Read eten Nikɔn ne kɛ Phaal 17 Bible Online

Nikɔn ne kɛ Phaal 17 - eten bible

Nikɔn ne kɛ Phaal 17

¹ɛDɛng ndɔ ne nimalɛka ɛniitaa na nɛ nibhɛ bok ikpɛɛt ɛniitaa da ne yɛɛs ɛ yaak me, “Yɛɛs te n tɔɔrek kɛ nggbang ngga ne yaa baasek ɛkuk ka ne re shwaa gha, ɛgarang nga ne ɛ bok igbɔm ba daa ne ihel gbarang ge.[97]

²niGɔm ɛzay ya kɛ ku ra ne ɛbhɛ, ninyi ɛzay ya i ne tes ziizii daa ne sɔ inɛn ɛnap ne nzangas ɛbhɛ de.”[98]

³iKabyik ne lel ndɔ mee, ɛmalɛka gha ne bo me ɛ phɛ ne me ndɔ ɛhay. ɛNggyɛ wo ne n yaang ɛdɛ ɛkuk ka ɛ kɛ soos daa ne inyam ìgywebhe isheng ngɛ. iNyam mɛdee nggyɛ wo bok itso ɛniitaa, ne igbumɛ ɛnduwubɔ, kɛ ne haa irɛɛk ne bɛɛs ɛTaanggbey yegha ne ibek ne ihywɛ gbik.[99]

⁴ɛKuk ka bok ɛtura ne inɛn nɛ so ntseng ngɛ zurutut ne ntseng ngɛ mpumpuk te ɛtura nigɔm. Ɛ kɛ ne gyura ye nɛ nikɔn ne izel nggyɛnggyɛl ne kɛ ryɔng ne izinariya, ne idɛ ikpɛɛ da ne bok ifɛ iluwuluwu ne ifɛ bok ijam gbom. ɛKuk ka ne ji bok ɛhyihyangas ne izinariya ne iwɔ ɛbhɛ ne kɛ yɛk nɛ nikɔn ne ishis ne nzangas ɛbhɛ de hyɔrɔ.[100]

⁵Kɛ haa idɛ irywɛɛk ko ne ɛnting ngɛ so gying ne itiri ɛbhɛ de ɛlɛ, “ƐBABILA ƐNDIINDAY, ƐGYINƐ NINAA NE RE SHWAA, ƐGYINƐ NIKƆN NE ISHIS ƐZAY GBIK.”

⁶Ne n yaang ɛkuk ka kɛ te ziizii nɛ neyi ninyi ɛTaanggbey ne kɛ tul kang gbik nɛ ninyi na ne kɛ phobho lenɛ ne ishɛɛda nibhɛ daa ɛYɛso. Ne sɛ nggɛ yaang ɛbhɛ wo ne n wum me zii.

⁷ɛMalɛka gha ne yaak me; “iKyee iphɛ kɛ te ˆɛ kɛ wum mɛ zii woo? Naa kpɛl lɛ ɛduk ɛkuk ka, ne ɛhaa ne inyam ma ne ɛ kɛ taay yɛwo ne ihywɛ bok itso ɛniitaa da ne igbumɛ ɛnduwubɔ da.

⁸iNyam igywebhe de ne ˆɛ kɛ yaang ngo, ihywɛ kaa ku sonɛ itsen nɛ, sɔng ihywɛ ne sonɛ ɛlyilyɛghaa wo itsen nɛ nang. iHywɛ ne yungaa wuru ndɔ ne iBong kyukyum be ihywɛ phɛ ɛlɔ gha ne yaa bhɛ phoo ihywɛ nɛ. Ninyi ɛzay ya ne hame kɛ ku haa irɛɛk nibhɛ de ndɔ ne ɛWee ne iKen no ne ile ne ɛtum ɛzay yo sɛ́ ne wum en zii. Nibhɛ sɛ́ wum en zii nten de nɛ nibhɛ kɛ yaang inyam igywebhe de, daa ɛli ne ihywɛ kaa ku sonɛ itsen nɛ, sɔng ihywɛ ne sonɛ itsen nɛ ɛlyilyɛghaa wo nang, ihywɛ sɛ́ ne ta bhɛ kyii dɔng.”[101]

⁹ɛKɔn nɛghaa wo i sim ntsɛntsɛng ne ishweng. iTso ɛniitaa da ifɛ ifɛ soye igbol ɛniitaa da ne ɛkuk ka kɛ soos nɛ wo.

¹⁰iFɛ ne ta soye nigɔm ɛniitaa, ninaa nɛ nibhɛ iwii kɛ ku kus, ɛbhɛ ɛdaan ne sonɛ, ɛbhɛ ɛdaan na ne tɔ tang yɛɛs. Sɛ́ ne sɛ ɛ kɛ yɛɛs so, ɛ sɛ ne re igbɔm ba nten ncɛt.

¹¹iNyam igywebhe yɛdee wo ne ihywɛ kaa tsa ihywɛ sonɛ itsen nɛ wo ne ihywɛ sang kyi sonɛ itsen nɛ ɛlyilyɛghaa wo ihywɛ ihywɛ ne soye ɛgɔm ne ɛnaras sɛ. iHywɛ ne so ndɔ nigɔm ɛniitaa na, ihywɛ ne phɛɛs ɛlɔ gha ne yaa bhɛ phoo ihywɛ nɛ.

¹²“iGbumɛ ɛnduwubɔ da ne ˆɛ kɛ yaang ngo ifɛ soye nigɔm ɛnduwubɔ nɛ nibhɛ tang tsa re igbɔm ba. Sɛ ne harap nibhɛ igbɔm ba nibhɛ re igbɔm ba ɛwa ɛdaan ne inyam igywebhe de.[102]

¹³Nigɔm ɛnduwubɔ yɛnaa nggyɛ wo, bok ɛnu ɛdaan nɛ. Nibhɛ sɛ ne ji nang inyam igywebhe de ihwet gbik ne igbɔm nibhɛ da.

¹⁴Nibhɛ sɛ́ ne ta itsom ne ɛNgɔn ne ɛpharak ka. ɛNgɔn ne ɛpharak ka sɛ́ ne re nibhɛ ne itsom be, daa ɛli ne ɛbhɛ ɛ soye ɛDaray ne niDaray ne ɛGɔm niGɔm. ɛNgɔn ne ɛpharak ka sɛ́ ne re itsom be nɛ ninaa ne ɛbhɛ ɛ kɛ yel-le, ɛ kasa, nibhɛ so sɛ kyinak daa ne ibol nibhɛ.”

¹⁵ɛMalɛka gha ne ta yaak me, “iNɛn da ne ˆɛ kɛ yaang ɛkuk ne re shwaa gha kɛ soos nɛ wo ne soye igbagha ɛzay, ninyi ɛzay, ihywee ɛzay ne ilwem ɛzay da gbik.

¹⁶iNyam igywebhe de ne igbumɛ ɛnduwubɔ da ne ˆɛ kɛ yaang ngo sɛ ne mbaray ɛkuk ne re shwaa yɛghaa nggyɛ wo. Nibhɛ sɛ phɔrɔt nikɔn na ne ɛ bok gbik, nibhɛ tek ɛbhɛ nkywankywaang. Nibhɛ sɛ re inwam ne bek ɛbhɛ, nibhɛ wɔɔ ɛbhɛ ne igboo.

¹⁷ɛTaanggbey ya ɛbhɛ kɛ yɛk ngɛ nigɔm mɛnaa nggyɛ wo yɛk ɛnu ɛdaan na, nibhɛ sim nibhɛ nang inyam igywebhe yɛdee nggyɛ wo igbɔm nibhɛ da. ɛTaanggbey ya kɛ mɔn ɛlɛ wo te sɛ i shwaak ɛkɔn ne ɛ sim.

¹⁸“ɛKuk ka ne ˆɛ kɛ yaang ngo ɛbhɛ ɛ soye ɛgbaang ɛgarang ngɛghaa wo ne ɛɛ re igbɔm ba daa nigɔm ɛzay ya.”