Read ewe Fiawo I 9 Bible Online

Fiawo I 9 - ewe bible

Fiawo I 9

¹Eye wòva me, esime Salomo wui Yehowa ƒe xa kple fia ƒe xɔ tutu kpakple nusiwo katã Salomo ɖo ɖe ta me, be yeawo nu la,

²Yehowa ɖe eɖokui fia Salomo zi evelia, abe alesi wòɖe eɖokui fiae le Gibeon ene.

³Eye Yehowa gblɔ nɛ bena: Mese wò gbedodoɖa kple wò koko, si neƒo le ŋkunye me la; meka xɔ sia, si nètu, be matsɔ nye ŋkɔ aɖo afima tegbee la ŋu, eye nye ŋku kple nye dzi anɔ afima ŋkekeawo katã.

⁴Ke wò la, ne èzɔ le ŋkunye me, abe alesi fofowò Dawid zɔ le dzimekɔkɔ kple dzɔdzɔenyenye me ene, ne èwɔ pɛpɛpɛ, abe alesi mede se na wò ene, eye nèlé nye ɖoɖowo kple kɔnuwo me ɖe asi la,

⁵ekema mana wò fiaɖuƒe ƒe fiazikpui nali ke ɖe Israel dzi tegbee, abe alesi megblɔ na fofowò Dawid ene bena: Wò amesiwo anɔ Israel-fiazikpuia dzi la, nu matso akpɔ o.

⁶Ne mia kple mia viwo miede megbe le ŋunye, eye mielé nye se kple nye ɖoɖo, siwo mede asi na mi la me ɖe asi o, eye mieyi ɖasubɔ mawu bubuwo hede ta agu na wo la,

⁷ekema matsrɔ̃ Israel ɖa le anyigba, si mena wo la dzi, eye mate xɔ sia, si ŋu mekɔ hena nye ŋkɔ la ɖa le ŋkunye me, eye Israel azu hamelo kple alɔmeɖenu le dukɔwo katã dome.

⁸Xɔ sia azu glikpo, eye amesiame, si to eŋu yina la ƒe nu aku, eye wòaɖo tsia abia bena: Nukaŋuti Yehowa wo anyigba sia kple xa sia alea?

⁹Eye woaɖo eŋu bena: Esi wogblẽ Yehowa, woƒe Mawu, si kplɔ wo fofowo tso Egipte-nyigba dzi la ɖi, eye woku ɖe mawu bubuwo ŋu, ɖe ta agu na wo hesubɔ wo la, eyata Yehowa he dzɔgbevɔ̃e siawo katã va wo dzi ɖo.

¹⁰Eye Salomo tsɔ ƒe blave tu xa eveawo, siwo nye Yehowa ƒe xɔ kple fia ƒe xɔ.

¹¹Xiram, Tiro fia, kpe ɖe eŋu kple sedertiwo kple sesewutiwo kpakple sika, abe alesi wòdi ene. Ɣemaɣi Salomo na du blave Xiram ɖe Galilea-nyigba dzi.

¹²Eye Xiram tso Tiro be, yeaɖakpɔ du, siwo Salomo tsa nɛ la ɖa, ke womadze eŋu o.

¹³Eye wògblɔ bena: Nɔvinye, du ka ƒomeviwo nye esi nènam? Eye wòna ŋkɔ wo be Kabul-nyigba vaseɖe egbe.

¹⁴Eye Xiram ɖo sika talento alafa ɖeka kple blave ɖe fia la.

¹⁵Ale yakadɔwɔla, si wo fia Salomo ɖe, be woatu Yehowa ƒe xɔ, eya ŋutɔ ƒe xɔ kple Milo, eye woaɖo gli ɖe Yerusalem, Xazor, Megido kple Gezer ŋu la, ƒe nya la enye si:

¹⁶Egipte-fia Farao ho va xɔ Gezer, eye wòtɔ dzoe hewu Kanaanitɔ, siwo le eme, eye wòtsɔe wɔ atsuƒeyinu na vianyɔnu, si nye Salomo srɔ̃.

¹⁷Eye Salomo tso Gezer kple anyigbe Bet-Xoron,

¹⁸Baalat kple Tadmor, si le gbedzi le anyigba la dzi,

¹⁹kple nudzraɖoƒexɔwo ƒe du, siwo katã le Salomo si, tasiaɖamwo ƒe du kple sɔdolawo ƒe du hekpe ɖe xɔ, siwo Salomo ɖi be, yeatu ɖe Yerusalem kple Libanon kpakple eƒe dziɖuƒe ƒe anyigba blibo la dzi la ŋuti.

²⁰Dukɔ, siwo katã kpɔtɔ le Amoritɔwo, Xititɔwo, Perizitɔwo, Xiwitɔwo kple Yebusitɔwo dome, amesiwo metso Israel-viwo dome o;

²¹woƒe vi, siwo kpɔtɔ ɖe anyigba dzi le wo megbe, amesiwo Israel mete ŋu tsrɔ̃ gbidigbidi o la, fia Salomo tsɔ wɔ yakadɔwɔlawoe vaseɖe egbe.

²²Ke Salomo metsɔ amea ɖeke wɔ kluvi le Israel-viwo dome o, ke boŋ woawo nye aʋawɔlawo, eƒe dɔlawo, eƒe amegãwo kple tatɔwo kple aʋafiawo le eƒe tasiaɖamwo kple sɔdolawo nu.

²³Dɔdzikpɔlawo ƒe amegã, siwo le Salomo ƒe dɔ la nu, wole ame alafa atɔ̃ kple blaatɔ̃, siwo kpɔa amesiwo le dɔ wotu la dzi.

²⁴Ke esi Farao vinyɔnu ʋu tso Dawid ƒe du la me yi eƒe xɔ, si wòtu nu me la, Salomo tu Milo.

²⁵Eye Salomo sa numevɔ kple akpedavɔ le vɔsamlekpui, si wòɖi na Yehowa la dzi zi etɔ̃ le ƒe ɖeka me, eye wòdo dzudzɔ le edzi le Yehowa ŋku me. Ale wowu xɔ la nu.

²⁶Fia Salomo kpa ʋuwo hã ɖe Ezeon-Geber, si le Elon gbɔ le Avaƒu la nu le Edom-nyigba dzi.

²⁷Eye Xiram do nuwo, siwo me eƒe dɔlawo, amesiwo nye ʋukulawo kple ƒu ŋu dɔwɔlawo, kpe ɖe Salomo ƒe dɔlawo ŋu.

²⁸Eye wova Ofir hetsɔ, sika talento alafa ene kple blave tso afima gbɔe vɛ na fia Salomo.