Read eten Nikɔn ne kɛ Phaal 22 Bible Online

Nikɔn ne kɛ Phaal 22 - eten bible

Nikɔn ne kɛ Phaal 22

¹ɛTsim mɛ ɛlɛy ɛMalɛka gha ne tɔɔrek me ihywel ne ifɛ bok inɛn ne nang iken, ne mpɛ i tol nggyɛnggyɛl te ɛmɔdɔbi. Mpɛ le ɛcuruu ne igbɔm ɛTaanggbey ya, ne ɛNgɔn ne ɛpharak ka.[147]

²iNɛn ne ihywel da i tel ɛceree ne ɛnkiinɛ ɛgbaang ɛgarang ngo. ɛHon ne nang iken ne so ne ihoo iwap ne ihywel lo. ɛHon ne Nang iKen na i yɛk ikpam ɛte ɛnduwubɔ ne ifɛ ifaa ne ishay. Ɛ yɛk ikpam ba ɛdaan ifɛl. iBee ɛhon de ne so te iphɛ tes igbagha ɛzay yo gbik niken.[148]

³Sɔng sɛ́ ne sɛ ɛkɔn ne ɛ so ndɔ ɛkawɛy ɛTaanggbey ndɔ ɛgarang ngɛghaa wo nang. ɛCuruu ne igbɔm ɛTaanggbey ne ɛhaa ɛNgɔn ne ɛpharak ka bhɛ sɛ́ so ndɔ ɛgarang nga. Nikpuru ɛbhɛ sɛ ne re ɛbhɛ ntsong.[149]

⁴Nibhɛ sɛ yaang ɛyisɛ ɛTaanggbey ya, irywɛɛk ɛTaanggbey yo ne so ne icwiri nibhɛ.

⁵Sɔng ɛtuk sɛ ta sonɛ dɔng nang. Sɔng nibhɛ sɛ ne ta tɔk ɛpitila ne iroy ne ifɛ yaa tol nibhɛ nang daa ɛli ne ɛDaray ɛTaanggbey ya ɛbhɛ sɛ́ nang nibhɛ iwɛwɛy de. Nibhɛ sɛ́ ne re igbɔm ba ishay-ishay.[150]

⁶ɛMalɛka gha ne yaak me, “iVol lɛdee wo so itin nɛ, ifɛ ne so sɛ kyinak daa ne ifɛ. ɛDaray ɛTaanggbey ya ne ɛbhɛ ɛ kɛ nang ninabawa na ikabyik ɛbhɛ de ɛbhɛ kɛ tom ɛmalɛka ɛbhɛ te ɛ tɔɔrek nikpuru ɛbhɛ nikɔn na ne iphɛ so nggbinggbing nibhɛ yaa phyɔngɔle nibhɛ tes.”

⁷ɛYɛso gha ne yɔngɔ, “Phok ɛn! N yek cɛcɛk ne yɛɛs! Ninaa ɛwɛng ngaa nggyɛy nɛ nibhɛ kɛ hyep ivol da ne kɛ tɔng ndɔ ne ɛwee yɛwoo wo!”

⁸Mee ɛYohana, mee nggɛ phok n da yaang nikɔn nɛnaa wo. Kɛ sɛ nggɛ phok n da yaang nikɔn nɛnaa wo gbik, ne n ji ho ne ita ɛmalɛka de ne ɛ kɛ tɔɔsel me nibhɛ wo te n re ɛbhɛ ntsong.

⁹ɛMalɛka ghe ne yaak me; “Sɔng ɛ mɔn ɛlɛ wo nang! Ma nzo ɛkpuru ɛTaanggbey ya te igyɛ wo nɛ nigwaa mo ninabawa na, gbik nɛ ninaa nɛ nibhɛ roos ibol ne ɛwee yɛdee wo. Re ɛTaanggbey ye ntsong ngga!”

¹⁰Ne ɛ ta yaak me; “Sɔng ɛ rɛɛ ivol da ne kɛ tɔng ndɔ ne ɛwee yɛwoo wo nang, daa ɛli ne nten nɛ ne yaa shwaak nikɔn nɛnaa wo yek cɛcɛk.

¹¹Gbik ɛnyi gha ne ɛ mɔn ibebhe de, te ɛ re ɛnu ɛyisɛ ne mɔn ibebhe de; te ɛnyi gha ne ɛ mɔn ɛkɔn ne ishis sa, te ne ɛ re ɛnu ɛyisɛ ne mɔn nikɔn ne ishis sa. Gbik ɛnyi gha ne ɛ hyel cik ko, te ne ɛ re ɛnu ɛyisɛ ne hyel cik ko, te ɛnyi gha ne kɛ tul kang ngo ma ne re ɛnu ɛyisɛ ne shɛɛ kang.”[151]

¹²“Phok ɛn, n yek cɛcɛk ne yɛɛs! Nzɛ ne boos nikɔn na ne naa tal ɛrɔngɔ nɛ, nzɛ ne tal ɛrɔngɔ ɛkɔn na ne ɛ kɛ mɔn.[152]

¹³Mee nzo ɛHaa ɛYisɛ yɛ ne ɛHaa ɛTsim mɛ, ɛHaa ne iTsa yɛ ne ɛHaa ne iTaal lɛ.[153]

¹⁴“Ninaa ɛwɛng ngaa nggyɛy nɛ nibhɛ kɛ kuus itsura nibhɛ, sɛ ne nang nibhɛ ɛnkiinɛ ne re iKpam ɛHon ne iKen da, nibhɛ ta roos ninu ne iduk nibhɛ lel ndɔ ɛgarang nga.[154]

¹⁵Ninyi na nɛ nibhɛ ne so ɛtsim ɛgarang nga sɛ ne so ɛlɛ: ninaa nɛ nibhɛ kɛ bees itso nibhɛ nɛ nikɔn ne ishis, nɛ ninaa ne ikyarakyut, nɛ ninaa ne ra nzangas, nɛ ninaa ne phobho ninyi, nɛ ninaa ne re igunkyi ntsong gbik nɛ ninaa ne saghe ne irywɛɛk nibhɛ ta i wul ifɛ.

¹⁶“Mee ɛYɛso, nggɛ tom ɛmalɛka nge te ɛ yɛɛs ɛ tɔng nyini ivol lɛdaa wo ndɔ ne ijwira ninaa ne roos da. Mee nzo iling ne ijwee ɛDoda, n da so icwaang ɛbhɛ. Ne nzo ɛgbaang ɛyuyɔrɔ ɛraam ne ihwɛlɛ ne ɛ tol.”

¹⁷iKabyik ge gbik ne ɛYɛl lo i bo, “Yɛɛs.” Gbik ɛnyi gha ne ɛ kɛ phok ibol lɛdee wo, te ne ɛ ma yɔngɔ; “Yɛɛs.” Gbik ɛnyi gha ne irway ɛbhɛ i has te ne ɛ yɛɛs. Gbik ɛnyi gha ne ɛ sim tɛ ne ɛ yɛɛs ɛ say inɛn ne iken da buu.[155]

¹⁸Mee ɛYohana, nzi ne sin itoro ninaa nɛ nibhɛ kɛ phok ivol da ne kɛ haa ndɔ ne ɛwee yɛdee wo. Wu ɛdɛ ɛnyi gha kɛ ne hante ne ɛkɔn daa ne ifɛ, ɛTaanggbey ya sɛ ne hante ɛbhɛ ne nggbang ngga ne kɛ haa ndɔ ne ɛwee yɛwoo wo.

¹⁹Wu ɛdɛ ɛnyi gha kɛ ne tɛ idɛ ibol de ne kɛ haa ndɔ ne ɛwee yɛwoo wo, ɛTaanggbey ya yaa ne tul ihop ɛbhɛ ndɔ ɛHon ne iKen na gbik ne ndɔ ɛgarang nga ne kɛ tul kang ngo, ne kɛ kpɛl ibol lɛ ndɔ ne ɛwee yɛwoo wo.

²⁰ɛNyi gha ne ɛ kɛ nang ishɛɛda ne ivol lɛdaa wo i bo; “ɛTsak n yek cɛcɛk ne yɛɛs.” Ɛɛy! Ne ɛ yɛɛs ɛDaray ɛYɛso yɔɔy!

²¹Te izɛɛng ɛDaray ɛYɛso de shɛɛ nɛ ninyi ɛTaanggbey ya gbik. Ɛɛy.