Read ewe Mose I 30 Bible Online

Mose I 30 - ewe bible

Mose I 30

¹Ke esi Raxel kpɔ bena, yemedzi via ɖeke na Yakob o la, Raxel ʋã ŋu nɔvianyɔnu la, eye wògblɔ na Yakob bena: Na madzi vi; ne menye nenem o la, maku!

²Tete Yakob do dɔmedzoe ɖe Raxel ŋuti gblɔ bena: Alo Mawu ye menye, amesi xe wò vidzidɔa?

³Eye wògblɔ bena: Nye kosi Bilha enye si, ɖɔ kplii, bena wòadzi vi ɖe nye akɔ, eye maxɔ mamayɔvi tso egbɔ!

⁴Eye wòtsɔ eƒe kosi Bilha ne wòde, eye Yakob dɔ kplii.

⁵Eye Bilha fɔ fu dzi ŋutsuvi na Yakob.

⁶Tete Raxel gblɔ bena: Mawu tso afia nam, ese nye gbe, eye wòna ŋutsuvim. Eyata wòna ŋkɔe be Dan.

⁷Eyome la Raxel ƒe kosi Bilha gafɔ fu, eye wòdzi ŋutsuvi evelia na Yakob.

⁸Eye Raxel gblɔ bena: Meʋli heƒo koko na Mawu le nɔvinye ta, meɖu dzi Eyata wòna ŋkɔe bena Naftali.

⁹Ke esi Lea kpɔ bena, yemegale vi dzim o la, etsɔ eƒe kosi Silpa na Yakob wòɖe.

¹⁰Eye Silpa, Lea ƒe kosi la, dzi ŋutsuvi na Yakob.

¹¹Tete Lea gblɔ bena: Nye Mawu ɖi! Eye wòna ŋkɔe be Gad.

¹²Eyome Silpa, Lea ƒe kosi la, gadzi ŋutsuvi evelia na Yakob.

¹³Tete Lea gblɔ bena: Mekpɔ dzɔgbe nyui! Azɔ vinyɔnuwo akafum bena, dzɔgbenyuitɔ menye. Eyata wòna ŋkɔe be Aser.

¹⁴Le luŋeɣi la Ruben yi agble me, eye wòkpɔ agbitsa tsɔ vɛ na dada Lea. Tete Raxel gblɔ na Lea bena: Meɖe kuku, na viwò ƒe agbitsa la ɖem!

¹⁵Eɖo ŋu nɛ bena: Alo mesɔ gbɔ be, nèxɔ srɔ̃nye le asinye oa? Azɔ nèle didim be, nagaxɔ vinye ƒe agbitsa hãa? Tete Raxel gblɔ bena: Ekema nedɔ gbɔwò egbe zã ɖe viwò ƒe agbitsa la nu!

¹⁶Esi Yakob gbɔ tso gbe me le fiẽ la, Lea yi ɖakpee gblɔ bena: Gbɔnyee nava, elabena mexe fe ɖe tawo kple vinye ƒe agbitsa! Eye wòdɔ egbɔ le zã ma me.

¹⁷Eye Mawu ɖo to Lea, eye wòfɔ fu dzi ŋutsuvi atɔ̃lia na Yakob.

¹⁸Eye Lea gblɔ bena: Mawu xe fe nam, elabena metsɔ nye kosi na srɔ̃nye wòɖe. Eyata wòna ŋkɔe be Isaxar.

¹⁹Eyome Lea gafɔ fu, eye wòdzi ŋutsuvi adelia na Yakob.

²⁰Tete Lea gblɔ bena Mawu na nu nyuia ɖem, azɔ srɔ̃nye abum, elabena medzi ŋutsuvi ade nɛ. Eyata wòna ŋkɔe be Zebulon.

²¹Emegbe la edzi nyɔnuvi, eye wòna ŋkɔe be Dina.

²²Tete Mawu ɖo ŋku Raxel dzi, eye Mawu ɖo toe, eye wòʋu eƒe vidzidɔ.

²³Eye wòfɔ fu dzi ŋutsuvi, tete wògblɔ bena: Mawu ɖe nye ŋukpe ɖa!

²⁴Eyata wòna ŋkɔe be Yosef; elabena egblɔ be: Yehowa agatsɔ ŋutsuvi bubu akpee nam.

²⁵Ke esi Raxel dzi Yosef megbe la, Yakob gblɔ na Laban bena: Do mɔm, ne mayi mía de.

²⁶Tsɔ srɔ̃nye kple vinye, siwo ta mesubɔ wò ɖo la nam, ne madzo; elabena wò ŋutɔ ènya alesi mesubɔ wòe!

²⁷Tete Laban gblɔ nɛ bena: Ve nunye dzro! Elabena medze sii bena, Yehowa yram le tawo.

²⁸Eye wògayi edzi bena: Gblɔ fetu, si dim nèle la nam, ne mana wò!

²⁹Eɖo ŋu nɛ bena: Wò ŋutɔ ènya alesi mesubɔ wòe, kple alesi wò lãha va zu le gbɔnye.

³⁰Nusi le asiwò hafi meva la, ele sue ko; ke azɔ la edzi ɖe dzi ŋutɔ, eye afisiafi, si meto la, Yehowa yraa wò; ke ɣekaɣi gɔ̃e nye hã mawɔ dɔ na ɖokuinye?

³¹Tete wògblɔ bena: Nuka mana wò? Yakob ɖo ŋu bena: Nyemaxɔ agaga femee hã le asiwò o, negbe ne alɔ nusi magblɔ na wò la dzi ko; na maganyi wò alẽwo, eye makpɔ wo dzi.

³²Egbe la matsa le wò lãha la katã me, eye maɖe lã, siwo le ŋɔtaŋɔta, kple esiwo tso kpɔ la, ɖe vovo: Alẽvi, siwo le yibɔ, kple gbɔ̃, siwo tso kpɔ, kple esiwo le ŋɔtaŋɔta la, nanye nye fetu!

³³Gbesigbe nava kpɔ nye fetua ɖa la, ekema nye anukwareɖiɖi adze ƒã; ne àkpɔ gbɔ̃, si mele ŋɔtaŋɔta o, kple esi metso kpɔ o, kpakple alẽvi, si mele yibɔ o la, ekema ɖe mefii.

³⁴Laban ɖo ŋu bena: Nenɔ nenema, abe alesi negblɔ ene.

³⁵Gbemagbe ke wòɖe gbɔ̃tsu, siwo me fli to, kple esiwo tso kpɔ, kple gbɔ̃nɔ, siwo katã le ŋɔtaŋɔta, kple esiwo tso kpɔ — lã sia lã, si me ɣi to — kpakple alẽvi, siwo le yibɔ la, ɖe vovo, eye wòde wo asi na viawo.

³⁶Eye wòɖo be, ye kple Yakob dome mɔ nadidi ŋkeke etɔ, eye Yakob nyi Laban ƒe lã mamleawo.

³⁷Tete Yakob tsɔ logo, xe kple nyati mumuwo, eye woŋlɔ wo ŋu ale: eɖe tsroa ɖe le wo ŋu, eye wòkpɔtɔ ɖe ɖe wo ŋu.

³⁸Emegbe la etsɔ ati, siwo woŋlɔ la, da ɖe lãwo ƒe tsinonu me, eye ne lãwo le asi yɔm le tsinɔƒea la, etsɔa wo dana ɖe woƒe ŋku me.

³⁹Eye ne lãwo lé ŋku ɖe atiawo ŋu hafi fɔ fu la, ekema wodzia vi, siwo me fũ to, kple esiwo le ŋɔtaŋɔta, kple esiwo tso kpɔ.

⁴⁰Eye Yakob ɖe lãviawo ɖo Laban ƒe lã, siwo le ŋɔtaŋɔta, kple esiwo tso kpɔ la kasa. Ale wòɖo lãha tɔxe na eɖokui, eye mena wotɔtɔ kple Laban towo o.

⁴¹Eye ne lã sesẽtɔwo le asi yɔm la, Yakob tsoa ati ŋɔŋlɔawo dana ɖe lãwo ƒe ŋku me le tsinonu la mè, bena woafɔ fu ɖe ati ŋɔŋlɔawo ŋu.

⁴²Ke nenye lã beliwoe la, metsɔnɛ ɖoa woƒe ŋku me o; eyata lã beliawo zua Laban tɔ, ke sesẽawo zua Yakob tɔ.

⁴³Eye ŋutsu la ƒe kesinɔnuwo le dzidzim ɖe dzi ŋutɔ, eye wòkpɔ alẽwo kple gbɔwò, kosiviwo kple kluviwo, kposɔwo kple tedzi geɖewo?