Read ewe Fiawo I 15 Bible Online

Fiawo I 15 - ewe bible

Fiawo I 15

¹Le Yerobeam, Nebat vi, ƒe fiaɖuɖu ƒe ƒe wuienyilia me la Abiyam zu fia ɖe Yuda dzi.

²Eɖu fia le Yerusalem ƒe etɔ̃. Dadaa ŋkɔ nye Maaxa, Abisalom vinyɔnu.

³Eye wòzɔ le fofoa ƒe nuvɔ̃, siwo katã wòwɔ le eŋgɔ la me, eye eƒe dzi menɔ Yehowa, eƒe Mawu la ŋu blibo abe fofoa Dawid ƒe dzi ene o.

⁴Elabena le Dawid ta Yehowa, eƒe Mawu, na akaɖii le Yerusalem, be wòɖo via le eyome, ne wòalé Yerusalem ɖe te;

⁵elabena Dawid wɔ nusi nyo le Yehowa ŋku me, eye mete ɖa le se, siwo katã wòɖe nɛ la me le eƒe agbe me ŋkekewo katã me o, negbe ɖe Uriya, Xititɔ la ƒe nya me koe.

⁶Eye aʋa nɔ Rexabeam kple Yerobeam dome le eƒe agbe me ŋkekewo katã me.

⁷Abiyam ŋutinya susɔeawo kple nusiwo katã wòwɔ la, woŋlɔ wo ɖe Yuda-fiawo ƒe ŋutinyagbalẽ me. Eye aʋa nɔ Abiyam kple Yerobeam dome.

⁸Eye Abiyam mlɔ fofoawo gbɔ, eye woɖii ɖe Dawid ƒe du la me, eye via Asa zu fia ɖe eteƒe.

⁹Le Israel-fia Yerobeam ƒe fiaɖuɖu ƒe ƒe blavelia me la Asa zu fia ɖe Yuda dzi.

¹⁰Ƒe blane vɔ ɖekɛ woɖu fia le Yerusalem Dadaa ŋkɔ nye Maaxa, Abisalom vinyɔnu.

¹¹Asa wɔ nusi nyo le Yehowa ŋku me abe fofoa Dawid ene.

¹²Enyã matrewɔlawo ɖa le anyigba la dzi, eye wòɖe legba, siwo fofoa wɔ la ɖa.

¹³Eɖe dadaa Maaxa hã ɖa, be magaɖu dzi o, elabena ewo legba na Asera, eye Asa mũ legba la ɖatɔ dzoe ɖe Kidron-bali la me.

¹⁴Ke womeɖe nuxeƒewo ɖa o; gake Asa ƒe dzi nɔ Yehowa ŋu blibo le eƒe agbe me ŋkekewo katã me.

¹⁵Eye wòtsɔ fofoa ƒe nu kɔkɔewo kple eya ŋutɔ ƒe nu kɔkɔewo, siwo nye klosalo, sika kple ŋudɔwɔnuawo, yi Yehowa ƒe mee.

¹⁶Eye aʋa no Asa kple Israel-fia Baesa dome le woƒe agbe me ŋkekewo katã me.

¹⁷Esi Israel-fia Baesa ho ɖe Yuda ŋu la, etso Rama, ne wòaxe mɔ, be Yuda-fia Asa ƒe amea ɖeke magaɖo alo agbɔ o.

¹⁸Tete Asa tsɔ klosalo kple sika, siwo katã kpɔtɔ ɖe Yehowa ƒe aƒe ƒe nudzraɖoƒe kple fia ƒe aƒe ƒe nudzraɖoƒe la, de eƒe dɔlawo si; eye fia Asa dɔ ame ɖo ɖe Aram-fia Ben-Hadad, si enye Xesion vi Tabrimon ƒe vi, amesi le Damasko la gbɔ be, woagblɔ nɛ bena:

¹⁹Nubabla le mía kpli wò dome, le fofonye kple fofowò dome, kpɔ ɖa, mele nunana, si enye klosalo kple sika la, ɖom ɖe wò. Ne ètu nubabla, si le mia kple Israel-fia Baesa dome la, ekema aho adzo le gbɔnye.

²⁰Tete Ben-Hadad ɖo to fia Asa ƒe gbe, eye wòdo eƒe aʋafia ɖo ɖe Israel-duwo me, eye wòsi Iyon, Dan, Abel-Bet-Maaxa kple Kinerot blibo la hekpe ɖe Naftali-nyigba blibo la ŋu.

²¹Eye wòva me, esime Baesa see la, edzudzɔ Rama tsotso, eye woɖana Tirza.

²²Eye fia Asa na woyɔ Yuda blibo la, wo dometɔa ɖeke meto le eme o, eye woyi ɖafɔ kpe kple ati, siwo Baesa tso le Rama tsomi la, eye fia Asa tso wo tso Geba le Benyamin kple Mizpa.

²³Ke Asa ŋutinya susɔeawo katã kple eƒe kalẽwɔwɔwo katã, nusiwo katã wòwɔ kple du, siwo wotso la, woŋlɔ wo ɖe Yuda-fiawo ƒe ŋutinyagbalẽ me; negbe le eƒe amegãkuku me ko wòdze dɔ ɖe afɔ.

²⁴Eye Asa mlɔ fofoawo gbɔ, eye woɖii ɖe fofoawo gbɔ le fofoa Dawid ƒe ɖu la me, eye via Yosafat zu fia ɖe eteƒe.

²⁵Le Yuda-fia Asa ƒe ƒe evelia me la Yerobeam vi Nadab zu fia ɖe Israel dzi, eye woɖu fia ɖe Israel dzi ƒe eve.

²⁶Ewɔ nusi nye vɔ le Yehowa ŋku me, eye wòto fofoa ƒe ʋe me hewɔ eƒe nuvɔ̃, si wòtsɔ ble Israel ɖe nuvɔ̃ me la.

²⁷Tete Axiya vi Baesa, amesi tso Isaxar ƒe aƒe la me, ɖo gbe ɖi ɖe eŋu, eye Baesa wui le Filistitɔwo ƒe Gibeton, esime Nadab kple Israel blibo la ɖe to ɖe Gibeton.

²⁸Baesa wui le Yuda-fia Asa ƒe ƒe etɔ̃lia me, eye wòzu fia ɖe eteƒe.

²⁹Esi wòle fia ɖum la, etsrɔ̃ Yerobeam ƒe aƒe blibo la, eye mena nu gbagbea ɖeke kpɔtɔ na Yerobeam o, ke boŋ etsrɔ̃ wo keŋ le Yehowa ƒe nya, si wògblɔ to eƒe dɔla Axiya, Silotɔ dzi la nu;

³⁰le Yerobeam ƒe nuvɔ̃, siwo wòwɔ hetsɔ ble Israel ɖe nuvɔ̃ me, kple nusiwo wòwɔ hetsɔ do dziku na Yehowa, Israel ƒe Mawu la ta.

³¹Nadab ŋutinya susɔeawo kple nusiwo katã wòwɔ la, woŋlɔ wo ɖe Israel-fiawo ƒe ŋutinyagbalẽ me.

³²Eye aʋa nɔ Asa kple Israel-fia Baesa dome le woƒe agbe me ŋkekewo katã me.

³³Le Yuda-fia Asa ƒe ƒe etɔ̃lia me la Axiya vi Baesa zu fia ɖe Israel blibo la dzi le Tirza ƒe blave vɔ ene.

³⁴Eye wòwɔ nusi nye vɔ̃ le Yehowa ŋku me, eto Yerobeam ƒe ʋe me, eye wòwɔ eƒe nuvɔ̃, siwo wòtsɔ ble Israel de nuvɔ̃ me.