Read ewe Samuel II 8 Bible Online

Samuel II 8 - ewe bible

Samuel II 8

¹Eye wòva me le nusiawo megbe bena, Dawid si Filistitɔwo, eye wòbɔbɔ wo ɖe anyi, eye Dawid xɔ du gã me dziɖuɖu le Filistitɔwo si.

²Emegbe wòsi Moabitɔwo, eye wòna womlɔ anyigba, eye wòdzidze wo kple ka; edzidze ka eve be, woawu, eye wòdzidze ka ɖeka be, woanɔ agbe. Ale Moabitɔwo zu Dawid ƒe dɔlawo, siwo dzɔ nu nɛ.

³Eye Dawid si Zoba-fia Hadadezer, Rexob vi, esi wòva be, yeaɖo yeƒe fiaɖuƒe anyi ɖe Frat-tɔsisi la nu.

⁴Dawid lé sɔdola akpe ɖeka kple alafa adre kpakple afɔzɔla akpe blave, eye Dawid du ata na so, siwo katã wotsi ɖe tasiaɖamwo ŋu la, negbe sɔ alafa ɖeka ko wõkpɔtɔ ɖi.

⁵Eye esi Aramtɔwo tso Damasko, be woava xɔ na Zoba-fia Hadadezer la, Dawid wu ame akpe blave vɔ eve le Aramtɔwo dome.

⁶Eye Dawid ɖe amewo ɖo Aramtɔwo ƒe Damasko, eye Aramtɔwo zu Dawid ƒe dolawo, siwo dza nu nɛ. Eye Yehowa kpe ɖe Dawid ŋu le afisiafi, si wòyi.

⁷Eye Dawid xɔ sikakpoxɔnu, siwo le Hadadezer ŋu mewo si la, hetsɔ va Yerusalem.

⁸Eye fia Dawid xɔ akɔbli geɖe fũ le Beta kple Berotai, siwo nye Hadadezer ƒe duwo me.

⁹Esi Xamat-fia Toi se bena, Dawid si Hadadezer ƒe aʋakɔ bliboa la,

¹⁰Toi do via Yoram ɖe fia Dawid, ne wòado gbe nɛ, woadi dzɔgbenyuie ne, eye wõayrae le esi wòwɔ aʋa kple Hadadezer, eye wòsii la ta, elabena Toi kple Hadadezer wole kè me; eye wòhe klosalonuwo, sikanuwo kple akɔblinuwo ɖe asi vɛ.

¹¹Eye fia Dawid ka woawo hã ŋu na Yehowa hekpe ɖe klosalo kple sika, siwo wòxɔ le dukɔ, siwo katã dzi woɖu la si, eye wòkɔ wo ŋu la ŋuti.

¹²Exɔ wo le Aramtɔwo, Moabitɔwo, Amon-viwo, Filistitɔwo kple Amalekitɔwo si hekpe ɖe nusiwo woha le Zoba-fia Hadadezer, Rexob vi si la ŋuti.

¹³Eye Dawid ƒe ŋkɔ nyɔ. Esi wògbɔ tso Aramtɔwo siƒe la, ewu Edomtɔ akpe wuienyi le dzeʋe la mea.

¹⁴Eye wòɖe amewo ɖo Edom, Edom blibo lae wòɖe amewo ɖoe, eye Edomtɔwo katã zu Dawid ƒe dɔlawo. Eye Yehowa kpe ɖe Dawid ŋu le afisiafi, si wòyi.

¹⁵Ale Dawid ɖu fia de Israel blibo la dzi, eye ʋɔnudɔdrɔ̃ kple afiatsotso le Dawid si me hena Israel blibo la.

¹⁶Yoab, Zeruya vi, le aʋakɔ la nu, eye Yosafat, Axilud vi, nye fia ƒe tsiami;

¹⁷Zadok, Axitub vi, kple Aximelex, Abyatar vi, wonye nunɔlawo, eye Seraya nye agbalẽŋlɔla;

¹⁸Benaya, Yehoyada vi, le Kretitɔwo kple Pletitɔwo nu, eye Dawid viŋutsuwo nye aɖaŋuɖolawo.