Read ewe Fiawo I 1 Bible Online

Fiawo I 1 - ewe bible

Fiawo I 1

¹Esi fia Dawid ku amegã xɔ ƒe geɖe la, wotsyɔa avɔwo ne, gake dzo meɖoa eƒe lã me o.

²Tete eƒe dolawo gblɔ nɛ bena: Woadi ɖetugbi atiatia ɖe na miaƒe aƒetɔ fia la, ne woatsi tre ɖe fia la ŋku me akpɔ edzi, eye wòamlɔ wò akɔ nu alé dzo ɖe miaƒe aƒetɔ fia la ŋu.

³Eye wodi ɖetugbi dzetugbe le Israel-nyigba blibo la katã dzi, eye wokpɔ Abisag, Sunamitɔ la, hekplɔe vɛ na fia la.

⁴Ɖetugbi la dze tugbe ŋutɔ, eye wòzu fia la dzikpɔla, si subɔnɛ, ke fia la mede asi eŋu o.

⁵Ke Adoniya, Xagit vi, do eɖokui ɖe dzi gblɔ bena: Nyee le fia nye ge! Eye wòdi tasiaɖamwo kple sɔwo kple ame blaatɔ̃, siwo ano du ƒum le eŋgɔ la, na eɖokui.

⁶Le eƒe agbe me ŋkekewo me la fofoa mehe nya ɖe eŋu kpɔ be: nukaŋuti nèwɔ esi kple esi hã o. Edze ɖeka hã ŋutɔ, eye eya wòdzi ɖe Absalom yome.

⁷Eye wòɖo gbe ɖi kple Yoab, Zeruya vi, kpakple nunɔla Abyatar, eye wokpe ɖe Adoniya ŋu.

⁸Ke nunɔla Zadok, Benaya, Yehoyada vi, nyagblɔɖila Natan. Simei kple Rei kpakple Dawid ƒe kalẽtɔwo mele Adoniya ƒe nya me o.

⁹Eye Adoniya wu alẽwo, nyiwo kple nyivi damiwo le Soxelet-kpe la gbɔ le Rogel-vudo la xa, eye wokpe nɔviaŋutsuwo katã, siwo nye fiaviwo kple Yuda-ŋutsuwo katã, siwo nye fia ƒe dɔlawo

¹⁰ke mekpe nyagblɔɖila Natan Benaya kple kalẽtɔwo kple nɔvia Salomo o.

¹¹Eye Natan gblɔ na Salomo dada Bat-Seba bena: Mese be, Adoniya, Xagit vi, zu fia, eye miaƒe aƒetɔ, fia Dawid, menyae oa?

¹²Eyata va maɖo adaŋu na wò, ne naɖe wò ŋutɔ kple viwò Salomo ƒe agbe.

¹³Tso, nayi fia Dawid gbɔ, eye nagblɔ ne bena: Nye aƒetɔ fia, menye ɖe nèka atam na wò dɔlanyɔnu gblɔ bena: Viwò Salomo azu fia ɖe yonyeme, eye wòanɔ nye fiazikpui dzi oa? Nukaŋuti Adoniya zu fia?

¹⁴Kpɔ ɖa, ne ègale nu ƒom kple fia la le afima la, madze yowòme ava ɖo kpe wò nyawo dzi.

¹⁵Tete Bat-Seba yi fia la gbɔ le xɔgã me. Fia lã tsi ŋutɔ, eye Abisag, Sunamitɔ la, la fia la subɔm.

¹⁶Eye Bat-Seba bɔbɔ hede la agu ɖe fia la ŋku me, eye fia la gblɔ nɛ bena: Nuka le wɔwòm?

¹⁷Eɖo ŋu nɛ bena: Nye aƒetɔ, eta Yehowa, wò Mawu, na wò dɔlanyɔnu bena: Viwò Salomo azu fia ɖe yonyeme, eye wòanɔ nye fiazikpui dzi!

¹⁸Ke azɔ la, kpɔ ɖa, Adoniya zu fia, eye wò, nye aƒetɔ fia, menyae o.

¹⁹Ewu nyitsuwo, nyi damiwo kple alẽwo kpaŋkpaŋ, eye wokpe na viŋutsuwo katã kple nunɔla Abyatar kpakple aʋafia Yoab; ke mekpe wò dɔla Salomo ya o.

²⁰Nye aƒetɔ fia, Israel blibo la le nuwò kpɔm, be nagblɔ amesi le nye aƒetɔ fia ƒe fiazikpui dzi nɔ ge ɖe yowome la, na wo

²¹Elabena ava me be, ne nye aƒetɔ fia mia fofoawo gbɔ la, ekema woakpɔ mia kple vinye Salomo abe nuvɔ̃wɔlawo ene.

²²Eye kpɔ ɖa, esi wògale nu ƒom kple fiaa la, nyagblɔɖila Natan va.

²³Tete woyi ɖa gblɔe na fia la bena: Kpɔ ɖa, nyagblɔɖila Natan enye si. Eye wòva fia la gbɔ hede la agu ɖe fia la ŋku me.

²⁴Eye Natan gblɔ bena: Nye aƒetɔ fia, wòe gblɔ be, Adoniya nezu fia ɖe ye yome, eye wòanɔ yeƒe fiazikpui dzia?

²⁵Elabena egbe la eyi ɖa wu nyitsuwo, nyi damiwo kple alẽwo kpaŋkpaŋ, eye wokpe fia viŋutsuwo katã, aʋakɔ la ƒe tatɔwo kpakple nunɔla Abyatar; kpɔ ɖa, woɖu nu, eye wono nu le egbɔ, eye wodo ɣli bena: Fia Adoniya nenɔ agbe!

²⁶Ke mekpe nye, wò dɔla, kple nunɔla Zadok, Benaya, Yehoyada vi, kpakple wò dɔla Salomo o.

²⁷Nye aƒetɔ fia gbɔe nya sia tso, hafi megblɔ amesi anɔ nye aƒetɔ fia ƒe fiazikpui dzi ɖe eyome la na wò dɔla oa?

²⁸Tete fia Dawid xɔ edzi gblɔ bena; Miyɔ Bat-Seba ɖem! Eye wòva fia la gbɔ le eme hetsi tre ɖe fia la ŋku me.

²⁹Eye fia la ka atam gblɔ bena: Meta Yehowa, amesi ɖem tso hiãwo katã me, ƒe agbe.

³⁰Alesi meta Yehowa, Israel ƒe Mawu la, na wò gblɔ bena: Viwò Salomo azu fia ɖe yonyeme, eye wòano nye fiazikpui dzi ɖe tenyeƒe la, nenema mawɔ egbe sia!

³¹Tete Bat-Seba bɔbɔ ɖe fia la ŋku me hede ta agu gblɔ bena: Nye aƒetɔ fia nanɔ agbe tegbee.

³²Eye fia Dawid gblɔ bena: Miyɔ nunɔla Zadok kple nyagblɔɖila Natan kpakple Benaya, Yehoyada vi ɖem. Esi wova fia la ŋku me la,

³³fia la gblɔ na wo bena: Miɖe miaƒe aƒetɔ ƒe dɔlawo kpe ɖe mia ɖokui ŋu, eye mina vinye Salomo nado nye tedzisɔ, ne miakplɔe yi Gixon.

³⁴Eye nunɔla Zadok kple nyagblɔɖila Natan nasi ami ne le afima ahaɖoe fia ɖe Israel nu; miku kpẽ, eye míado ɣli bena: Fia Salomo nenɔ agbe!

³⁵Emegbe mikplɔe do, eye wòava bɔbɔ nɔ nye fiazikpui dzi ahazu fia ɖe tenyeƒe; elabena eya meɖo, be wòaɖu amegã ɖe Israel kple Yuda dzi.

³⁶Tete Benaya, Yehoyada vi, xɔ edzi gblɔ na fia la bena: Neva me! Alea Yehowa, nye aƒetɔ fia la ƒe Mawu, agblɔ aƒu edzi.

³⁷Alesi Yehowa nɔ kple nye aƒetɔ fia la, nenema wòanɔ kple Salomo, eye wòana eƒe fiazikpui naƒo nye aƒetɔ fia Dawid ƒe fiazikpui ta

³⁸Tete nunɔla Zadok, nyagblɔɖila Natan kple Benaya, Yehoyada vi, kpakple Kretitɔwo kple Pletitɔwo woyi, eye wona Salomo do fia Dawid ƒe tedzisɔ, eye wokplɔe yi Gixon.

³⁹Eye nunɔla Zadok tsɔ lãdzo, si me ami le la, tso agbadɔ la me hesi ami na Salomo, eye woku kpẽ; tete dukɔ blibo la do ɣli bena. Fia Salomo nenɔ agbe!

⁴⁰Emegbe dukɔ blibo la kplɔe ɖo, eye dukɔ la ku dzewo hekpɔ dzidzɔ eteƒe mekɔ o, eye woƒe ɣli na be, anyigba ʋuʋu.

⁴¹Esi Adoniya kple amesiwo katã wokpe ɖe egbɔ la, ɖu nua vɔ tete la, wosee. Ke esi Yoab se kpẽawo ƒe ɖiɖi la, egblɔ bena: Howɔwɔ ka enye si le ɖiɖim le dua me?

⁴²Esi wogale nuƒoƒo dzi la, Yonatan, nunɔla Abyatar vi do, eye Adoniya gblɔ bena: Va, elabena ame zãzɛ nènye, eye gbe nyuia ɖe nèhe ve.

⁴³Yonatan ɖo ŋu gblɔ na Adoniya bena: Ele eme! Míaƒe aƒetɔ fia Dawid tsɔ Salomo ɖo fiae.

⁴⁴Fia la dɔ nunɔla Zadok, nyagblɔɖila Natan kple Benaya, Yehoyada vi, kpakple Kretitɔwo kple Pletitɔwo kpe de eŋu, eye wona wòdo fia ƒe tedzisɔ.

⁴⁵Eye nunɔla Zadok kple nyagblɔɖila Natan wosi ami nɛ heɖoe fia le Gixon, eye wole dzidzɔ kpɔm tso afima gbɔe, eye du la ʋuʋu; esia nye ɣli, si sem miele.

⁴⁶Salomo bɔbɔ nɔ fiazikpui la dzi;

⁴⁷eye fia la ƒe dɔlawo hã yi, be yewoayra míaƒe aƒetɔ fia Dawid gblɔ bena: Wò Mawu ana Salomo ƒe ŋkɔ nade du wu wò ŋkɔ, eye eƒe fiazikpui naƒo wò fiazikpui ta! Tete fia la bɔbɔ ɖe aba dzi.

⁴⁸Eye fia la hã gblɔ be: Woakafu Yehowa, Israel ƒe Mawu, si na amesi ano nye fiazikpui dzi la egbea, eye nye ŋkuwo kpɔe!

⁴⁹Tete dzika tso amesiwo katã Adoniya kpe la ƒo, eye wotsi tre, eye amesiame lé eƒe mɔ.

⁵⁰Ke Adoniya le Salomo vɔ̃m, eye wòtso yi ɖalé vɔsamlekpui la ƒe dzowo.

⁵¹Eye wova gblɔ na Salomo bena: Kpɔ ɖa, Adoniya le fia Salomo vɔ̃m, eye wòɖalé vɔsamlekpui la ƒe dzowo gblɔ bena: Fia Salomo neka atam nam egbe be, mawu eƒe dɔla kple yi o.

⁵²Eye Salomo gblɔ bena: Ne enye nuteƒewɔla la, ekema eƒe taɖaa ɖeke mage ɖe anyigba o: ke ne woakpɔ vɔ̃a ɖe le eŋu la, ekema aku.

⁵³Eye fia Salomo dɔ woɖakplɔe tso vɔsamlekpui la gbɔ ve, eye wòva de ta agu ɖe fia Salomo ŋku me, eye Salomo gblɔ ne bena: Yi aƒewò me!