Read ewe Mose I 21 Bible Online

Mose I 21 - ewe bible

Mose I 21

¹Ke Yehowa ɖo ŋku ŋugbe, si wòɖo na Sara la dzi, eye Yehowa wɔ na Sara, abe alesi wògblɔ ene.

²Ale Sara fɔ fu, eye wòdzi ŋutsuvi na Abraham le eƒe amegãkuku me le ɣeyiɣi, si Mawu gblɔ ɖi xoxo la dzi.

³Eye Abraham yɔ ŋutsuvi, si Sara dzi nɛ la ƒe ŋkɔ bena Isak.

⁴Esi via Isak xɔ ŋkeke enyi la, Abraham tso aʋa ne, abe alesi Yehowa de se nɛ ene.

⁵Ke Abraham xɔ ƒe alafa ɖeka, esime wodzi via Isak nɛ.

⁶Eye Sara gblɔ bena: Mawu do nukokoe nam, eye amesiame, si asee la, ako nu le ŋutinye.

⁷Eye wògblɔ bena: Ameka susu le Abraham ŋuti bena, Sara ana no viwò mahã? Elabena medzi ŋutsuvi nɛ le eƒe amegãkuku me.

⁸Eye ɖevi la tsi, eye wòɖi no, eye gbesigbe Isak ɖi no la, Abraham ɖo kplɔ̃ gãa ɖe.

⁹Ke esi Sara kpo bena, Egipte-nyɔnua Hagar ƒe vi, si wòdzi na Abraham, lɔ̃a gaflumuwɔwɔ la,

¹⁰egblɔ na Abraham bena: Nyã kosi sia kple via ɖa; elabena kosi sia ƒe vi mate ŋu anyi dome kple vinye Isak o.

¹¹Ke nya la medze Abraham ŋu o le viaŋutsu la ta.

¹²Eye Mawu gblɔ na Abraham bena: Megana nya sia nave wò le ŋutsuvi la kple wò kosi la ta o; ke boŋ ɖo to Sara le nusianu, si wodi tso gbɔwò la me, elabena Isak me wò dzidzime-viwo adzo tso.

¹³Ke mana dukɔ nadzo tso kosi la ƒe vi hã me, elabena viwoe.

¹⁴Eye Abraham fɔ ŋdi kanya tso abolo, eye woku tsi ɖe lãgbalẽgolo me taŋ, eye wotsɔ ɖevi la kple nu mawo ɖo abɔta na Hagar hedo mɔ wo. Ke esi wole yiyim la, wova tra mɔ le Beer-Seba gbe dzi.

¹⁵Esi lãgbalẽgolo me tsi la vɔ la, etsɔ ɖevi la yi ɖamlɔ ati dodoea ɖe te,

¹⁶eye wòyi ɖabɔbɔ na ɖevi la kasa le adzɔge boo, wo dome didi abe aŋutrɔ ƒe duɖiɖi me ene; elabena egblɔ bena: Nyemate ŋu akpa ɖevi la ƒe kuƒe o. Eyata wòyi ɖabɔbɔ no adzɔge boo ɖo; tete ɖevi la de asi avifafa me sesĩe.

¹⁷Ke Mawu se ɖevia ƒe avifafa, eye mawudɔla yɔ Hagar tso dziƒo gblɔ nɛ bena: Hagar, nuka le wɔwòm? Megavɔ̃ o, elabena Mawu se ɖevi la ƒe gbe tso afisi wòle.

¹⁸Tsi tre, yi ɖakɔ ɖevi la, eye nalée ɖe asi, elabena mana woazu dukɔ gãa ɖe.

¹⁹Tete Mawu ʋu eƒe ŋkuwo, eye wòkpɔ tsivudoa ɖe. Enumake woyi ɖaku tsi ɖe lãgbalẽgolo la me taŋ, eye wòna ɖevia wono.

²⁰Eye Mawu nɔ kple ɖevi la, eye wòtsi, eye wònɔ gbe dzi hezu aŋutrɔdala.

²¹Eye wònɔ Paran-gbe dzi, eye dada ɖe srɔ̃ nɛ tso Egipte-nyigba dzi.

²²Le ɣemaɣi me la Abimelex kple eƒe aʋafia Pixol wogblɔ na Abraham bena: Mawu li kpli wò le nusianu, si nèwɔna la me.

²³Azɔ ka atam le Mawu ƒe ŋku me le afisia be, nagable nye ŋutɔ, vinyewo kple nye dzidzimeviwo o! Abe alesi meve nu wòe ene la, nenema ke wò hã nawɔ nam kple anyigba, si dzi nènye amedzro le la!

²⁴Eye Abraham gblɔ bena: Melɔ̃, maka atam la.

²⁵Tete Abraham ƒo nu kple Abimelex le tsivudo, si eƒe dɔlawo xɔ sesẽe la ŋuti.

²⁶Abimelex xɔ edzi ne bena: Nyemenya amesi wɔ nu sia o, eye wò hã mègblɔ nyaa ɖeke le eŋuti nam kpɔ o, egbe ko hafi nye hã mese nyaa ɖe le eŋu.

²⁷Tete Abraham tsɔ alẽwo kple nyiwo na Abimelex, eye wo kple eve wòbia nu.

²⁸Ke Abraham ɖe alẽvi adre ɖo vovo.

²⁹Eye Abimelex bia Abraham be: Alẽvi adre, siwo neɖo vovo la gome ɖe?

³⁰Eɖo ŋu nɛ bena: Alẽvi adre siawo naxa le asinye, ne wòanye ɖase nam bena, nyee ɖe vudo sia.

³¹Eyata woyɔ teƒe ma bena: Beer-Seba, elabena afima wo ame eve la woka atam na wo nɔewo le.

³²Eye esi wòbia nu le Beer-Seba la, Abimelex kple eƒe aʋafia Pixol wodze mɔ gatrɔ yi ɖe Filistitowo ƒe anyigba dzi.

³³Eye Abraham do atiwo ɖe Beer-Seba, eye wòyɔ Yehowa Mawu, si le agbe tegbee la ƒe ŋkɔ dzi le afima.

³⁴Ke Abraham nye amedzro le Filistitowo ƒe anyigba dzi eteƒe didi.