Read ewe Mose I 23 Bible Online

Mose I 23 - ewe bible

Mose I 23

¹Sara xɔ ƒe alafa ɖeka kple blave vɔ adre; esia nye Sara ƒe agbe me ƒewo.

²Eye Sara ku le Kiryat-Arba, eya nye Xebron le Kanaan-nyigba dzi. Eye Abraham va, be wòafa konyi, eye wòafa avi na Sara.

³Eye Abraham tso le ame kuku la gbɔ, eye wòƒo nu kple Xitiviwo bena:

⁴Amedzro menye le mia dome, mina ameɖiƒem, bena matsɔ nye ame kuku la aɖi ɖe afima!

⁵Eye Xitiviwo ɖo ŋu na Abraham bena:

⁶Amegã, se mía gbe! Mawu ƒe ame ɖoɖoa nenye le mia dome; ɖi wò ame kuku la ɖe míaƒe ame veviwo ɖiƒe. Mía dometɔa ɖeke magbe bena, megaɖi wò ame kukua ɖe eƒe ameɖiƒe o.

⁷Tete Abraham tsi tre, eye wobɔbɔ na anyigbadzitɔ, siwo nye Xitiviwo,

⁸eye wòƒo nu kpli wo bena: Ne mielɔ̃ bena, maɖi nye ame kukua la, ekema miɖo tom, eye miɖe kuku na Efron Zoxar-vi nam

⁹be, wòatsɔ eƒe kpeto Maxpela, si le eƒe agble ƒe nuwuƒe la nam, eye maxe fe ɖe eta blibo, ne wòanye nye ameɖiƒe koŋ le mia dome.

¹⁰Ke Efron le Xitiviawo dome Eye Efron Xititɔ la ɖo ŋu na Abraham le Xitiviwo kple amesiwo katã va dua me la ƒe ŋku me bena:

¹¹Nye amegã, ɖo tom! Metsɔ agble lã kple kpeto, si le eme la, ke wò. Le nye dumetɔwo katã ŋku me metsɔe ke wò, ɖi wò ame kuku la ko!

¹²Tete Abraham bɔbɔ na duametɔwo,

¹³eye wòɖo ŋu na Efron bena: Mi duameviwo misee! Maxe fe ɖe agble la ta; meɖe kuku na wò, xɔ ga le asinye, be mate ŋu aɖi nye ame kukua ɖe afima!

¹⁴Efron ɖo ŋu na Abraham bena:

¹⁵Amegã, se nye gbe! Anyigba, si ke xɔ klosalo sekel alafa ene la, nuka wònye le mía kpli wò domee? Ɖi wò ame kukua ko.

¹⁶Abraham ɖo to Efron, eye Abraham xlẽ ho, si Efron yɔ le Xitiviawo ŋku me la ne, klosalo sekel alafa ene, ga nyui, si asitsalawo xɔna.

¹⁷Ale Efron ƒe agble, si le Maxpela le Mamre kasa, agble la kple kpeto, si le eme, kple ati, siwo katã le agblea me godoo la,

¹⁸zu Abraham tɔ le Xitiviawo kple amesiwo katã va dua me la ŋku me.

¹⁹Esia megbe la Abraham ɖi srɔ̃a Sara ɖe kpeto, si le Maxpela-gblea me la me le Mamre kasa; esia enye Hebron le Kanaan-nyigba dzi.

²⁰Ale Xitiviwo ɖe asi le agble la kple kpeto, si le eme la ŋuti na Abraham, be wòanye ameɖiƒe nɛ koŋ.