Read ewe Fiawo II 15 Bible Online

Fiawo II 15 - ewe bible

Fiawo II 15

¹Le Israel-fia Yerobeam ƒe ƒe blave vo adrelia me la Azarya, Yuda-fia Amazya ƒe vi, zu fia.

²Exɔ ƒe wuiade, esime wòzu fia, eye wòdu fia le Yerusalem ƒe blaatɔ̃ va eve. Dadaa ŋkɔ nye Yexalya tso Yerusalem.

³Ewɔ nusi dze Yehowa ŋu, abe alesi fofoa Amazya wɔ pɛpɛpɛ ene.

⁴Negbe nuxeƒewo ko womeɖe ɖa o, eye dukɔ la gasa vɔ hedo dzudzɔ le nuxeƒewo.

⁵Ke Yehowa ɖe fu na fia la, eye wòdze anyi vaseɖe eƒe kugbe, eye wònɔ xɔa ɖe me le aga. Eye fia ƒe vi Yotam no aƒe la nu hedrɔ̃ ʋɔnu dukɔ hahoo la.

⁶Azarya ŋutinya susɔea kple nusiwo katã wòwɔ la, woŋlɔ wo ɖe Yuda-fiawo ƒe ŋutinyagbalẽ me.

⁷Eye Azarya mlɔ fofoawo gbɔ, eye woɖu ɖe fofoawo gbɔ le Dawid ƒe du la me, eve via Yotam zu fia ɖe eteƒe.

⁸Le Yuda-fia Azarya ƒe ƒe blaetɔ̃ vɔ enyilia me la Zaxarya, Yerobeam vi, zu fia ɖe Israel dzi le Samaria dzinu ade.

⁹Ewɔ nusi nye vɔ̃ le Yehowa ŋku me, abe alesi fofoawo wɔ ene; eye meɖe asi le Yerobeam, Nebat vi ƒe nuvɔ̃, siwo wòtsɔ ble Israel de nuvɔ̃ me la ŋu o.

¹⁰Tete Salum, Yabes vi, ɖo nugbe ɖe eŋu, eye wòwui le Yibleam hezu fia ɖe eteƒe.

¹¹Zaxarya ŋutinya susɔea la, woŋlɔe ɖe Israel-fiawo ƒe ŋutinyagbalẽ me.

¹²Esia nye nya, si Yehowa gblɔ na Yehu bena: Viwòwo anɔ Israel-fiazikpui la dzi vaseɖe dzidzime enelia dzi: eye nenema wòva mee.

¹³Le Yuda-fia Uziya ƒe ƒe blaetɔ̃ vɔ asiekelia me la Salum, Yabes vi, zu fia, eye woɖu fia le Samaria dzinu ɖeka.

¹⁴Tete Menaxem, Gad vi, tso Tirza ho va Samaria, eye wowu Salum, Yabes vi la, hezu fia ɖe eteƒe.

¹⁵Salum ŋutinya susɔea kple alesi wòɖo nugbe la, woŋlɔ wo ɖe Israel-fiawo ƒe ŋutinyagbalẽ me.

¹⁶Ɣemaɣi Menaxem tsrɔ̃ Tapuax kple nusiwo katã le eme kpakple eƒe nutowo me, elabena esi wotso Tirza va la, womeʋu agbo nɛ o, eyata wòsi wo, eye wòdze ƒo le woƒe funɔwo katã nu.

¹⁷Le Yuda-fia Azarya ƒe ƒe blaetɔ̃ vɔ asiekelia me la Menaxem, Gad vi, zu fia ɖe Israel dzi ƒe ewo le Samaria.

¹⁸Ewo nusi nye vɔ̃ le Yehowa ŋku me, eye meɖe asi le Yerobeam, Nebat vi ƒe nuvɔ̃, siwo wòtsɔ ble Israel de nuvɔ̃ me la ŋu o.

¹⁹Eŋɔli Asur-fia Pul va dze anyigba la dzi, eye Menaxem tsa klosalo talento akpe ɖeka na Pul, be woakpe ɖe ye ŋu, ne fiaɖuɖu la nali ke ɖe ye si me.

²⁰Eye Menaxem dzo ga le Israel tso aʋawolawo katã si, be ŋutsu sia ŋutsu natsɔ klosalo sekel blaatɔ̃ na Asur-fia. Ale Asur-fia gbugbɔ, eye metsi anyigba la dzi afima o.

²¹Menaxem ŋutinya susɔea kple nusiwo katã wòwɔ la, woŋlɔ wo ɖe Israel-fiawo ƒe ŋutinyagbalẽ me.

²²Eye Menaxem mlɔ fofoawo gbɔ, eye via Pekaxya zu fia ɖe eteƒe.

²³Le Yuda-fia Azarya ƒe ƒe blaatɔ̃lia me la Pekaxya, Menaxem vi, zu fia ɖu Israel dzi ƒe eve le Samaria.

²⁴Ewɔ nusi nye vɔ le Yehowa ŋku me, eye meɖe asi le Yerobeam, Nebat vi ƒe nuvɔ̃, siwo wòtsɔ ble Israel de nuvɔ̃ me la ŋu o.

²⁵Tete eƒe fia ŋu me Pekax, Remalya vi, ɖo nugbe ɖe eŋu, eye wòwui le fia ƒe aƒe ƒe mɔ̃ me le Samaria: Arkob kple Arye kpakple ŋutsu blaatɔ̃, siwo nye Gilead-viwo, kpe ɖe eŋu, eye wòwui hezu fia ɖe eteƒe.

²⁶Pekaxya ŋutinya susɔea kple nusiwo katã wòwɔ la, kpɔ ɖa, woŋlɔ wo ɖe Israel-fiawo ƒe ŋutinyagbalẽ me.

²⁷Le Yuda-fia Azarya ƒe ƒe blaatɔ̃ vɔ evelia me la Pekax, Remalya vi, zu fia ɖe Israel dzi ƒe blave le Samaria.

²⁸Ewɔ nusi nye vɔ̃ le Yehowa ŋku me, eye meɖe asi le Yerobeam, Nebat vi ƒe nuvɔ̃, siwo wotso ble Israel de nuvɔ̃ me la ŋu o.

²⁹Le Israel-fia Pekax ŋɔli la Asur-fia Tiglat-Pileser va, eye wòxɔ Yion, Abel-Bet-Maaxa, Yanoax, Kedes, Xazor, Gilead kple Galilea, si nye Naftali-nyigba blibo la, eye wòkplɔ wo yi Asur.

³⁰Tete Xosea, Ela vi, ɖo nugbe ɖe Pekax, Remalya vi la ŋu, eye wòwui hezu fia ɖe eteƒe le Yotam, Uziya vi ƒe ƒe blavelia me.

³¹Pekax ŋutinya susɔea kple nusiwo katã wòwɔ la, kpɔ ɖa, woŋlɔ wo ɖe Israel-fiawo ƒe ŋutinyagbalẽ me.

³²Le Israel-fia Pekax, Remalya vi ƒe ƒe evelia me la Yotam, Yuda-fia Uziya ƒe vi, zu fia.

³³Exɔ ƒe blave vo atɔ̃, esime wòzu fia, eye woɖu fia ƒe wuiade le Yerusalem. Dadaa ŋkɔ nye Yerusa, Zadok ƒe vinyɔnu.

³⁴Ewo nusi dze Yehowa ŋu; alesi fofoa Uziya wɔ la, nenema pɛpɛpɛ wòwɔ.

³⁵Negbe nuxeƒewo ko womeɖe ɖa o, eye dukɔ la gasa vɔ hedo dzudzɔ le nuxeƒewo. Eyae de dzigbegbo le Yehowa ƒe aƒe la nu.

³⁶Yotam ŋutinya susɔea kple nusiwo katã wòwɔ la, woŋlɔ wo ɖe Yuda-fiawo ƒe ŋutinyagbalẽ me.

³⁷Ɣemaɣi Yehowa de asi Aram-fia Rezin kple Pekax, Remalya vi dɔdɔ me ɖe Yuda ŋu.

³⁸Eye Yotam mlɔ fofoawo gbɔ, eye woɖu ɖe fofoawo gbɔ ɖe fofoa Dawid ƒe du la me, eye via Axaz zu fia ɖe eteƒe.