Read eten Nikɔn ne kɛ Phaal 4 Bible Online

Nikɔn ne kɛ Phaal 4 - eten bible

Nikɔn ne kɛ Phaal 4

¹Ɛtsim nikɔn nɛnaa wo ne n ji yɛɛn, ne n yaang ɛnu ne izuk phere daa ne irywa. iZɔlɔs de ne nggɛ i phok ihywɛ kɛɛ wungare te ɛntuntuung ngo ɛyisɛ gha ne yaak me, “Wara ɛ yɛɛs daa ɛbɛ, te n tɔɔrek kɛ ɛkɔn na ne iphɛ so nggbinggbing nibhɛ te ɛtsim ne ninaa na.”

²Nɛ nten nɛ, iKabyik ne lel ndɔ mee, ne n yaang ɛcuruu ne igbɔm daa ne irywa, ɛdɛ ɛnyi gha kɛ soos nɛ.

³ɛNyi gha ne ɛ kɛ soos ɛcuruu ne igbɔm ma ne i tol nggyɛnggyɛl te idɛ kpɛɛ ne izel da ne i bok idɛng iyasipa, i yaak idɛng ikaniliya. iSheng-iroy ne ihywɛ i tol te idɛ ikɛɛ de ne i bok iphɛ ɛmirad ne te ɛcuruu ne igbɔm ma gyɔɔ. iKɛɛ yɛdee nggyɛ wo ne so isii yɛ te ihway.

⁴Nidɛng nicuruu ne igbɔm ma nzuwubɔ ifaa nɛ nibhɛ nwaas ne so ɛnggyɛ wo nibhɛ kɛ te ɛcuruu ne igbɔm mɛghaa nggyɛ wo gyɔɔ. Ninu ne ikɔɔn nzuwubɔ ifaa nɛ nibhɛ nwaas kaa ne sooset daa nicuruu ne igbɔm ma, nibhɛ bok itsura ihwala, nɛ nikɔn ne ito ne igbɔm ne izinariya.

⁵ɛLɔ ne te derep ne irywa ne wunga ne ɛgbaang ne izɔlɔs ne i wuusi ɛcuruu ne igbɔm ma. ɛNu ɛyisɛ ɛ ɛcuruu ne igbɔm ma, ifitila ɛniitaa ne i re gbom. iFɛ ifɛ soye iKpabyik ɛniitaa ɛTaanggbey da.[22]

⁶ɛNu ɛyisɛ ɛcuruu ne igbɔm ma dɔng, ɛdɛ ɛkɔn na ne ta sonɛ ne ɛ so te igyilas ɛ so bɛbhɛrɛng te ɛling, ɛɛ tol nggyɛnggyɛl te ɛmɔdɔbi. Nidɛng nikɔn niken na nwaas ne ɛTaanggbey kɛ ryɔng ne so ɛceree nibhɛ kɛ te ɛcuruu ne igbɔm ba gyɔɔ. Nikɔn niken nɛnaa nggyɛ wo bok irwisɛ ne ibek, ne ɛyisɛ, gbik ne ɛtsim.

⁷ɛKɔn ɛyisɛ yɛ ndɔ nikɔn niken na ne so te ɛkuramanza, ɛhaa ne ifaa yɛ ne so te ɛgbaang ne ɛrandɔng, ɛhaa ne itwat tɛ ne bok ɛyisɛ ɛten ɛsii, ɛhaa ne nwaas sɛ ne so te ika ne ɛ kɛ yeret.[23]

⁸ɛRɔngɔ ndɔ nikɔn niken nwaas sɛnaa nggyɛ wo ne bok ivaat ɛtaraa, nibhɛ ne bok irwisɛ ne ibek nibhɛ gbik ne ndɔ ɛta ne ivaat tɛ. Nibhɛ ne ku i yaak ne iywel ne igbey ne ɛtuk, sɔng nibhɛ kɔɔng nge nang. Nibhɛ ne yaak ne iywel lo nibhɛ bo, “ˆƐ so kang! ˆƐ so kang! ˆƐ so kang! ɛDaray ɛTaanggbey ne iTo Gbik ka so kang! Ɛbhɛ kaa ku sonɛ, ɛbhɛ ne ɛ sonɛ ɛlyilyɛghaa, ɛbhɛ sɛ ne ta yaaso.”

⁹Nikɔn niken nwaas sɛnaa nggyɛ wo ne i yaak ɛhaa ɛcuruu ne igbɔm ma ne iywel, nibhɛ i dɛp ɛbhɛ, nibhɛ naas ɛbhɛ ne ndiinday, nibhɛ tɔɔsel ɛbhɛ irway ihwala. Ne i sɛ nibhɛ kɛ yɛk ne iywel lo,

¹⁰ninu nikɔɔn nzuwubɔ ifaa nɛ nibhɛ nwaas sa, ne ma hoghɛse nggbuk ɛnu ɛyisɛ ɛhaa ɛcuruu ne igbɔm ma, ne ɛ so ɛken ne ishay-ishay de, nibhɛ re ɛbhɛ ntsong. Nibhɛ ne i teesek nikɔn ne ito ne igbɔm nibhɛ na ɛnu ɛyisɛ ɛcuruu ne igbɔm ma, nibhɛ yɔngɔ:

¹¹“ɛDaray ɛTaanggbey mos, ˆɛ kɛ hɔn ɛ sɛ say ndiinday, ne igbom, ne ito. Daa ɛli ne ˆɛ kɛ ryɔng nikɔn na gbik, kɛ lenɛ ne sim mo i ryɔng nibhɛ, nibhɛ sonɛ, nibhɛ so niken.”