Read ewe Samuel II 2 Bible Online

Samuel II 2 - ewe bible

Samuel II 2

¹Le nya sia megbe la Dawid bia Yehowa bena: Mayi Yuda-duawo dometɔ ɖeka mea? Yehowa ɖo ŋu nɛ bena: Yi! Eye Dawid gblɔ be: Afika yi ge mala? Yehowa ɖo ŋu bena: Yi Xebron!

²Tete Dawid yi afima, eye srɔ̃ eveawo, Yezreeltɔ Axinoam kple Karmeltɔ Abigail, kpe ɖe eŋu.

³Eye Dawid kplɔ ŋutsu, siwo le eŋu, hã yii amesiame kple eƒemetɔwo, eve wonɔ Xebron-duwo me.

⁴Tete Yuda-ŋutsuwo va, eye wosi ami na Dawid le afima, ne woaɖu fia ɖe Yuda ƒe aƒe la dzi. Eye wova gblɔ na Dawid bena: Yabes-Gileadtɔwoe nye amesiwo ɖi Saul.

⁵Tete Dawid ɖɔ amewo ɖo ɖe Yabes-Gileadtɔwo gblɔ na wo bena: Yehowa ayra mi, elabena mieve miaƒe aƒetɔ Saul nu, eye mieɖii!

⁶Eyata Yehowa ave mia nu, eye wòaɖi anukware na mi, eye nye hã mawɔ nyui sia tɔgbe na mi, le esi miewɔ nusia la.

⁷Ke migana miaƒe asi nado agblɔ o, eye miwɔ ŋutsu, elabena miaƒe aƒetɔ Saul ku, eye Yuda ƒe aƒe la si ami nam, be maɖu fia ɖe wo dzi.

⁸Ke Saul ƒe aʋafia Abner, Ner vi, kplɔ Saul vi Is-Boset yi Maxanayim,

⁹eye wòɖoe fia ɖe Gilead kple Asertɔwo, Yezreel, Efrayim, Benyamin kple Israel blibo la dzi.

¹⁰Saul vi Is-Boset xɔ ƒe blane, esime woɖoe fia ɖe Israel nu, eye woɖu fia ƒe eve; negbe Yuda ƒe aƒe la koe ku ɖe Dawid ŋu.

¹¹Ŋkeke, siwo Dawid ɖu fia le Xebron de Yuda ƒe aƒea dzi la, le ƒe adre kple dzinu ade.

¹²Eye Abner, Ner vi, kple Saul vi Is-Boset ƒe dɔlawo ho tso Maxanayim yi Gibeon.

¹³Eye Zeruya vi Yoab kple Dawid ƒe dɔlawo hã ho, eye wova ƒo go wo nɔewo le Gibeon-tato; woawo le ta la ƒe go si me, eye ame meawo le ta la ƒe go keme.

¹⁴Tete Abner gblɔ na Yoab bena: Na ɖekakpuiawo natsi tre; ne woate wo ɖokui akpɔ le mía ŋku me! Eye Yoab gblɔ bena: Ne wotsi tre!

¹⁵Eye wotsi tre yi le woƒe xexlẽme nu; ame wuieve nye Saul vi Is-Boset lɔ tso Benyamin, eye wo ame wuieve tso Dawid ƒe dɔlawo dome.

¹⁶Wòlé ta na wo nɔewo heƒo yi ɖe wo nɔewo ƒe abla me, eye wodze anyi zi ɖeka. Eye wona ŋkɔ teƒe sia be nudaƒe; ele Gibeon.

¹⁷Aʋa la nu sẽ ŋutɔ gbemagbe, eye Dawid ƒe dɔlawo si Abner kple Israel-ŋutsuwo.

¹⁸Eye Zeruya viŋutsu etɔ̃ le afima: Yoab, Abisai kple Asahel; eye Asahel ƒe afɔ tsɔna abe zi le gbe me ene.

¹⁹Eye Asahel ɖe Abner ɖe nu, eye medze ɖe ɖusi alo mia me le Abner yome o.

²⁰Tete Abner nyẽ kɔ gblɔ bena: Wòe nye Asahel mahã? Eɖo ŋu bena: Nyee.

²¹Abner gblɔ nɛ bena: Dze ɖe ɖusi alo mia me, eye nalé ɖekakpuiawo dometɔ ɖeka aɖe eŋutinu na ɖokuiwò! Ke Asahel gbe be, yematrɔ le eyome o.

²²Abner gagblɔ na Asahel bena: Trɔ le yonyeme dzro! Nukata mada nu wò aƒu anyi? Aleke mawɔ agate gu akpɔ nɔviwò Yoab ŋku mea?

²³Ke egbe tɔtrɔ, eye Abner tso akplɔnu ƒo ɖe do me nɛ, eye akplɔ la ɖi go ɖe egodo, eye wòdze anyi ɖe afima heku ɖe eteƒe. Eye wòva me, ne amesiame va teƒe, si Asahel dze anyi ku ɖo la, etɔna ɖi.

²⁴Eye Yoab kple Abisai woti Abner yome, eye esi ɣe ɖo to la, wova Ama-togbɛ, si le Giax kasa le Gibeon-gbegbe-mɔ dzi la gbɔ.

²⁵Tete Benyamin-viwo ƒo wo ɖokui nu ƒu ɖe Abner yome hewɔ asafokɔ ɖeka, eye wotsi tre ɖe togbɛa ɖe ta me.

²⁶Eye Abner yɔ Yoab gblɔ bena: Ɖe yi anɔ nuɖuɖu dzi koa? Menyae be, ava vɔ̃ɖi ɖe dzi emegbe oa? Ɣekaɣi nagblɔ na dukɔ la be, woatrɔ le wo nɔviwo yomea?

²⁷Yoab ɖo ŋu bena: Meta Mawu ƒe agbe, ɖe menye wòe ƒo nu o la, anye ne dukɔ la gbugbɔ le wo nɔewo yome tso egbe ŋdi ke.

²⁸Eye Yoab ku kpẽ, tete aʋakɔ blibo la tɔ, womegati Israel yome o, eye wodzudzɔ aʋawɔwɔ.

²⁹Eye Abner kple eƒe amewo to tagba le zã blibo la me hetso Yordan, eye woto ʋe blibo la me va Maxanayim.

³⁰Eye esi Yoab gbugbɔ tso Abner yometiƒe la, eƒo aʋakɔ blibo la nu ƒu, eye ame wuiasieke hekpe ɖe Asahel ŋu to le Dawid ƒe dɔlawo dome.

³¹Ke Dawid ƒe dɔlawo wu ame alafa etɔ̃ kple blaade le Benyamin kple Abner ƒe amewo ŋu.

³²Eye wokɔ Asahel ɖaɖi de fofoa ɖiƒe le Betlexem; eye Yoab kple eƒe amewo zɔ zã blibo la, eye ŋu ke de wo le Xebron.