Read ewe Samuel II 5 Bible Online

Samuel II 5 - ewe bible

Samuel II 5

¹Tete Israel-toawo katã va Dawid gbɔ le Xebron, eye wogblɔ bena: Kpɔ ɖa, wò ƒu kple wò ŋutilã míenye.

²Tsã esi Saul nye fia ɖe Israel nu la, wòe kplɔa Israel ɖoa goe, eye negakplɔnɛ gbɔnɛ, eye Yehowa gblɔ na wò bena: Wòe anyi nye dukɔ Israel, eye nanye amegã ɖe Israel nu!

³Ale Israel-amegãwo katã va fia la gbɔ le Xebron, eye fia Dawid bla nu kpli wo le Xebron le Yehowa ŋku me, eye wosi ami na Dawid, ne woaɖu fia ɖe Israel dzi.

⁴Dawid xa ƒe blaetɔ̃, esime wòzu fia, eye woɖu dzi ƒe blane.

⁵Eɖu fia ɖe Yuda dzi le Xebron ƒe adre kple dzinu ade, eye wòɖu fia ɖe Israel blibo la kple Yuda dzi le Yerusalem ƒe blaetɔ̃ va etɔ̃.

⁶Eye fia la kple eƒe amewo ho yi Yerusalem ɖe Yebusitɔ, siwo nye anyigbadzitɔwo la ŋu; ke woawo gblɔ na Dawid bena: Màte ŋu ava afisia o, ŋkuagbãtɔwo kple xodrɔ̃wo koe anyẽ wò! Egɔme enye be, Dawid mate ŋu ava afisia o.

⁷Ke Dawid xa Zion-mɔ̃ la, eya nye Dawid ƒe du.

⁸Gbemagbe Dawid gblɔ bena: Amesi asi Yebusitɔwo hekpe ɖe xodrɔ̃wo kple ŋkuagbãtɔwo, amesiwo Dawid ƒe dzi lé fui la ŋu heva ke ɖe tsiʋu la gbɔ la…! Eyata wogblɔna be: Ŋkuagbãtɔ kple xɔdrɔ̃ megava aƒea me o!

⁹Eye Dawid va na mɔ̃ la me hena ŋkɔe be Dawid ƒe du; eye Dawid ɖo gli ƒo xlãe va kpe tso Milo to anyigba gome.

¹⁰Eye Dawid le ŋusẽ kpɔm ɖe dzi, eye Yehowa, aʋakɔwo ƒe Mawu la, li kplii.

¹¹Eye Tiro-fia Xiram ɖo amewo kple sedertiwo ɖe Dawid hekpe ɖe atikpalawo kple kpefulawo ŋu, ne woatu xɔ na Dawid.

¹²Azɔ Dawid dze sii bena, Yehowae ɖo ye, ne yeaɖu fia ɖe Israel dzi, eye wòna eƒe fiaɖuƒe de dzi le eƒe dukɔ Israel ta.

¹³Esi Dawid tso Xebron va la, egadze ahiãwo, eye wòɖe srɔ̃wo le Yerusalem, eye wogadzi ŋutsuviwo kple nyɔnuviwo na Dawid.

¹⁴Amesiwo wodzi nɛ le Yerusalem ƒe ŋkɔwo nye esi: Samua, Sabab, Natan kple Salomo,

¹⁵Yibxar, Elisua, Nefeg kple Yafia,

¹⁶Elisama, Elyada kple Elifelet.

¹⁷Tete Filistitowo se bena, wosi ami na Dawid heɖo fiae ɖe Israel dzi, eye Filistitɔwo katã ho, bena woadi Dawid. Eye esi Dawid see la, eyi mɔ̃ la me.

¹⁸Eye Filistitɔwo va kaka ɖe Refaim-bali la me.

¹⁹Eye Dawid bia nu Yehowa bena: Mahe ɖe Filistitɔwo ŋua, eye ɖe atsɔ wo ade asi nama? Yehowa ɖo ŋu na Dawid bena: Ho yi, elabena matsɔ Filistitɔwo ade asi na wò!

²⁰Tete Dawid va Baal-Perazim, eye Dawid si wo le afima, eye wògblɔ bena: Yehowa dze nye futɔwo le ŋgɔnye, abe alesi tɔsisi ŋɔa go ene. Eyata wona ŋkɔ teƒe ma bena Baal-Perazim.

²¹Ke wogblẽ woƒe legbawo ɖe afima, eye Dawid kple eƒe amewo fɔ wo.

²²Eye Filistitɔwo gaho heva kaka ɖe Refaim-bali la me

²³Tete Dawid bia nu Yehowa, eye wòɖo ŋu nɛ be: Megaho yi o, ke boŋ to wo megbe, ne nava tu wo le klẽtiawo kasa!

²⁴Eye ne eva me be, zi ɖi va to klẽtiawo dome nèse la, ekema wɔ kaba, elabena Yehowa dze ŋgɔwò, be wòasi Filistitɔwo ƒe aʋakɔ la!

²⁵Eye Dawid wɔ, abe alesi Yehowa de se nɛ ene, eye wòsi Filistitɔwo tso Geba vaseɖe Gezer.