Read ewe Samuel II 13 Bible Online

Samuel II 13 - ewe bible

Samuel II 13

¹Esia megbe la Dawid vi Absalom nɔvinyɔnu Tamar, si dze tugbe la, ƒe nu lé dzi na Dawid vi Amnon.

²Eye wòve Amnon, vaseɖe esime wòzu da dze edzi le nɔvianyɔnu Tamar ta, elabena ɖetugbi wònye, eye Amnon menya alesi gɔ̃ woawɔ awɔ nane kplii o.

³Xɔlɔ̃a ɖe le Amnon si, eŋkɔ nye Yonadab, Dawid nɔvi Simea vi; eye Yonadab dze aɖaŋu ŋutɔ.

⁴Eye wògblɔ nɛ bena: Fia vi, nukaŋuti nèle ku ɖim gbesiagbe ale? Màgblɔe nam oa? Tete Amnon gblɔ nɛ bena: Absalom nɔvinyɔnu Tamar ƒe nue lé dzi nam.

⁵Eye Yonadab gblɔ ne bena: Yi ɖamlɔ wò aba dzi, eye nalé kpɔ̃dɔ; eye ne fofowò va kpɔ wò ge ɖa la, ekema gblɔ ne bena: Na nɔvinye Tamar nava na nuɖuɖum! Ne eva ɖa nua le ŋkunye me mekpɔ la, ekema maɖu nua le esi me.

⁶Eye Amnon mlɔ anyi le kpɔ̃dɔ lém, eye esi fia la va ekpɔ ge ɖa la, Amnon gblɔ na fia la bena: Na nɔvinyenyɔnu Tamar nava to tatali eve te ŋkunye me, ne wòalé ɖe asi maɖu!

⁷Tete Dawid ɖo ame ɖe Tamar ƒe me be, woagblɔ nɛ be: Yi nɔviwò Amnon ƒe me, eye naɖa nu ne!

⁸Eye Tamar yi nɔvia Amnon ƒe me, esime wòmia anyi. Eye wòka amɔwɔ, blui, eye wòmlii heta tataliawo le eŋku me.

⁹Eye wòtree le nutɔgba me le eŋku me: ke egbe be, yemaɖu nua o. Eye Amnon gblɔ bena: Na amesiame nado le gbɔnye! Tete amesiame do le egbɔ.

¹⁰Azɔ Amnon gblɔ na Tamar bena: Tsɔ nuɖuɖua va xogã me, ne nalée ɖe asi maɖu! Eye Tamar tsɔ tatali, si wòtɔ la, yi na nɔvia Amnon le xɔgã me.

¹¹Esi wòtsɔe nɛ, be woaɖu la, elée gblɔ nɛ bena: Nɔvinyenyɔnu, va mlɔ gbɔnye!

¹²Ke eɖo ŋu bena: Kpao, nɔvinye! Megagblẽm o, elabena womewɔna alea le Israel o! Megawɔ ŋukpenanu sia o!

¹³Ke nye ɖe, afika mayi kple nye ŋukpe la? Eye wòabu wò ɖe ŋukpenanuwɔlawo dome le Israel. Ƒo nu kple fia la, elabena matem wò o!

¹⁴Ke egbe toɖoɖo eƒe gbe, eye wòlée zi edzi hegblẽe.

¹⁵Ke azɔ Amnon lé fui vevie ŋuta, ele fui wu alesi wòlɔ̃e tsã gɔ̃ hã. Eye Amnon gblɔ ne bena: Tsi tre, nadzo!

¹⁶Eɖo ŋu ne bena: Megawɔe o, elabena esi nèle nyãyem la, eya vɔ̃ɖi ɖe dzi wu nusi ne wo ɖe ŋunye gbã! Ke egbe toɖoɖoe.

¹⁷Eye wòyɔ ɖekakpui, si le esubɔm la ɖa, gblɔ bena: Mihe amesia do goe le gbɔnye do ɖe mɔ dzi, eye mido nɔa ɖe emegbe!

¹⁸Edo awu ʋlayaa ɖe; elabena alea fia vinyɔnu, siwo nye ɖetugbiwo la, doa awui tso blema ke. Eye eƒe dɔla hee do goe do ɖe ma dzi hedo oa ɖe emegbe.

¹⁹Eye Tamar ku afi kɔ ɖe ta me, eye wòdze awu ʋlaya, si wòdo la, eye wòkpla asi ta le boboe dom le yiyim.

²⁰Tete nɔvia Absalom gblɔ nɛ bena: Ɖe nɔviwò Amnon va gbɔwòa? Nɔvinye, zi ɖoɖoe; elabena nɔviwòe! Megana nya sia natɔ dzi na wò o! Eye Tamar nɔ aga le nɔvia Absalom ƒe me.

²¹Esi fia Dawid se nya siawo katã la, eku dzi ne ŋutɔ.

²²Ke Absalom megblɔ nya vɔ̃ alo nyuia ɖeke na Amnon o; elabena Absalom lé fu Amnon, le esi wogblẽ nɔvianyɔnu Tamar ta.

²³Eye wòva me le ƒe eve megbe, esime Absalom le fu kom na alẽwo le Baal-Xazor, si le Efrayim gbɔ la, Absalom kpe fia viŋutsuwo katã.

²⁴Eye Absalom va fia la gbɔ gblɔ bena: Kpɔ ɖa, wò ɖɔla le fu kom na alẽwo, taflatse, fia la kple eƒe dɔlawo neyi kple eƒe dɔla!

²⁵Fia la gblɔ na Absalom bena: Gbeɖe, vinye! Megana mí katã míayi o, ne míaganye agba na wò o! Eye wòƒoe ɖe enu; ke egbe be, yemayi o, eye wòyrae.

²⁶Eye Absalom gblɔ bena: Ne mèlɔ̃ o la, ekema na nɔvinye Amnon nayi kpli mi dzro! Fia la ɖo ŋu nɛ bena: Nukata wòayi kpli wòa?

²⁷Ke Absalom ƒoe ɖe enu, eye wòdɔ Amnon kple fia viŋutsuawo katã kpe ɖe eŋu.

²⁸Eye Absalom de se na eƒe ɖekakpuiwo bena: Miɖo ŋku anyi; ne wein na Amnon le dzidzɔ kpɔm, eye megblɔ na mi be: miwu Amnon la, ekema miwui, eye migavɔ̃ o; esi wònye nyee de se na mi ɖe! Milé dzi ɖe ƒo, eye miwɔ ŋutsu!

²⁹Eye Absalom ƒe ɖekakpuiawo wɔ Amnon, abe alesi Absalom de se ene. Tete fia viŋutsuawo katã tsi tre, eye wo dome amesiame do eƒe tedzi hesi.

³⁰Esi wole mɔ dzi la, nya la ɖi Dawid se be: Absalom wu fia viŋutsuawo katã, eye wo dometɔ ɖeka hɔ̃ hã mekpɔtɔ o!

³¹Tete fia la tsi tre dze eƒe awuwo, eye wòmia anyigba, eye eƒe dɔlawo katã le tsitre le awu vuvuwo me.

³²Ke Yonadab, Dawid nɔvi, Simea ƒe vi, xɔ dzi gblɔ bena: Nye aƒetɔ megabu be, wowu ɖekakpuiviawo katã, siwo nye fia viwo la o, ke boŋ Amnon ɖeɖe koe ku; elabena Absalom ƒe nu me nya la tso, wòɖoe tso gbesigbe wògblẽ nɔvianyɔnu Tamar.

³³Eyata nye aƒetɔ fia megana nya sia naɖu dzi nɛ be, fiaviŋutsuawo katãe ku o, ke boŋ Amnon ɖeɖe koe ku.

³⁴Ke Absalom si. Eye ɖekakpui, si nye dzɔla la, fi ka dzi, eye wòkpɔ bena, ameha gãa ɖe le mɔ dzi to emegbe tso to la ƒe axa dzi gbɔna.

³⁵Tete Yonadab gblɔ na fia la bena: Kpɔ ɖa, fia viŋutsuawo gbɔna; alesi wò dɔla gblɔ la, nenema wòle.

³⁶Esi wòɖe nu le nyaa me la, tete fia viŋutsuawo do, eye wofa avi kple ɣli, eye fia la kple eƒe dɔlawo katã hã gba avi doo.

³⁷Ke Absalom si yi Gesur-fia Talmai, Amihud vi gbɔ. Eye Dawid fa na via ɣeyiɣi blibo la.

³⁸Eye Absalom si yi Gesur ɖatsi afima ƒe etɔ̃.

³⁹Ke ele fia Dawid dzrom vevie be, yeatsɔe ake Absalom; elabena eƒe akɔ fa le Amnon, si ku la ta.