Read eten Nikɔn ne kɛ Phaal 20 Bible Online

Nikɔn ne kɛ Phaal 20 - eten bible

Nikɔn ne kɛ Phaal 20

¹ɛTsim mɛ ɛlɛy ne n yaang ɛmalɛka ɛ le daa ne irywa ɛ tɔmɔs, ɛ bok ɛyaya ne ibong kyukyum be ne ɛgbaang ne nyang ne iwɔ ɛbhɛ.

²Ne ɛ ji wum izɔ igywebhe de, izɔ igywebhe ne ile yɛdee nggyɛ wo ne ihywɛ ihywɛ so ɛShɛtan na ɛ rop ɛbhɛ ishay ɛnom ɛdaan (1,000)[130]

³ɛMalɛka gha kaa cwaak ɛbhɛ ndɔ ne ibong kyukyum be, ɛ cwaal, ɛ ji baa iphɛ te ɛ ring ɛbhɛ ne luk igbagha wo ishay ɛnom ɛdaan de phyii taal le. ɛTsim mɛ ɛlɛy ne ji biri ɛbhɛ i nang ɛbhɛ nten ncɛt.

⁴ɛTsim mɛ ɛlɛy ne n yaang nicuruu ne igbɔm nɛ ninyi kɛ sooset nɛ, kɛ nang nibhɛ ito ne bol ɛshara. Ne n da yaang ikpen ninyi da ne kaa phobho nibhɛ ɛlɔ ne ishɛɛda de nɛ nibhɛ nang daa ɛYɛso gha, ne bol ɛTaanggbey de. Sɔng nibhɛ kaa re inyam igywebhe de ntsong nang, sɔng nibhɛ ne say ɛlamba ne ihywɛ gha ne icwiri nibhɛ nang, sɔng nibhɛ ne say ne ibɔ nibhɛ nang. Nibhɛ kaa kyi ta shɛɛ niken nibhɛ re igbɔm ne ɛKiriti gha ishay ɛnom ɛdaan.[131]

⁵ɛBɛ wo ɛbhɛ ɛ so yilitsik ne ikpuu ɛyisɛ yɛ. Sɔng ɛbyin ninyi na nɛ nibhɛ kɛ kus so kaa ne ma yilitsik ne ikpuu da nang, nibhɛ kaa hyep ishay ɛnom ɛdaan de kyi taal le nyɛɛn.

⁶Ninaa ɛwɛng ngaa nggyɛy, nɛ ninaa ne kɛ tul kang, nɛ nibhɛ sɛ́ so ndɔ ne yilitsik ɛyisɛ da. Sɔng iku ne ifaa de sɛ bok ihwet daa nibhɛ nang. Nibhɛ sɛ yang tes en nibo ɛTaanggbey nɛ ninaa ɛKiriti, nibhɛ re igbɔm ne ɛbhɛ ishay ɛnom ɛdaan.

⁷ɛTsim mɛ ne ishay ɛnom ɛdaan de kɛ phee, ne biri ɛShɛtan negha ndɔ ne nyang ngge.

⁸Ɛ sɛ ne ji wuru ɛbhɛ luk igbagha ɛzay yo ne ifɛ kɛ tes en shwaa ne ibap naas ɛzay de, ne i bok nibhɛ ɛGok ka ne ɛMagok ka. ɛShɛtan na sɛ́ ne tumɛ nibhɛ ɛlɔ ɛdaan te ta itsom, nibhɛ sɛ́ ne so gbarang te imumu ne ihywel.[132]

⁹Nibhɛ ne hyel ɛzay ya gbik, nibhɛ te ɛgarang nga ne ɛTaanggbey ya i sim gyɔɔ, nibhɛ te ɛgarang nga ne kɛ tul kang ngo gyɔɔ. iGboo ne ji le daa irywa ifɛ tɔm ifɛ re nibhɛ.

¹⁰Ne wum ɛShɛtan negha ne ɛ kɛ luk nibhɛ wo i cwaak ɛbhɛ ndɔ ne ɛling ne igboo ne isɔlifa wo ɛlɔ gha ne kɛ ku cwaak inyam igywebhe de gbik ne ɛnɛbi ne irywɛɛk ka nɛwo. Sɛ́ ne baasek nibhɛ nggbang ne igbey ne ɛtuk, ishay-ishay.

¹¹ɛTsim mɛ ɛlɛy, ne n yaang ɛgbaang ɛcuruu ne igbɔm ɛhala yɛ gbik ne ɛnyi yɛ ne ɛ kɛ soos nɛ. ɛZay ya ne irywa wo ne tel ɛnu ɛyisɛ ɛbhɛ sɔng ne tang yaang nibhɛ nang.

¹²Ne n ji yaang ninaa nɛ nibhɛ kɛ kus so, nitaasek kɛ nɛ nindiinday yɛ, ne ji phaasel iwee da gbik. Ne ji phaal ɛdɛ ɛwee wo ne ɛbhɛ ɛbhɛ so ɛWee ne iKen. Ne bol ninaa nɛ nibhɛ kɛ kus so ɛshara kancɛng ne ɛkɔn na ne kɛ haa ndɔ ne iwee da.[133]

¹³ɛLing nga tul ikpom ba ne ifɛ so ndɔ ɛbhɛ wo. iKu de gbik ne ɛlɔ ne ikpom ma ne ma tul ikpom ba ne ifɛ so ndɔ nibhɛ wo. Ne ji bol ɛrɔngɔ ɛshara gha kancɛng ne ɛkɔn na ne ɛ kɛ mɔn.

¹⁴Ne ji cwaak iku de gbik ne ɛlɔ ne ikpom ma ndɔ ɛling ne igboo wo. ɛLing ne igboo gha bhɛ ne soye iku ne ifaa de.

¹⁵Gbik ɛnyi gha ne kɛ sang sɛ irywɛɛk ɛbhɛ ndɔ ne ɛWee ne iKen no, ne cwaak ɛbhɛ ndɔ ne ɛling ne igboo gha.