Read ewe Fiawo I 6 Bible Online

Fiawo I 6 - ewe bible

Fiawo I 6

¹Eye wòva me le Israel-viwo ƒe ʋuʋu tso Egipte-nyigba dzi ƒe alafa ene blanyilia me, le esime Salomo ɖu fia ɖe Israel dzi ƒe ene megbe la, ede asi xɔtutu me na Yehowa le ɣlati Ziw, si nye ɣleti evelia dzi.

²Xɔ, si Salomo tu na Yehowa la ƒe didime le abɔklugui blaade, eƒe kekeme le abɔklugui blave, eye eƒe kɔkɔme le abɔklugui blaetɔ̃.

³Akpata, si le gbedoxɔ lɔ ƒe dodonuxɔ nu la, ƒe didime le abɔklugui blave le xɔ la ƒe kekeme nu, eye wòkeke abɔklugui ewo le xɔ la ŋgɔdze.

⁴Eye wòɖe fesre, siwo ƒe nugbɔ lɔ le gota gome la, ɖe xɔ la ŋu, eye wòde adzrala wo nu.

⁵Eye wòtu xɔŋuxɔewo ɖe xɔ la ƒe gli ŋu godoo, ale be woƒo xlã xɔ la ƒe gliwo kple dodonuxɔ kpakple megbetɔ, eye wotso wo me kotoekotoe.

⁶Esrã wo dzi. Anyigbaxɔ la keke abɔklugui atɔ, dometɔa keke abɔklugui ade, eye tametɔ keke abɔklugui adre; elabena eɖo glikpui ɖe xɔ la ŋu la gota gome ƒo xlãe, be dzisasrãwo magato xɔ la ƒe gli o.

⁷Eye wotsɔ koe, siwo wofu tso keke kpeʋe me la, tu xɔ lae, ale be womese gakpee, pɛ alo gadɔwɔnua ɖeke ŋkɔ le xɔ la tutu me o.

⁸Eve ʋɔtru, si le xɔŋuxɔe la ƒe anyigbaxɔ nu la, le xɔ la ƒe ɖusikpa dzi, eye wotoa atrakpui godogodo dzi yia xɔ dometɔ me, eye tso dometɔ me woyia etametɔ me.

⁹Eye wòtu xa la wu enu; xɔ la ƒe daɖedziwo nye sederti, eye wògbãe kple sederʋuƒowo

¹⁰Etu xɔŋuxɔewo ɖe xɔ blibo la ŋu va kpe ɖo, siwo dome ɖesiaɖe ka abɔklugui atɔ̃, eye wòtso sederti wɔ woa kple xɔ la ɖekae.

¹¹Eye Yehowa ƒe gbe va Salomo gbɔ bena;

¹²Etu xɔ sia nam; ne èzɔ le nye ɖoɖowo nu, ewo nye kɔnuwo dzi, eye nèlé nye sewo katã me ɖe asi hezɔ ɖe wo nu la, ekema mawɔ nye nya, si megblɔ na fofowò Dawid la, dzi na wò.

¹³Eye manɔ Israel-viwo dome, eye nyemagblẽ nye dukɔ Israel ɖi o.

¹⁴Eye Salomo tu xɔ la wu enu.

¹⁵Etsɔ sederʋuƒowo klã ɖe xɔ la me le gli ŋu, eklã ʋuƒoawo tso xɔ la ƒe anyi me ɖatɔ eta me daɖedziawo, eye wòklã sesewuʋuƒowo ɖe xɔ la ƒe anyigba.

¹⁶Eklã sederʋuƒowo ɖe megbexɔ, si didi abɔklugui blave la, hã me tso anyi me datɔ daɖedziawo. Alea wòwɔ megbexɔ, si nye kɔkɔeƒe ƒe kɔkɔeƒe la mee.

¹⁷Dodonuxɔ la ƒe didime le abeklugui blane.

¹⁸Eye wòŋlɔ treklɔnutsetsewo kple seƒoƒo kekewo ɖe sederʋuƒo, siwo le xɔa me la ŋu; sederʋuƒo le afisiafi, eye kpea ɖeke ŋu medze o.

¹⁹Eye wòdzra megbexɔ la me ɖo, be woatsɔ Yehowa ƒe nubablaɖaka la ada ɖe afima.

²⁰Megbexɔ la ƒe didime le abɔklugui blave, eƒe kekeme le abɔklugui blave, eye eƒe kekeme le abɔklugui blave, wofa sika nyuitɔ de eme, eye wotso sederʋuƒo wɔ vɔsamlekpui da ɖe enu.

²¹Salomo fa sika nyuitɔ ɖe xɔ la me, eve wotso sika kɔsɔkɔsɔ tso ga ɖe megbexɔ, si ŋu wofa sika ɖo la nu.

²²Efa sika ɖe xɔ blibo la ŋu vaseɖe xɔ la ƒe mlɔenu, eve wòfa sika ɖe vɔsamlekpui, si le megbexɔa nu la, ŋu blibo.

²³Eye wotso amiti wɔ Kerubi eve ɖe megbexɔ la me, wokɔ abɔklugui ewoewo.

²⁴Kerubi la ƒe aʋala ɖeka le abɔklugui atɔ̃: tso eƒe aʋala ɖeka nu vaseɖe ekeme nu le abɔklugui ewo.

²⁵Kerubi evelia to hã la abɔklugui ewo; dzidze ɖeka kple nɔnɔme ɖeka ŋugbe li na Kerubi eveawo.

²⁶Kerubi ɖeka ƒe kɔkɔme le abɔklugui ewo, eye evelia tɔ hã le nenema.

²⁷Eye wòtsɔ Kerubiawo ɖo xɔ la me; Kerubiawo ke aʋalawo me, ale be Kerubi ɖeka ƒe aʋala tɔ gli la ƒe ati, eye evelia ƒe aʋala ɖatɔ gli la ƒe afime, eye woƒe aʋalawo va kpe wo nɔewo le xɔ la titina.

²⁸Efa sika ɖe Kerubiawo ŋu.

²⁹Eye woŋlɔ Kerubiwo, detiwo kple seƒoƒo kekewo ɖe xɔwo kple eve ƒe gliwo katã ŋu le eme.

³⁰Eye wòfa sika ɖe xɔwo kple eve ƒe anyigba.

³¹Etsɔ amiti kpa ʋɔtru agavee ɖe megbexɔ la nu; ʋɔtruti tametɔ kple axadzitɔwo xɔ gli la ƒe akpa atɔ̃liawo ɖeka.

³²Amiti wòtsɔ kpa ʋɔtru agaveawoe, eye woŋlɔ Kerubiwo, detiwo kple seƒoƒo kekewo ɖe wo ŋu, eye wòfa sika ɖe wo dzi; eƒo sika la gbabɛ tsɔ fa ɖe Kerubiawo kple detiawo dzi.

³³Alea wòtsɔ amiti kpa ʋɔtrutiwo de dodonuxɔ ƒe mɔ nu, eye woxɔ gli la ƒe akpa eneliawo ɖeka.

³⁴Etso sesewuʋuƒo kpa ʋɔtruawo kple eve, eye aga eve, siwo woate ŋu aʋu la, li na ʋɔtruawo dome ɖesiaɖe.

³⁵Eŋlɔ Kerubiwo, detiwo kple seƒoƒo kekewo ɖe wo ŋu, eye wòfa sika ɖe wo dzi, ale be wòsɔ nɔnɔmeawo dzi pɛ.

³⁶Eye wòtɔ kpɔ emetɔ; etsɔ kpe fufu ɖo amli etɔ̃, eye wòtu sedertiwo ɖe wo dzi.

³⁷Woɖo Yehowa ƒe xɔ la gɔme anyi la ƒe enelia me le ɣleti Ziw dzi,

³⁸eye wowu xɔ la kple eŋu nuwo katã nu ɖe eƒe ɖoɖowo katã nu le ƒe wuiɖekɛlia me le ɣleti Bui, si nye ɣleti enyilia dzi. Ale wotui ƒe adre sɔŋ.