit ɛkɔn na ne ɛ so ndɔ ne ɛkpɛɛt ɛbhɛ wo ɛcuruu ne igbɔm ne inyam igywebhe de. iGbyik ne cwaal ɛlɔ gha ne inyam igywebhe de bok ne igbɔm ba, ninyi na ne tɛnɛ ilwem nibhɛ ndɔ ne nggbang ngga.[91]

¹¹Ninyi na ne ibol ivol ne bɛɛs ɛTaanggbey ɛdaa ne irywa ye ɛlɔ ne nggbang nibhɛ da ne inuu nibhɛ de. Gbik ne iphɛ ɛlɛy, sɔng nibhɛ ne san ɛbɔk daa nitomɛ nibebhe nibhɛ na nang.

¹²ɛMalɛka ɛtaraa yɛ ne bhɛ sit ɛkɔn na ne ɛ so ndɔ ne ɛkpɛɛt ɛbhɛ wo ndɔ ne ɛgbaang ne iHywel ne iYufɛrɛtis. iNɛn ne ihywel da ne phu te ryɔng nigɔm ɛdaa ne iwap dak ɛnkiinɛ.[92]

¹³Ne n ji yaang ikpabyik ivebhe ifɛ cwat ne ifɛ so te itswambɔlɔk. iKpabyik kɛdaa nggyɛ wo kaa wuusi ndɔ ɛnu ne ɛgbaang ne izɔ igywebhe de, ne ɛnu ne inyam igywebhe de gbik ne ɛnu ɛnɛbi ne rywɛɛk ka.

¹⁴iKpabyik ivebhe yɛdaa nggyɛ wo so ikpabyik niphoo ne ifɛ tɔɔsel nyu nikɔn ne kparat. iFɛ ne wuru ifɛ phɛ ɛlɔ nigɔm ɛzay ya gbik te ifɛ bhɛ tumɛ nibhɛ ɛlɔ ne itsom ɛgbaang ɛtuk ɛTaanggbey ne iTo Gbik.

¹⁵Taate ɛn ɛli ne ɛKiriti gha bo, “Mee woo n yaaso te ɛhaa ɛyi! ɛHaa ɛwɛng ngaa nggyɛ ne ɛ so ɛkanang ɛ ta bok itsura ɛbhɛ, daa ɛli ne aa yung hyel nkywankywaang ɛ sɔ ncwa.”[93]

¹⁶iKpabyik kɛdaa nggyɛ wo ne ji tumɛ nigɔm ɛzay ya gbik ɛlɔ gha ne yeres ɛbhɛ ne ilem ne iHyiburu de iHar-Magedɔn.[94]

¹⁷ɛMalɛka ɛniitaa yɛ ne bhɛ sit ɛkɔn na ne ɛ so ne ɛkpɛɛt ɛbhɛ wo ne igbil. ɛDɛ ɛgbaang ne izɔlɔs so ne ji le ɛcuruu ne igbɔm ma ndɔ ne ideng ngge ihywɛ yɔngɔ, “Kɛ taal!”

¹⁸ɛLɔ yɛ ne yaa wunga, ɛɛ tɛɛ, gburung! Gburung! Ɛɛ tes derep, ivel runket. ɛLi ne kɛ ryɔng ɛten ɛsii gha, sɔng ivel da kɛ ku runket ɛlɛ wo nang. iRunket tɛ kaa kat gbom.

¹⁹ɛGbaang ɛgarang ne iBabila wo ne tasat ɛ hobhoset ɛtat. Nigarang ne igbagha na ne bungaay gbik. ɛTaanggbey ya ne taate ne ɛgbaang ɛgarang ne iBabila wo, ne ɛ yɛk ɛbhɛ nɛ ɛ sɔ ɛhyihyangas ne njenjek ɛTaanggbey ya.[95]

²⁰iKpop inɛn da ne biisit, ibarang ngga ne bungaay sɔng tang yaang ifɛ nang.[96]

²¹iGbaang ne nkpaaling ne righitik kɛ sɛ hɔn ikilɔgaram nzuwubɔ iwii ne les dak ne irywa wo ifɛ hoghɛse daa ninyi na. Ninyi na ne bol ivol ne bɛɛs ɛTaanggbey ye daa ɛli ne nkpaaling ngga i baasek nibhɛ nggbang ngga gbom.