Read ewe Samuel II 16 Bible Online

Samuel II 16 - ewe bible

Samuel II 16

¹Esi Dawid to toa ta me yi ʋee la, kpo ɖa, Mefiboset ƒe dɔla Ziba va kpee, eye tedzi eve, siwo wòbia akpa na, eye wotsɔ abolo bɔbɔ alafa eve, weintsetse ƒuƒu bolo alafa ɖeka kple wein lãgbalẽgolo ɖeka do agba ɖe wo dzi la, kpe ɖe eŋu.

²Fia la bia Ziba bena: Nuka nèbe, yeawɔ nu siawoe? Ziba ɖo ŋu be: Tedziawo nye fia la ƒe aƒea to, ne woaɖo; aboloawo kple kutsetse kpoawo nye ɖekakpuiawo tɔ, ne woaɖu; eye wein la nye amesiwo ŋu ɖeɖi te le gbedzi la to, ne woano.

³Fia la gblɔ be: Afika wò aƒetɔ ƒe vi la le? Ziba ɖo ŋu na fia la bena: Kpɔ ɖa, etsi Yerusalem, elabena egblɔ be: Azɔ la Israel ƒe aƒe la agagbugbɔ fofonye ƒe fiaɖuƒe la nam!

⁴Tete fia la gblɔ na Ziba bena: Kpɔ ɖa, Mefiboset ƒe nuwo katã nye tɔwò! Eye Ziba gblɔ be: Mede ta agu na wò! Ne nye aƒetɔ nya ve nunye ko!

⁵Esi fia Dawid va Baxurim la, kpɔ ɖa, ŋutsua ɖe, si tso Saul ƒe aƒe ƒe ƒome la me, si ŋkɔ nye Simei, Gera vi la, do tso afima va le ɖiŋu dom.

⁶Eye wòfɔ kpe le Dawid kple fia Dawid ƒe dɔlawo katã kple ameha blibo la kpakple kalẽtɔ, siwo katã le eƒe ɖusi kple mia me la dam.

⁷Eye Simei le ɖiŋu dom le gbɔgblɔm be: Dzo, dzo, wò hlɔ̃me kple ame vɔ̃ɖi!

⁸Yehowa gbugbɔ Saul, amesi teƒe nèzu fia ɖo la, ƒe aƒe ƒe ʋu katã va dziwò, eye Yehowa tsɔ fiaɖuƒe la de asi na viwò Absalom; kpɔ ɖa, azɔ ège ɖe dzɔgbevɔ̃e me, elabena hlɔme nènye!

⁹Zeruya vi Abisai gblɔ na fia la bena: Nukaŋuti avũ kuku sia anɔ ɖiŋu dom na nye aƒetɔ fia la? Na mayi aɖatso ta le enu!

¹⁰Ke fia la gblɔ be: Nya ka me mele kple mi Zeruya viwo? Nedo ɖiŋu faa! Elabena nenye Yehowae gblɔ nɛ be: do ɖiŋu na Dawid la! ameka kpɔ mɔ agblɔ be: nukaŋuti nèle wɔwɔm alea?

¹¹Eye Dawid gblɔ na Abisai kple eƒe dɔlawo katã bena: Kpɔ ɖa, vinye, si do tso nye ali me la, le nye ku dim; aleke wɔ Benyamintɔ mahadii oa? Mina, ne wòado ɖiŋu ko, elabena Yehowae gblɔe nɛ!

¹²Ɖewohĩ Yehowa akpɔ nye hiã la nam, eye Yehowa atsɔ nyui aɖo ɖiŋu, si wòɖo nam egbe la teƒe.

¹³Eye Dawid kple eƒe amewo lé mɔ, ke Simei zɔ to la xa le ekasa, eye wòle ɖiŋu dom le yiyim, eye wòtɔ kpe le edam hele ke hlẽm ɖe ya me.

¹⁴Eye fia la kple ameha blibo, si le eŋu la, va Ayefim, eye wogbɔ ɖe me le afima.

¹⁵Ke Absalom kple ameha blibo, si nye Israel-ŋutsuwo la, va Yerusalem, eye Axitofel kpe ɖe eŋu.

¹⁶Esime Dawid xɔlɔ̃ Xusai, Arkitɔ la, va Absalom gbɔ la, Xusai gblɔ na Absalom bena: Fia nenɔ agbe! Fia nena agbe!

¹⁷Tete Absalom gblɔ na Xusai bena: Xɔ̃wò lae nye esia lɔ̃m nèlea? Nukaŋuti mèyi kple xɔwo la oa?

¹⁸Xusai ɖo ŋu na Absalom bena: Kpao, ke boŋ amesi Yehowa kple dukɔ sia kpakple Israel-ŋutsuwo katã da la, tɔ menye, eye eya gbɔ manɔ!

¹⁹Eye evevea ke: Ameka masubɔ, ne menye via oa? Alesi mesubɔ fofowòe la, nenema manɔ wò hã gbɔwòe.

²⁰Eye Absalom gblɔ na Axitofel bena: Miɖe adaŋu, nusi míawɔ!

²¹Axitofel gblɔ na Absalom bena: Yi fofowò ƒe ahiã, tsiwo wogblẽ ɖe megbe, be woakpɔ aƒea dzi la gbɔ; eye ne Israel blibo la se be, mia kple fofowò dome gblẽ la, ekema ŋusẽ aɖo alɔ me na amesiwo katã le ŋuwò!

²²Eye wowɔ agbadɔ ɖe xɔta na Absalom, eye Absalom de asi fofoa ƒe ahiãwo ŋu le Israel blibo la ŋku me.

²³Wobua Axitofel ƒe aɖaŋu, si wòɖona ɣemaɣi la, abe Mawue wòbia gbee ene: alea Axitofel ƒe aɖaŋuɖoɖo nɔ na Dawid kple Absalom siaa.