Read eten Nikɔn ne kɛ Phaal 21 Bible Online

Nikɔn ne kɛ Phaal 21 - eten bible

Nikɔn ne kɛ Phaal 21

¹ɛTsim mɛ ɛlɛy, ne n ji yaang ɛzay ɛphas ne irywa ifas. Daa ɛli ne ɛzay ɛyisɛ gha ne irywa ɛyisɛ wo kɛ phee, sɔng ɛling nga ne ta tɔnɛ nang.[134]

²Ne n ji yaang ɛGarang nga ne kɛ Tul Kang ngo, iYɛrushɛlɛm iphas de, ɛ le daa ne irywa wo ɛlɔ ɛTaanggbey ya ɛ tɔmɔs. Kɛ gyura ɛbhɛ te ɛyɛl ne ɛ hyep ɛ̀ras.[135]

³Ne n phok ɛgbaang ne izɔlɔs ihywɛ le ɛcuruu ne igbɔm ma ihywɛ bo, “ɛLyilyɛghaa wo ɛlɔ ne shɛɛ ɛTaanggbey ya ne so ɛlɔ nɛ nibhɛ shɛɛ nɛ nɛ ninyi. Aa shɛɛ nɛ nibhɛ, nibhɛ ne teye ninyi ɛbhɛ. ɛTaanggbey ya ne ito ɛbhɛ aa shɛɛ nɛ nibhɛ, ɛ teye ɛTaanggbey nibhɛ.[136]

⁴Ɛ sɛ́ yes niyilis ne irwisɛ nibhɛ da gbik. Sɔng iku, ne irway ishwii, ne ishwin, ne nggbang sɛ́ tɔnɛ nang. Daa ɛli nɛ nikɔn ne ile na kɛ phee gbik.”[137]

⁵ɛNyi gha ne ɛ kɛ soos ɛcuruu ne igbɔm ma ne ɛ ji yɔngɔ, “ɛLyilyɛghaa wo nzi ryɔng nikɔn na niphas sɛ gbik!” Ne ɛ ta yaak me, “Haa ɛkɔn nɛghaa wo, daa ɛli ne ibol lɛdee wo so i sɛ kyinak daa ne iphɛ, iphɛ ne ta so itin nɛ.”

⁶Ne ɛ yaak me, “Kɛ taal! Mee nzo me ɛHaa ɛYisɛ yɛ ne ɛHaa ɛTsim mɛ, ɛHaa ne iTsa yɛ ne ɛHaa ne iTaal lɛ. Gbik ɛnyi gha ne irway ɛbhɛ i has te ɛ yɛɛs, naa ne nang ɛbhɛ inɛn ɛncincɛk ne iken da ɛ sɔ buu.[138]

⁷Gbik ɛnyi gha ne ɛ kɛ re ɛwɛng, aa ne re isha nikɔn nɛnaa wo ɛlɔ nge, naa ne te me ɛTaanggbey ɛbhɛ, ne ɛ ma teye ɛngɔn nge.[139]

⁸Ninaa ne ɛnik ka, nɛ ninaa ne sang nang ne itin de, nɛ ninaa mɔn nikɔn ne ishis sa, nɛ ninaa ne phobho ninyi na, nɛ ninaa ne ra nzangas sa, nɛ ninaa ne kyarakyut ta, nɛ ninaa ne re igunkyi de ntsong ngga, nɛ ninaa ne wul irywɛɛk ga, sɛ cwaak nibhɛ ndɔ ɛling ne igboo ne isɔlifa. ɛLing ne igboo gha bhɛ ne soye iku ne ifaa de.”

⁹ɛDɛng ndɔ nimalɛka ɛniitaa na nɛ nibhɛ bok ikpɛɛt ɛniitaa da ne kɛ yɛk ne nggbang mpɛ ɛniitaa ɛtsim ba hyɔrɔ wo ne yɛɛs ɛ yaak me, “Yɛɛs, naa tɔɔrek kɛ ɛyɛl lo ne ɛbhɛ bhɛ soye ɛkuk ɛNgɔn ne ɛpharak ka.”

¹⁰iKabyik ne lel ndɔ mee, ɛmalɛka gha ne bo me ɛ phɛ nɛ ne ɛdɛ ɛwarang ɛndaalang ngo ɛ ji tɔɔrek me ɛGarang nga ne kɛ tul kang ngo, iYɛrushɛlɛm be ɛ le dak ne irywa ɛlɔ ɛTaanggbey ɛ tɔmɔs.[140]

¹¹ɛGarang nga ne i tol lenɛ ne ito-ndiinday ɛTaanggbey. iTol lɛ ne so te ivaa ne idɛ ikɛɛ ne izel de ne i bok iphɛ iyasipa, iphɛ so nggyɛnggyɛl te ɛmɔdɔbi.

¹²Ɛ bok iwabha ndaalang ne ifɛ kɛ te ɛbhɛ gyɔɔ. iWabha wo bok ninu ne iduk ɛnduwubɔ nɛ nibhɛ ifaa nɛ nimalɛka ɛnduwubɔ nɛ nibhɛ ifaa nɛ nibhɛ kɛ kyinasek ninu ne iduk ka. Kɛ haa irɛɛk ɛnduwubɔ nɛ nibhɛ ifaa ne itaang niSɛrɛla de ninu ne iduk ka. ɛHihaa ɛnu ne izuk ne i bok irywɛɛk ne icwaang ijwaan.

¹³iHoo iwap kaa ne i bok ninu ne iduk itwat. Ninu ne iduk itwat kaa so ne iwap ɛdak, nibhɛ itwat ne so ne iwap ɛkɔrɔk, nibhɛ itwat ne so ne iwap ne irwye ɛdak kɛ, nibhɛ itwat ne ji so ne itsan ɛdak kɛ.[141]

¹⁴iWabha ɛgarang ngo kaa bok ikpɛɛ ne itsum ɛnduwubɔ ne ifɛ ifaa. Ne haa irɛɛk ninɔn ne tom ɛnduwubɔ nɛ nibhɛ ifaa ɛNgɔn ne Pharak ge ne itsum ba. ɛWowoo ɛtum ne i bok irywɛɛk ɛngɔn ne tom ɛdaan.

¹⁵ɛMalɛka gha ne ɛ kɛ boote ne me wo ne bok ɛntsɛng ne izinariya ne aa tɛrɛk ne ɛgarang nga, nɛ ninu ne iduk kɛ gbik ne iwabha wo.[142]

¹⁶iBap inwaas ɛgarang ngge kaa ne so so ɛte. Ndaalang ngɛ ne bɛrɛdɛng ngɛ ne ku so ɛte. ɛMalɛka gha ne tɛrɛk ɛgarang nga ne ɛ sɛ ɛ so nihyay ninom ifaa ne ikpɔl nzuwubɔ nwaas, (2,400). Ndaalang ngɛ, ne bɛrɛdɛng ngɛ, ne ikyukyum mɛ ne so ɛte.

¹⁷ɛMalɛka gha ne tɛrɛk iwabha wo ɛli ne ɛten ɛsii i tɛrɛk, ndaalang ngɛ[143] ne so imita nzuwubɔ ɛtaraa ne ifɛ ɛtaraa.

¹⁸Kɛ lɔl iwabha ɛgarang ngo ne idɛ ikpɛɛ ne izel da ne i bok ifɛ iyasipa, ne lɔl ɛgarang ngɛ ne izinariya, ɛgarang nga ne i tol nggyɛnggyɛl te ne ɛmɔdɔbi.

¹⁹Kaa gyura ikpɛɛ ne itsum ɛgarang ngga ne ikpɛɛ ne izel kang-ka-kang ɛlɛ: ɛTum ɛyisɛ yɛ kaa so iyasipa. ɛWoo ne ifaa yɛ ne so isafiri. ɛTum ne itwat tɛ ne so ikasɛdɔni. ɛWoo ne inwaas sɛ ne so imirat.

²⁰ɛTum ne iwii yɛ ne so isadɔnik. ɛWoo ɛtaraa yɛ ne so ikaniliya. ɛWoo ɛniitaa yɛ ne so ikirisolat. ɛWoo ɛnaras sɛ ne so ibɛril. ɛWoo ɛnduwujɛng ngɛ ne so itofas. ɛWoo ɛnduwubɔ yɛ ne so ikirisɔparɛs. ɛWoo ɛnduwubɔ ne iphɛ idaan nɛ ne so ijasin. ɛWoo ɛnduwubɔ ne ifɛ ifaa yɛ ne so imatis.

²¹Ninunzuk ɛnduwubɔ nɛ nibhɛ ifaa na kaa bok idɛ ikpɛɛ da ne i bok ifɛ iluwuluwu, Kaa ne yɛk iluwuluwu idaan ɛnu ne izuk ɛdaan. Kaa ne ryɔng ɛgbaang ne nkiinɛ ɛgarang ngɛ ne izinariya zɔng, ɛbhɛ ne so wiriwiri te igyilas.[144]

²²Sɔng ne n yaang ideng ndɔ ɛgarang nga nang, daa ɛli ne ɛDaray ɛTaanggbey ne iTo Gbik ka ne ɛNgɔn ne ɛpharak ka bhɛ soye ideng ɛgarang ngɛ.

²³Sɔng ɛgarang ngɛ i tɔk iroy ne ifɛl ne nɛ nibhɛ yaa te ɛbhɛ saa nang, daa ɛli ne ito-ndiinday ɛTaanggbey de iphɛ nang ɛgarang ngɛ iwɛwɛy de, ɛNgɔn ne ɛpharak ka ɛbhɛ soye ɛpitila ɛgarang ngɛ.

²⁴iWɛwɛy ɛgarang ngɛ sɛ i tol ninyi nigarang nga gbik, nibhɛ hyel. Nigɔm ɛzay ya gbik sɛ ne yɛɛset ne iryat nibhɛ de nɛ ne ndɔ yɛ.[145]

²⁵Sɔng i cwaal ninu ne iduk ɛgarang ngɛ ne igbey nang, sɔng ɛtuk sɛ ne ta bhɛ sonɛ ɛnggyɛ wo nang, ishay-ishay.

²⁶Nibhɛ sɛ yɛɛs ne ndiinday gbik ne iryat ne igbagha ɛzay de ndɔ ɛgarang nga.[146]

²⁷Sɔng ɛkɔn ne ishis, ne ɛnyi ne mɔn nikɔn ne ishis gbik ne ɛhaa ne irywɛɛk sɛ́ ne lel ɛgarang ngɛ nang. Ninyi na ne irɛɛk nibhɛ so ndɔ ne ɛWee ne iKen ɛNgɔn ne ɛpharak ka zɔng, nibhɛ bhɛ sɛ lel ndɔ ɛgarang nga.