Read ewe Mose I 11 Bible Online

Mose I 11 - ewe bible

Mose I 11

¹Ke gbe ɖeka kple nuƒoƒo ɖeka ŋugbe le amegbetɔwo katã nu.

²Eye wòva me bena, esi wodze mo ɖo ta ɣedzeƒe gome la, wokpɔ gbadzaƒea ɖe le Sinear-nyigba dzi, eye wonɔ afima.

³Eye wogblɔ na wo nɔewo bena: Mina míamè anyikpe, eye míaƒo dzoe! Ale anyikpe zu xɔtukpe na wo, eye aŋɔ le akaloba teƒe na wo.

⁴Eye wogblɔ bena: Mina míatso du, eye miatu mɔ̃ kɔkɔa ɖe, si tame nato dziƒo, ne míaƒe ŋkɔ nanyɔ, bena míagakaka ɖe anyigba blibo la katã dzi o!

⁵Tete Yehowa ɖi va anyi, be yeakpɔ du kple mɔ̃ kɔkɔ, si amegbetɔviwo le tutum la ɖa.

⁶Eye Yehowa gblɔ bena: Kpɔ ɖa, dukɔ ɖeka wonye, eye gbe ɖeka le wo katã nu, eye esia nye woƒe nuwɔwɔ ƒe gɔmedzedze ko; azɔ nusianu, si dim wole be, woawɔ la, womado kpoe o.

⁷Mina míaɖi ayi afima, ne míatɔtɔ woƒe gbe, bena amea ɖeke nagase nɔvia ƒe gbe o!

⁸Eye Yehowa na bena, wokaka tso afima ɖe anyigba blibo la katã dzi, eye wodzudzɔ ɖu la tsotso.

⁹Eyata woyɔnɛ bena Babel, le esi Yehowa tɔtɔ amegbetɔwo katã ƒe gbe le afima, eye Yehowa na wokaka tso afima ɖe anyigba blibo la katã dzi ta.

¹⁰Esia nye Sem ƒe dzidzimeviwo ŋutinya. Esime Sem xa ƒe alafa ɖeka la, edzi Arpaxsad, le ƒe evelia me le tsiɖɔɖɔ la megbe.

¹¹Esi Sem dzi Arpaxsad megbe la, eganɔ agbe ƒe alafa atɔ̃, eye wòdzi ŋutsuwo kple nyɔnuwo.

¹²Esi Arpaxsad xɔ ƒe blaetɔ̃ vɔ atɔ̃ la, edzi Selax.

¹³Eye esi Arpaxsad dzi Selax megbe la, eganɔ agbe ƒe alafa ene kple etɔ̃, eye wòdzi ŋutsuwo kple nyɔnuwo.

¹⁴Esi Selax xɔ ƒe blaetɔ̃ la, edzi Eber.

¹⁵Eye esi Selax dzi Eber megbe la, eganɔ agbe ƒe alafa ene kple etɔ̃, eye wòdzi ŋutsuwo kple nyɔnuwo.

¹⁶Esi Eber xɔ ƒe blaetɔ̃ vɔ ene la, edzi Peleg.

¹⁷Eye esi Eber dzi Peleg megbe la, eganɔ agbe ƒe alafa ene kple blaetɔ̃, eye wòdzi ŋutsuwo kple nyɔnuwo.

¹⁸Esi Peleg xɔ ƒe blaetɔ̃ la, edzi Regu.

¹⁹Eye esi Peleg dzi Regu megbe la, eganɔ agbe ƒe alafa eve kple asieke, eye wòdzi ŋutsuwo kple nyɔnuwo.

²⁰Esi Regu xɔ ƒe blaetɔ̃ vɔ eve la, edzi Serug.

²¹Eye esi Regu dzi Serug megbe la, eganɔ agbe ƒe alafa eve kple adre, eye wòdzi ŋutsuwo kple nyɔnuwo.

²²Esi Serug xɔ ƒe blaetɔ̃ la, edzi Naxor.

²³Eye esi Serug dzi Naxor megbe la, eganɔ agbe ƒe alafa eve, eye wòdzi ŋutsuwo kple nyɔnuwo.

²⁴Esi Naxor xɔ ƒe blave vo asieke la, edzi Tarax.

²⁵Eye esi Naxor dzi Tarax megbe la, eganɔ agbe ƒe alafa ɖeka kple wuiasieke, eye wodzi ŋutsuwo kple nyɔnuwo.

²⁶Eye esi Tarax xɔ ƒe blaadre la, edzi Abram, Naxor kple Haran.

²⁷Tarax ƒe dzidzimeviwo ŋutinya enye si: Tarax dzi Abram. Naxor kple Haran; eye Haran dzi Lot.

²⁸Ke Haran tre kuku na fofoa Tarax le Kaldea-nyigba dzi le wo de Ur.

²⁹Eye Abram kple Naxor woɖe srɔ̃; Abram srɔ̃ ŋkɔ nye Sarai, eye Naxor srɔ̃ ŋkɔ nye Milka, amesi nye Haran, Milka kple Yiska fofo ƒe vinyɔnu.

³⁰Ke Sarai tsi ko, vi mele esi o.

³¹Eye Tarax ʋu kple via Abram kple tɔgbuiyɔvia Lot, si nye Haran vi, hekpe ɖe Sarai, via Abram srɔ̃ ŋuti tso Ur le Kaldea, bene wòayi Kanaan-nyigba dzi Ke esi wova Xaran la, wònɔ afima.

³²Eye Tarax ƒe agbe me ŋkekewo katã nye ƒe alafa eve kple atɔ̃, eye Tarax ku le Xaran.