Read ewe Samuel II 14 Bible Online

Samuel II 14 - ewe bible

Samuel II 14

¹Eye Zeruya vi Yoab dze sii bena, fia la ƒe dzi ku ɖe Absalom ŋu.

²Tete Yoab dɔ ame ɖe Tekoa woɖakplɔ nyɔnu dzeaɖaŋua ɖe vɛ, eye wògblɔ nɛ bena: Taflatse, wɔ ɖokuiwò, abe aho wum nèle ene, eye nata ahovɔ, megasi ami o, eye nanɔ abe nyɔnu, si le aho wɔm na ame kuku eteƒe didi ene!

³Eye nayi fia la gbɔ agblɔ nya siawo nɛ! Eye Yoab de nyawo enu.

⁴Eye Tekoa-nyɔnu la va fia la gbɔ, eye wòbɔbɔ hede ta agu gblɔ bena: Fia, xɔ nam!

⁵Fia la gblɔ ne bena: Nya ka dzo ɖe dziwò? Eɖo ŋu bena: Ahosi menye, eye srɔ̃nye ku.

⁶Ŋutsuvi eve le wò dɔlanyɔnu si, eye woa kple eve wole dzre wɔm le gbe me; ke amea ɖeke meli alé avu wo o, eye ɖeka ƒo nɔvia woku.

⁷Azɔ kpɔ ɖa, ƒome blibo la tso ɖe wò dɔlanyɔnu ŋu gblɔ bena: Ɖe amesi wu nɔvia la de asi, ne míawu ɖe nɔvia, si wòwu la, ƒe agbe teƒe, eye míatsrɔ̃ domeɖula hã ɖa! Eye wole didim be, yewoatsi nye dzoka, si kpɔtɔ ɖi la, ne ŋkɔ kple dzidzimevia ɖeke maganɔ srɔ̃nye si le anyigba dzi o.

⁸Tete fia la gblɔ na nyɔnu la bena: Yi aƒewò me, eye made se le tawo!

⁹Eye Tekoa-nyɔnu la gblɔ na fia la bena: Nye aƒetɔ fia, mía kple fofonye ƒe aƒe dzi vodada la le, ke fia kple eƒe fiazikpui meɖi faa ɖeke o.

¹⁰Fia la gblɔ bena: Ne amea ɖe ƒo nu ɖe gbɔwò la, ekema kplɔe vɛ nam, eye magaka asi ŋuwò azɔ o!

¹¹Nyɔnu la gblɔ be: Taflatse, fia la neɖo ŋku Yehowa, eƒe Mawu dzi, ne hlɔ̃biala magagblẽ nu ɖe dzi, eye wòatsrɔ̃ vinyeŋutsu ɖa o! Tete wògblɔ be: Meta Yehowa ƒe agbe: Ne viwò ƒe ɖa ɖeka age ɖe anyigba fi!

¹²Ke nyɔnu la gblɔ bena: Taflatse, na wò dɔlanyɔnu nagblɔ nya ɖeka na aƒetɔ, nye fia. Eɖo ŋu bena: Ƒo nu!

¹³Nyɔnu la gblɔ bena: Nukaŋuti nèle esia bum ɖe Mawu ƒe dukɔ la ŋu? Esi fia la gblɔ nya sia, gake fia la mena wokplɔ eƒe amesi wonyã la gbɔe o la, eyata ele abe ame ɖifɔ ene.

¹⁴Elabena ele be, míaku, eye míele abe tsi, si wokɔ ɖe anyigba, eye womagate ŋu aklui o ene; eye Mawu medea amea ɖeke ɖa o, ke boŋ ebua eme kpɔna be, ne maganyã amesi wonyã la ɖa le eɖokui gbɔ o.

¹⁵Esi dukɔ la le ŋɔdzi dom nam la, eyata meva nye aƒetɔ fia la gbɔ fifia, be magblɔ nya sia; elabena wò dɔlanyɔnu bu be: Maƒo nu kple fia la kpɔ, ɖewohĩ awɔ eƒe dɔlanyɔnu ƒe nya la dzi.

¹⁶Elabena fiã la aɖo to eƒe dɔlanyɔnu, eye wòaɖem tso ŋutsu, si be, yeatsrɔ̃ mía kple vinye ɖa le Mawu ƒe domenyinu nu la si me.

¹⁷Eye wò dɔlanyɔnu bu be: Nye aƒetɔ fia la ƒe nya ana ɖoɖoe nazi: elabena nye aƒetɔ fia la le abe Mawu ƒe dɔla ene, amesi wòase nyuia kple vɔ̃a; eye Yehowa, wò Mawu, anɔ kpli wò.

¹⁸Tete fia la xɔ dzi gblɔ na nyɔnu la bena: Megaɣla nya, si mabia wò la, ɖem o! Nyɔnu la ɖo ŋu be: Nye aƒetɔ fia neƒo nu ko!

¹⁹Eye fia la gblɔ bena: Menye Yoab ƒe asie li kpli wò le nya siawo katã me oa? Nyɔnu la ɖo ŋu gblɔ bena: Meta wò agbe, nye aƒetɔ fia, womate ŋu adze ɖe ɖusi alo mia me le nya, siwo katã nye aƒetɔ fia gblɔ la me o; elabena wò dɔla Yoab ye dɔm, eye wòde nya siawo katã wò dɔlanyɔnu la nu.

²⁰Wò dɔla Yoab wɔ nusia, ne wòatsɔ ablu nya la ƒe afɔ; ke nye aƒetɔ ƒe nunya le abe mawudɔla ƒe nunya ene, ne wòanya nusianu, si dzɔna le anyigba dzi.

²¹Emegbe fia la gblɔ na Yoab bena; Kpɔ ɖa, mawɔ nusia; eyata yi ɖakplɔ ɖekakpui Absalom la gbɔe!

²²Tete Yoab bɔbɔ heɖe ta agu, eye wòyra fia la. Eye Yoab gblɔ bena: Nye aƒetɔ fia, egbe wò dɔla dze sii bene, ève wò dɔla nu, esi fia ta wɔ eƒe dɔla ƒe nya dzi ta.

²³Tete Yoab dze mɔ yi Gesur, eye wòkplɔ Absalom va Yerusalem.

²⁴Eye fia la gblɔ be: Netrɔ yi eƒe me, eye megava kpɔ nye ŋku me o! Tete Absalom trɔ yi eƒe me, eye mekpɔ fia la ŋku me o.

²⁵Ke amea ɖeke medze ɖeka ɖe Absalom nu le Israel blibo la o, ale be wokafunɛ ŋutɔ; dzuƒea ɖeke mele eŋu tso eƒe afɔ gɔme vaseɖe eƒe tagbɔ o.

²⁶Eye ne eko eƒe taɖa la, eƒe ɖa ɖaa sekel alafa eve le fia ƒe nudanu dzi. Ne ƒe sia ƒe trɔ la, ekoa ta; elabena ekpe ne akpa, eyata wòkonɛ.

²⁷Wodzi ŋutsuvi etɔ̃ kple nyɔnuvi ɖeka, si ŋkɔ nye Tamar, eye wòdze tugbe la, na Absalom.

²⁸Esi Absalom nɔ Yerusalem ƒe eve, eye mekpɔ fia la ŋku me kpɔ o la,

²⁹Absalom dɔ ame ɖo ɖe Yoab be, yeaɖoe ɖe fia la gbɔ; ke egbe be, yemayi egbɔ o. Egadɔ ame ɖee zi evelia, ke egbe vava.

³⁰Tete wògblɔ na eƒe dɔlawo bena: Mikpɔ ɖa, Yoab ƒe agble le axanye, eye lu le afima ne; miyi, ne miatɔ dzoe! Eye Absalom ƒe dɔlawo yi ɖatɔ dzo agble la.

³¹Eye Yoab tso yi Absalom gbɔ le aƒea me gblɔ ne bena: Nukaŋuti wò dɔlawo tɔ dzo agble, si nye tanye?

³²Absalom ɖo ŋu na Yoab bena: Kpɔ ɖa, medo ame ɖe wò be: va, ne made gbe asi na wò aɖo ɖe fia la bena: Nukaŋuti metso Gesur va? Ɖe metsi afima la, ne nyo nam wu! Azɔ meɖi be, makpɔ fia la ŋku me; eye ne vodadaa ɖe le ŋunye la, ekema newum!

³³Tete Yoab yi fia la gbɔ ɖagblɔe ne; eye wòyɔ Absalom. Esi wòva fia la gbɔ la, ede ta agu ɖe fia la ŋku me, eye fia la gbugbɔ nu na Absalom.