Read ewe Mose I 40 Bible Online

Mose I 40 - ewe bible

Mose I 40

¹Le nya siawo megbe la Egipte-fia ƒe ahakula kple aboloƒola woda vo ɖe woƒe aƒetɔ, Egipte-fia ŋuti.

²Eye Farao do dɔmedzoe ɖe eŋuti me eveawo, ahakulawo ƒe amegã kple aboloƒola wo ƒe amegã ŋuti.

³Eye wotsɔ wo de gaxɔ, si le fia ŋuti mewo ƒe amegã ƒe xɔ, si me wode Yosef hãe la me.

⁴Fia ŋuti mewo ƒe amegã la tsɔ wo de Yosef si, bena wòakpɔ wo dzi, eye wonɔ gaxɔ me ɣeyiɣi didia ɖe.

⁵Gbe ɖeka ƒe zã Egipte-fia ƒe ahakula kple aboloƒola, siwo le gaxɔ me la, woku drɔ̃e wo tɔ wo tɔwoe, eye drɔ̃eawo gɔme le vovovo.

⁶Esi Yosef va wo gbɔ le ŋdi la, ekpɔ wo bena, woli kpoo.

⁷Tete wòbia Farao ŋuti me, siwo le gaxɔ me kplii le eƒe aƒetɔ ƒe xɔ me la, bena: Nuka wɔ mieɖo adã egbea ale?

⁸Woɖo eŋu nɛ bena: Míeku drɔ̃e, gake amesi aɖe egɔme, meli o. Tete Yosef gblɔ na wo bena: Alo drɔ̃e gɔmeɖeɖe la menye Mawu fɔe oa? Gake milii nam ko!

⁹Tete ahakulawo ƒe amegã lĩ eƒe drɔ̃e la na Yosef, eye wògblɔ nɛ bena: Meku drɔ̃e kpɔ weinkaa ɖe le ŋkunye me.

¹⁰Alɔ etɔ̃ le weinka sia ŋu, eye esi wode asi dzedze me la, seƒoƒo ɖo wo dzi, eye woƒe tsetsewo de asi ɖiɖi me.

¹¹Ke Farao ƒe kplu la le asinye; tete megbe weinkpoawo, eye mefiã wo ɖe Farao ƒe kplu la me, emegbe metsɔ kplu la de asi na Farao.

¹²Yosef ɖo ŋu nɛ bena: Drɔ̃e la gɔme enye si: Alɔ etɔ̃awo nye ŋkeke etɔ̃.

¹³Le ŋkeke etɔ̃agbe la Farao ado wò ɖe dzi, eye wòagatsɔ wò aɖo wò dɔ nu. Eye nagatsɔ kplu ade Farao si, abe alesi nèwɔna tsã, esi nenye eƒe ahakula ene.

¹⁴Ke ɖo ŋku dzinye, ne eva nyo na wò! Meɖe kuku, ve nunye, eye naɖo ŋku dzinye na Farao, bena wòaɖem le xɔ sia me.

¹⁵Elabena yakatsyɔe wofim le Hebritɔwo ƒe anyigba dzi, eye afi sia hã nyemewɔ naneke, hafi wolém de ga o.

¹⁶Esi aboloƒolawo ƒe amegã kpɔ bena, drɔ̃e la gɔme nyo la, egblɔ na Yosef bena: Nye hã meku drɔ̃e, eye metsɔ abolo kusi etɔ̃ ɖe ta.

¹⁷Ke kusi etametɔ me la abolo vivi vovovowo li na Farao, eye xeviwo va le wo ɖum de kusia me le tanye.

¹⁸Yosef ɖo ŋu nɛ bena: Drɔ̃e la gɔme enye si: Kusi etɔ̃awo nye ŋkeke etɔ̃.

¹⁹Le ŋkeke etɔ̃agbe la Farao atso ta le nuwo, eye woahe wò ɖe ati ŋu, eye xeviwo ava ɖu wò ŋutilã.

²⁰Le ŋkeke etɔ̃agbe la Farao ɖu eƒe dzigbe, eye wòɖo kplɔ̃ na eƒe dɔlawo katã, eye wòɖe ahakulawo ƒe amegã kple aboloƒolawo ƒe amegã le gaxɔa me le eƒe dɔlawo katã ƒe ŋku me.

²¹Egatsɔ ahakulawo ƒe amegã la ɖo eƒe ahakudɔ nu, bena wòagatsɔ kplu anɔ asi ɖem na Farao.

²²Ke ena wohe aboloƒolawo ƒe amegã ya ɖe ati ŋu, abe alesi Yosef ɖe egɔme na wo ene.

²³Ahakulawo ƒe amegã megaɖo ŋku Yosef dzi o, ke boŋ eŋlɔe be.