Read ewe Fiawo I 22 Bible Online

Fiawo I 22 - ewe bible

Fiawo I 22

¹Eye wogbɔ ɖe eme ƒe etɔ̃, aʋaa ɖeke menɔ Aram kple Israel dome o.

²Eye wòva me le ƒe etɔ̃lia me be, Yuda-fia Yosafat va Israel-fia gbɔ.

³Eye Israel-fia gblɔ na eƒe dɔlawo bena: Mienyae be, Ramot le Gilead nye mía tɔ oa? Ke míezi kpi gbe exɔxɔ le Aram-fia si.

⁴Eye wògblɔ na Yosafat bena: Avi aʋa kplim le Ramot le Gilead a? Yosafat ɖo ŋu na Israel-fia bena: Mele abe wò ene, nye dukɔ le abe wò dukɔ ene, eye nye sɔwo le abe wò sɔwo ene.

⁵Yosafat gagblɔ na Israel-fia bena: Bia gbe Yehowa se egbe.

⁶Tete Israel-fia ƒo nyagblɔɖilawo nu ƒu, wole ame alafa ene, eye wògblɔ na wo bena: Maho yi aʋa le Ramot le Gilead loo, alo matasia? Woɖo ŋu bena: Ho yi, Aƒetɔ la atsɔe ade asi na fia la.

⁷Eye Yosafat gblɔ bena: Yehowa ƒe nyagblɔɖila bubua ɖeke mele afisia, ne miaɖabia nu le egbɔ oa?

⁸Israel-fia ɖo eŋu na Yosafat bena: Ame ɖeka li, amesi gbɔ wobiaa nu Yehowa le, ke melé fui, elabena metoa nya nyuia ɖeke nam o, negbe vɔ̃a ko, eya nye Mixa, Yimla vi. Ke Yosafat gblɔ bena: Fia meganɔ nu ƒom alea o.

⁹Tete Israel-fia yɔ aƒedzikpɔlaa ɖe gblɔ bena: Yi ɖayɔ Mixa, Yimla vi, ve kaba!

¹⁰Israel-fia kple Yuda-fia Yosafat, wo dometɔ ɖesiaɖe do fiawu bɔbɔ nɔ eƒe fiazikpui dzi le teƒea ɖe le Samaria ƒe agbo nu, eye nyagblɔɖilawo katã le nya gblɔm ɖi le wo ŋku me.

¹¹Tete Zedekiya, Kenaana vi, tsɔ ga wɔ lãdzowo gblɔ bena: Ale Yehowa gblɔ esi: Esiawo natsɔ atu Aramtɔwo, vaseɖe esime natsrɔ̃ wo avɔ.

¹²Eye nyagblɔɖilawo katã gblɔ nya ɖi alea gblɔ bena: Ho yi Ramot le Gilead, eye aɖu dzi! Elabena Yehowa atso wo ade asi na fia

¹³Eye dɔla, si yi Mixa yɔ ge la, ƒo nu kplii gblɔ bena: Kpɔ ɖa, nyagblɔɖilawo ƒe gbe sɔ, wogblɔ nya nyui na fia la; eyata wò hã wò nya nenɔ abe wo dometɔ ɖeka ƒe nya ene, eye ƒo nu nyuie.

¹⁴Mixa ɖo ŋu bena: Meta Yehowa ƒe agbe. Ne menye nya, si Yehowa alo nam la, magblɔ o fi!

¹⁵Esi wòva fia la gbɔ la, fia la gblɔ nɛ bena: Mixa, mího aʋa yi Ramot le Gilead loo, alo mitasia? Eɖo ŋu nɛ bena: Ho yi, eye aɖu dzi! Elabena Yehowa atsɔe ade asi na fia.

¹⁶Fia la gblɔ nɛ bena: Zi nenie mata wò be, gblɔ nyateƒe sɔŋ ko nam le Yehowa ƒe ŋkɔ mea?

¹⁷Egblɔ bena: Mekpɔ Israel blibo la wòka hlẽ ɖe towo dzi abe ale, siwo nu kplɔla mele o ene. Eye Yehowa gblɔ be: Aƒetɔa ɖeke mele amesiawo nu o, wo dome amesiame negbugbɔ yi eƒe me le ŋutifafa me.

¹⁸Tete Israel-fia gblɔ na Yosafat bena: Nyemegblɔe na wò be, metoa nya nyuia ɖeke nam o, negbe vɔ̃a ko oa?

¹⁹Eye wògblɔ bena: Azɔ se Yehowa ƒe gbe: Mekpɔ Yehowa wòbɔbɔ nɔ anyi ɖe eƒe fiazikpui dzi, eye dziƒoʋakɔ blibo la le tsitre ƒo xlãe le eƒe ɖusi kple mia me.

²⁰Eye Yehowa gblɔ bena: Ameka ayi aɖaɖu Axab, ne wòaɖatsi aʋa le Ramot le Gilead? Amesi be ale, ame keme be ale.

²¹Tete gbɔgbɔa ɖe do va Yehowa ŋku me gblɔ bena: Mayi aɖaflui. Yehowa gblɔ nɛ bena: Aleke nawɔe?

²²Eɖo ŋu bena: Mayi aɖanye aʋatsogbɔgbɔ anɔ eƒe nyagblɔɖilawo katã ƒe nu me Egblɔ bena: Àte ŋu aflui, heyi ɖawɔ nenema.

²³Kpɔ ɖa, Yehowae tsɔ aʋatsogbɔgbɔ ɖe wò nyagblɔɖila siawo katã nu; elabena Yehowa ɖo dzɔgbevɔ̃e ɖe ŋuwò.

²⁴Tete Zedekiya, Kenaana vi, te va ƒo to me na Mixa gblɔ bena: Afika Yehowa ƒe gbɔgbɔ dzo le gbɔnye yi hafi ƒo nu kpli wò?

²⁵Mixa gblɔ bena: Àdze sii le gbesigbe nasi atso xɔ me ayi xɔ me, be naɣla ɖokuiwò.

²⁶Eye Israel-fia gblɔ bena: Milé Mixa, ne miakplɔe yi dumegã Amon kple fiavi Yoas gbɔ,

²⁷eye migblɔ bena: Ale fia la gblɔ esi: Mitsɔ amesia de gaxɔ me, eye mina abolo viaɖe koe wòaɖu kple tsi viaɖe koe, vaseɖe esime magbɔ le ŋutifafa me.

²⁸Mixa gblɔ bena: Ne ètrɔ gbɔ le ŋutifafa me la, ekema menye Yehowae ƒo nu to dzinye o! Eye wògblɔ be: Mi dukɔwo katã, miele esema?

²⁹Tete Israel-fia kple Yuda-fia Yosafat woho yi Ramot le Gilead.

³⁰Eye Israel-fia gblɔ na Yosafat bena: Maɖɔ li nye awuwo, eye mayi aʋa la nu, ke wò la, wò awuwo nenɔ ŋuwò. Eye Israel-fia ɖɔ li eƒe awuwo heyi aʋa la nu.

³¹Ke Aram-fia de se na eƒe tasiaɖam-amegãwo gblɔ bena: Miga kpe kple ame tsɛ alo amegãa ɖeke o, ke boŋ mikpe kple Israel-fia ko.

³²Eye wòva me, esime tasiaɖam-amegãwo kpɔ Yosafat la, wogblɔ bena: Israel-fia tututu enye sia! Tete wòtrɔ ɖe eŋu, be yewoakpe kplii; ke Yosafat de asi ɣlidodo me.

³³Esime tasiaɖam-amegãwo kpɔ bena, menye Israel-fiae o la, wodzo le eŋu.

³⁴Ke ŋutsua ɖe vu eƒe ɖa me heda ɖe ya me, eye wote Israel-fia le gawua kpeƒe; tete wògblɔ na eƒe tasiaɖam-kplɔla bena: Trɔ, ne nakplɔm tso aʋa la nu, elabena mexɔ abi.

³⁵Aʋa la nu sẽ gbemagbe, eye wòlé fia la ɖe tsitrenu tasiaɖam la me le Aramtɔwo kasa; ke le fiẽ me la eku, eye ʋu la ɖuɖu ɖe tasiaɖam la me.

³⁶Esi ɣe ɖo to la, ɣli ɖi le asaɖa la me bena: Amesiame neyi eƒe du me, eye amesiame neye eƒe anyigba dzi,

³⁷elabena fia la ku! Eye wotsɔ fia la va Samaria heɖii ɖe Samaria.

³⁸Wova klɔ tasiaɖam la le Samaria-ta to, eye avũwo ɖuɖɔ eƒe ʋu, eye gbolowo va le tsi le eme, le Yehowa ƒe nya, si wògblɔ la nu.

³⁹Axab ŋutinya susɔea kple nusiwo katã wòwɔ, nyiɖuxɔ, si wòtu kple ɖu, siwo katã wotso la, woŋlɔ wo ɖe Israel-fiawo ƒe ŋutinyagbalẽ me.

⁴⁰Eye Axab mlɔ fofoawo gbɔ, eye via Axazya zu fia ɖe eteƒe.

⁴¹Yosafat, Asa vi, zu fia ɖe Yuda dzi le Israel-fia Axab ƒe ƒe enelia me.

⁴²Yosafat xɔ ƒe blaetɔ̃ vɔ atɔ̃, esime wòzu fia, eye woɖu fia ƒe blave vɔ atɔ̃ le Yerusalem. Dadaa ŋkɔ nye Azuba, Silxi vinyɔnu.

⁴³Eto fofoa Asa ƒe ʋe me pɛpɛpɛ, eye mete ɖa o, eye wòwɔ nusi nyo le Yehowa ŋku me.

⁴⁴Nuxeƒewo koe womeɖe ɖa o, eye dukɔ la gasa vɔ hedo dzudzɔ le nuxeƒewo.

⁴⁵Eve Yosafat bia nu kple Israel-fia.

⁴⁶Yosafat ŋutinya susɔea, eƒe kalẽ, si wòwɔ kple aʋa, si wòwɔ la, woŋlɔ wo ɖe Yuda-fiawo ƒe ŋutinyagbalẽ me.

⁴⁷Eye wònyã matrewɔla, siwo kpɔtɔ le fofoa Asa ŋɔli la ɖa le anyigba dzi.

⁴⁸Fiãa ɖeke menɔ Edom o, ke boŋ du dzikpɔlaa ɖee nye fia.

⁴⁹Eye Yosafat wɔ Tarsis-ʋuwo, be wòaɖatsɔ sika tso Ofir vɛ; ke womede o, elabena ʋuawo gbã le Ezeon-Geber.

⁵⁰Ɣemaɣi Axab vi Axazya gblɔ na Yosafat bena: Na nye dɔlawo kple wò dɔlawo nanɔ miwo me; ke Yosafat melɔ̃ o.

⁵¹Eye Yosafat mlɔ fofoawo gbɔ, eye woɖii ɖe fofoawo gbɔ le fofoa Dawid ƒe du la me, eye via Yoram zu fia ɖe eteƒe.

⁵²Axazya, Axab vi, zu fia ɖe Israel dzi le Samaria le Yuda-fia Yosafat ƒe ƒe wuiadrelia me, eye woɖu fia ɖe Israel dzi ƒe eve.

⁵³Ewo nusi nye vɔ̃ le Yehowa ŋku me, eye wòto fofoa kple dadaa ƒe ʋe me kpakple Yerobeam, Nebat vi, amesi ble Israel de nuvɔ̃ me la ƒe ʋe me.

⁵⁴Esubɔ Baal hede ta agu nɛ, eye wòdo dziku na Yehowa, Israel ƒe Mawu la, abe alesi fofoa wo pɛpɛpɛ ene.