Read ewe Samuel II 23 Bible Online

Samuel II 23 - ewe bible

Samuel II 23

¹Dawid ƒe nya mamleawo nye esi; Dawid, Isai vi ƒe gbe, ŋutsu, si wodo ɖe dzi, Yakob ƒe Mawu ƒe amesiamina la, kple kafukafuhawo ƒe heno le Israel ƒe gbe:

²Yehowa ƒe Gbɔgbɔ ƒo nu to dzinye, eye eƒe nya le nye aɖe dzi.

³Israel ƒe Mawu la ƒo nu, Israel ƒe agakpe la gblɔ nam bena: Amesi ɖu amegbetɔwo dzi dzɔdzɔe kple amesi ɖu dzi le mawuvɔvɔ̃ me la,

⁴le abe alesi ŋdi kɔna, ne ɣe dze ene, ele abe ŋdi, si alilikpoa ɖeke medo o ene, eye ele abe keklẽ, si nana gbe miena tso anyigba me le tsidzadza megbe ene.

⁵Ɖe nye aƒe mele alea le Mawu ŋku me oa? Elabena ebia nu mava kplim, si woɖo pɛpɛpɛ, eye wodzrae ɖo. Elabena ɖe mana nye xɔxɔwo katã kple nye nudidiwo katã natsi ɖe dzi oa?

⁶Ke yakamewo katã le abe ŋu, siwo wotsɔna ƒua gbe, eye womeɖea asi wo ŋu o la ene;

⁷ke boŋ amesi be, yeade asi wo ŋu la, ele be, woatso ga kple akplɔti ɖe asi, eye wòatɔ dzo wo ɖe wo teƒe.

⁸Dawid ƒe kalẽtɔwo ŋkɔwo nye esi: Isbaal, Xaxmoni vi, amesi nye fia ŋu asrafowo ƒe amegã, eya da eƒe akplɔ zi ɖeka to ame tsiaʋa alafa enyi dzi.

⁹Eyometɔ nye Eleazar, Axoxi vi, Dodo ƒe vi, amesi le kalẽtɔ etɔ̃awo dome le Dawid gbɔ. Esi woɖu fewu le Filistitɔwo ŋu, eye woƒo ƒu ho aʋa va afima, eye Israel-ŋutsuwo ho yi la,

¹⁰eya tsi tre, eye wòdza amewo le Filistitɔwo dome, vaseɖe esime ɖeɖi te eƒe asi ŋu, eye yi la lé ɖe asi me nɛ. Yehowa na woɖu dzi gãa ɖe gbemagbe, eye dukɔ blibo la gbugbɔ dze eyome, be woaɖaha nu.

¹¹Evometɔ nye Sama, Hararitɔ Age vi. Esi Filistitɔwo ƒo ƒu ɖe Lexi, afisi ayi le agble me fũ le, eye dukɔ la si le Filistitɔwo nu la,

¹²etsi tre ɖe agble la titina, eye wòxɔe, eye wòsi Filistitɔwo, eye Yehowa na woɖu dzi gãa ɖe.

¹³Eye amegã blaetɔ̃awo dometɔ etɔ̃ tso yi Dawid gbɔ le Adulam-do la me le nuŋeŋɔli. Esime Filistitɔwo ƒe adzohawo ƒu asaɖa anyi ɖe Refaim-bali la me la,

¹⁴Dawid le mɔ̃ me le to dzi, eye Filistitɔwo ɖe aʋakɔ ɖo Betlexem ɣemaɣi.

¹⁵Eye nu de asi Dawid dzodzro me, wògblɔ bena: Ameka aku tsi tso vudɔ, si le agbo me le Betlexem la me ve mano?

¹⁶Tete kalẽtɔ etɔ̃awo yi ɖage ɖe Filistitɔwo ƒe asaɖa me, eye woku tsi le vudo, si le agboa me le Betlexem la me hetsɔ ve na Dawid; ke egbe be, yemanoe o, eye wòtsɔe ƒo ɖe anyi na Yehowa.

¹⁷Eye wògblɔ be: Yehowa, esia wɔwɔ nede megbe xaa tso gbɔnye! Esia nye ŋutsu, siwo tsɔ woƒe agbe ke yi la, ƒe ʋu. Eye wogbe be, yemanoe o. Kalẽtɔ etɔ̃awoe wɔ esia.

¹⁸Abisai, Zeruya vi, Yoab nɔvi, enye ame blaetɔ̃awo ƒe tatɔ; eya da eƒe akplɔ to ame tsiaʋa alafa etɔ̃awo dzi, eye wòxɔ ŋkɔ le ame blaetɔ̃awo dome.

¹⁹Wode bubu eŋu le ame blaetɔ̃awo dome, eye eya nye woƒe amegã; gake mede ame etɔawo nu o.

²⁰Benaya, Yehoyada vi, enye ŋutsu kalẽtɔa ɖe, si wɔ nu tsuwo la ƒe vi tso Kabzeel. Eya wu Moabitɔwo ƒe kalẽtɔ eveawo, eye wowu dzata le vudo la me le gbesigbe sno dza.

²¹Eya wu Egipte-ŋutsu kakoa ɖe; akplɔ le Egiptetɔ la si, gake eyi egbɔ kple atizɔti, eye wòxɔ akplɔ la le Egiptetɔ la si hetsɔ eya ŋutɔ ƒe akplɔ wui.

²²Nusia Benaya, Yehoyada vi la wɔ, eye wòxɔ ŋkɔ le kalẽtɔ blaetɔ̃awo dome.

²³Wode bubu eŋu le ame blaetɔ̃awo dome, ke mede ame etɔ̃awo nu o, eye Dawid tsɔe ɖo fia ŋu asrafowo nu.

²⁴Asahel, Yoab nɔvi, le ame blaetɔ̃awo dome, Elxanan, Dodo vi, tso Betlexem,

²⁵Xaroditɔ Sama kple Xaroditɔ Elika.

²⁶Paltitɔ Xelez kple Tekoatɔ Ira, Ikes vi,

²⁷Antotitɔ Abiezer kple Xusatitɔ Mebunai,

²⁸Axoxitɔ Zalmon kple Netotatitɔ Maharai,

²⁹Netofatitɔ Xeleb, Baana vi, kple Itai, Ribai vi, tso Benyamin-viwo ƒe Gibea.

³⁰Piratonitɔ Benaya kple Hidai, si tso Naxale-Gaas,

³¹Arbatitɔ Abi-Albon kple Barxumitɔ Azmawet,

³²Saalbonitɔ Eliaxba, Gunitɔ Yasen,

³³Yona tan, Hararitɔ, Sama ƒe vi, Axiam, Harantɔ Sarar ƒe vi,

³⁴Elifelet, Maaxati vi Ahasbai ƒe vi, Edom, Gilonitɔ, Axitofel ƒe vi,

³⁵Karmelitɔ Xezrai, Arbitɔ Paerai,

³⁶Yigal, Natan vi, tso Zoba, Gaditɔ Bani,

³⁷Amonitɔ Zelek, Beerotitɔ Naxarai, amesi nye Zeruya vi Yoab ƒe adekplɔvi,

³⁸Yitritɔ Ira kple Yitritɔ Gareb

³⁹kpakple Xititɔ Uriya. Wo katã le ame blaetɔ̃ vɔ adre.