Read eten Nikɔn ne kɛ Phaal 18 Bible Online

Nikɔn ne kɛ Phaal 18 - eten bible

Nikɔn ne kɛ Phaal 18

¹ɛTsim mɛ ɛlɛy, ne n da yaang ɛdɛ ɛmalɛka gha ɛ le daa ne irywa ɛ yaaso. Ɛ bok igbɔm gbom. iTo-ndiinday ɛmalɛka de ne tolte ɛzay ya gbik.

²Ne ɛ boote ne ɛgbaang ne izɔlɔs, ɛ yɔngɔ, “Ɛ kɛ ho! ɛGbaang ne iBabila wo kɛ ho! Ɛ kɛ teye ɛlɔ ne shɛɛ niphoo, ne icwak ne ikpabyik ne ishis, ɛlɔ ne ninon ne ishis ne ᐩinyam igywebhe izee ne ishis.[103]

³Daa ɛli ne igbagha ɛzay yo kɛ sɔ[104] inɛn ɛnap ne ihyop ne nzangas ne ɛbhɛ de. Nigɔm ɛzay ya gbik kɛ ra ne ɛbhɛ. Ninaa ne iza ɛzay ya gbik kɛ yɛk iryat daa ne ihyop ne ishwɛɛ ne phok iyɛnɛng ɛbhɛ.”

⁴Ne n da phok idɛ izɔlɔs de le daa ne irywa wo ihywɛ bo, “Ninyi nge, wuru ɛn! ˆAa yung yɛk ɛn ne iwɔ ne ɛfɔt ɛbhɛ wo, ˆaa ma yung sɔ ɛn nggbang ɛbhɛ da.[105]

⁵Daa ɛli ne ɛfɔt ɛbhɛ wo kɛ waa ye tuu-tuu, ɛbhɛ kɛ bhɛ hɔn irywa. ɛTaanggbey ya kɛ ne taate ne ibebhe ɛbhɛ de ne ɛ kɛ mɔn no.[106]

⁶Te mɔn iBabila de ɛli ne ɛ kɛ mɔn no. Gbik nikɔn na ne ɛ kɛ mon no, te tal ɛbhɛ nɛ ɛte ɛphaa. ɛKɔn na ne ɛ kɛ phuul nyini nɛ wo, phuul ɛn ɛbhɛ ɛhaa ne ɛ phyin ne ihwet ɛte ɛphaa.[107]

⁷ɛLi ne ɛ kaa tɔɔk ito ɛbhɛ de ɛ sim ishwɛɛ ne phok iyɛnɛng ngge, ɛlɛy ne ˆaa ne ma bak ɛn ɛbhɛ nggbang ngga ne irway ishwii da. Daa ɛli ɛ kaa bol ndɔ ne irway ɛbhɛ da ɛ bo, ‘Nzo ɛkuk ɛgɔm, sɔng nzo me ɛkusang nang, Sɔng nzɛ ne tang yaang irywa ishwii nang.

⁸iPhɛ ɛlɛy ndɔ ɛtuk ɛdaan, sɛ́ ne bak ɛbhɛ nggbang, ne iku ne irway ishwii, ne iyɔm. Sɛ ne wɔɔ ɛbhɛ ne igboo, daa ɛli ne ɛDaray ɛTaanggbey ya, ɛhaa ne hyɛ ɛbhɛ ɛshara gha, bok ihwet igbom.’ ”[108]

⁹Sɛ́ ne sɛ nigɔm ɛzay ya nɛ nibhɛ kɛ ra nzangas de ne ɛkuk kɛghaa nggyɛ wo, nibhɛ ta bok ihyop ne ishwɛɛ ne phok yɛnɛng ngge ne ɛbhɛ wo, kɛ yaang ngkoy ne igboo wo ne ifɛ re ɛbhɛ wo, nibhɛ ne san iku ɛbhɛ de.

¹⁰Nibhɛ sɛ́ ne ta ɛn kyakyak daa ɛli nɛ nibhɛ tel ɛnik kɛ ne yaa yung yɛk nibhɛ ne nggbang ɛbhɛ da, nibhɛ ne yɔngɔ, “ɛKɔn ne ɛnik! ɛKɔn ne ɛnik! Aa, ɛgbaang ɛgarang ne iBabila, ɛgarang ne ɛ bok ihwet gbom, ndɔ ɛwa ɛdaan kɛ shii hyɛ yɛ ɛshara gha!”[109]

¹¹Ninaa ne iza ɛzay ya sɛ ne san iku ɛbhɛ de nibhɛ yɛk irway ishwii, daa ɛli ne hame ɛnyi tɔɔ say nikɔn nibhɛ na.[110]

¹²Sɔng ɛnyi tɔɔ say nibhɛ izinariya, ne ɛzurufa, ne ikpɛɛ ne izel, ne iluwuluwu de nang. Sɔng ɛnyi tɔɔ say nibhɛ itsura iywɛnɛng ngga ne kɛ ryɔng ne ililing ngge, ne itsura ne ijam be ne ifɛ bok inɛn nɛ ntsɛng ngɛ mpumpuk ko, ne itsura phuphul da ne ifɛ bok ijam be ne i bok ifɛ isilik ge, ne itsura da ne ifɛ bok inɛn nɛ ntseng ngɛ zurutut to nang. Sɔng ɛnyi tɔɔ say nibhɛ itson ɛnkyinkyɔp be te ɛturarɛ wo, nɛ nikɔn na ne kɛ ryɔng ne itson ne ihwet de nang. Sɔng ɛnyi tɔɔ say nibhɛ izinɛ ne ɛnggbini de nɛ nikɔn na ne kɛ ryɔng ne itagula, nɛ ninaa ne kɛ ryɔng ne igyɔs, nɛ ninaa kɛ ryɔng ne kpɛɛ da ne ifɛ i tol nggyɛnggyɛl lo nang.

¹³Sɔng ɛnyi tɔɔ say nibhɛ isinamon de nang. Sɔng ɛnyi ne tɔɔ say nibhɛ mbut ɛnkaani da, ne ɛturarɛ ne igboo wo, ne ɛturarɛ ne imuru gbik ne ɛturarɛ ne iluban ngo nang. Sɔng ɛnyi ne tɔɔ say nibhɛ inɛn ɛnap ba, ne inɔɔy ne ifaa da, ne inuk ɛlikama da; ne ntsɔk ɛlikama da, gbik ne irwandɔng ngga nang. ɛLɛy dɔng, sɔng ɛnyi tɔɔ say nibhɛ ne ᐩigyol ne ntsabhak ge, ne ᐩinantse de, nɛ nikyɛɛkyɛ ne ᐩinantse na, nɛ nikpuru na gbik ne ikpen ninyi da nang.[111]

¹⁴Ninaa ne iza na ne yaak ɛbhɛ, “Nikɔn na ne ɛ kɛ yɛk ne irway da daa nibhɛ wo kɛ tel. Gbik iryat mo de nɛ nikɔn ne izel mo na kɛ birit, sɔng ˆɛ tang ta sɛ nibhɛ dɔng nang.”

¹⁵Ninaa ne iza na nɛ nibhɛ yɛk iryat de lenɛ nɛ nibhɛ kɛ lɛbhɛl ɛbhɛ nɛ nikɔn na sɛ́ ne taay en kyakyak daa ɛli nɛ nibhɛ tel ɛnik ne yaa ma yung bak nibhɛ nggbang ngga ne ɛbhɛ wo. Nibhɛ bok irway ishwii, nibhɛ i san,[112]

¹⁶nibhɛ bo, “ɛKɔn ne ɛnik! ɛKɔn ne ɛnik! Aa ɛgbaang ɛgarang ne iBabila. Ɛ kaa i yaak ghe ne itsura ne ililing, ne ɛtura ishweng ngɛ mpumpuk ne ishweng ngɛ zurutut. Ɛ kaa ta i gyura ye ne izinariya, ne ikpɛɛ ne izel ne iluwuluwu.

¹⁷Ndɔ ɛwa ɛdaan, gbik iryat ɛbhɛ de kɛ ne bungaay!” “Gbik ninaa nigyirigyi inɛn na, nɛ ninaa ne hɔ yɛ, nɛ ninaa ne leesel lɛ gbik nɛ ninaa nɛ nibhɛ sɛ ɛkɔn ne re ndɔ ɛling nga, sɛ́ ne kyinak kyakyak.[113]

¹⁸Sɛ́ ne sɛ nibhɛ kɛ yaang ngkoy ne igboo da ne ifɛ re ɛbhɛ wo. Nibhɛ sɛ ne ta ikun, nibhɛ yɔngɔ, ‘Sɔng kɛ ku sɛ ɛdɛ ɛgarang nga te ɛgarang ngɛgha wo nang.’[114]

¹⁹Nibhɛ sɛ́ ne sirit ntsong daa ne itso nibhɛ, nibhɛ san, nibhɛ yɔngɔ, ɛKɔn ne ɛnik! ɛKɔn ne ɛnik! Aa ɛgbaang ɛgarang ne iBabila ɛlɔ gha ne gbik ɛnyi gha ne ɛ kɛ bok ɛgyirigyi kɛ yɛk iryat lenɛ ne ɛbhɛ. Ndɔ ɛwa ɛdaan kɛ ne bunga ɛbhɛ gbik![115]

²⁰Yɛk ɛn irway ihwala daa ɛbhɛ, nyinɛn ninyi ɛdaa ne irywa! Yɛk ɛn irway ihwala daa ɛbhɛ nyinɛn ne kɛ tul nyini kang, nɛ ninɔn ne tom, nɛ ninabawa! Daa ɛli ne ɛTaanggbey ya kɛ hyɛ ɛBabila wo ɛshara, daa ɛkɔn na ɛ kɛ mɔn nyini nɛ wo.”

²¹ɛDɛ ɛgbaang ɛmalɛka gha ne bo ɛdɛ ɛgbaang ne kɛɛ wo ne igbom mɛ kɛ hɔn te ɛgbaang ne ikɛɛ ne hɔng nkpana ɛ cwaak ndɔ ɛling. Ne ɛ ji yɔngɔ, “Sɛ́ cwaak ɛgbaang ɛgarang ne ɛBabila wo ndɔ ne ivel ba ne ihwet, ɛlɛ wo. Sɔng ne tang yaang ɛbhɛ nang.[116]

²²Sɔng sɛ tang phok ninaa ne rom nzom ndɔ ne ɛBabila wo nang. Sɔng sɛ́ tang phok ninaa ne yaak ne ghel, nɛ ninaa ne wurus ɛmandɛɛng, nɛ ninaa ne wurus igba ndɔ ne ɛBabila wo dɔng nang. Sɔng sɛ́ tang yaang ninaa nitomɛ ihywee-ihywee ne iBabila de dɔng nang. Sɔng sɛ́ ne tang phok izok ne hɔng ɛkɔn ndɔ ne ɛBabila wo nang.[117]

²³Sɔng tang yaang ɛwɛwɛy ne ifitila nang. Sɔng tang phok izɔlɔs ne ɛyiyaam ne yɛl, ne izɔlɔs ɛyɛl lɛ ndɔ mo dɔng nang. Daa ɛli nɛ ninaa ne iza mo na, nibhɛ bhɛ kaa so ninaa ne igbɔm ɛzay ya. iGbagha ɛzay yo kaa te buruburu ne ikyarakyut mo de.[118]

²⁴Ndɔ ne ɛBabila wo ne kaa sɛ nɛ neyi ninabawa na, nɛ neyi ninyi na ne kɛ tul kang ngo. Ɛɛy! Gbik neyi ninyi na ne kɛ phobho ndɔ ɛzay ya.”[119]