Read ewe Fiawo II 19 Bible Online

Fiawo II 19 - ewe bible

Fiawo II 19

¹Esime fia Xizkiya see la, edze eƒe awuwo, eye wòta akpanya heyi Yehowa ƒe aƒe la me.

²Eye wòdo Elyakim, amesi le aƒea nu, kple Sebna, agbalẽŋlɔla, kpakple nunɔlawo ƒe ame tsitsiwo, amesiwo ta akpanya la, ɖo ɖe nyagblɔɖila Yesaya, Amoz vi gbɔ,

³ne woagblɔ nɛ bena: Ale Xizkiya gblɔ esi: Egbe enye xaxa-, tohehe-kple vlodogbe; elabena viwo ɖo dzidzi me, gake ŋusẽ meli, ne wòadzi wo o.

⁴Ɖewohi Yehowa, wò Mawu, se Rabsake, amesi eƒe aƒetɔ Asur-fia dɔ ɖo ɖa, be wòaɖe alɔme le Mawu gbagbe la ŋu la ƒe nyawo katã, eye woahe to nɛ le nya, siwo Yehowa, wò Mawu, se la ta; eyata ɖo gbe ɖa ɖe ame susɔe, siwo li la ta!

⁵Eye Xizkiya ƒe dɔlawo va Yesaya gbɔ.

⁶Tete Yesaya gblɔ na wo bena: Ale miagblɔ na miaƒe aƒetɔ enye si: Yehowa ƒe gbe enye si: Megavɔ̃ nya, siwo Asur-fia ƒe ɖekakpuiwo tso ɖe alɔme le ŋunye nèse la o!

⁷Kpɔ ɖa, made gbɔgbɔa ɖe eme, eye wòase nyaa ɖe ahagbugbɔ avi eƒe anyigba dzi, eye mana woatsi yi nu le eƒe anyigba dzi.

⁸Esi Rabsake gbugbɔ yi la, ekpɔ Asur-fia wòle aʋa wɔm kple Libna, elabena ese be, eho tso Laxis.

⁹Ke esi wose le Kus-fia Tirhaka ŋu be: Kpɔ ɖa, eho, be yeawɔ aʋa kpli wò la, egadɔ amewo ɖo ɖe Xizkiya, ne woagblɔ nɛ bena:

¹⁰Ale miagblɔ na Xizkiya enye si: Megana wò Mawu, si ŋu nèle dzi ɖom ɖo la, naɖu wò nagblɔ be: womatsɔ Yerusalem ade asi na Asur-fia o.

¹¹Kpɔ ɖa, wò ŋutɔ èse nusi Asur-fia wo anyigbawo katã, vaseɖe esime wotsrɔ̃ wo, eye woaɖe wò ya?

¹²Ɖe dukɔ, siwo fofonyewo tsrɔ̃: Gozan, Xaran, Rezef kple Eden-viwo, siwo le Telasar la ƒe mawuwo ɖe woa?

¹³Afika Xamat-fia, Arpad-fia kple du Sefarwayim, Hena kple Iwa ƒe fia le?

¹⁴Esi Xizkiya xa agbalẽa le dɔlawo si xlẽe la, eyi Yehowa ƒe aƒe la me, eye Xizkiya kekee ɖe Yehowa ŋku me.

¹⁵Eye Xizkiya do gbe ɖa le Yehowa ŋku me gblɔ bena: Yehowa, Israel ƒe Mawu, asi nɔa Kerubiwo dzi, wò ɖeka koe nye Mawu ɖe anyigba dzi fiaɖuƒewo katã dzi, wòe wo dziƒo kple anyigba.

¹⁶Yehowa, ƒu to anyi, ne nase nu! Yehowa, ʋu wò ŋkuwo, ne nakpɔ nu, eye se Sanxerib ƒe nya, siwo wòɖo ɖa, be yeatsɔ ɖe alɔme le Mawu gbagbe la ŋu!

¹⁷Yehowa, Asur-fiawo nya tsrɔ̃ dukɔwo kple woƒe anyigbawo vava.

¹⁸Wotsɔ woƒe mawuwo de dzo me, elabena menye mawuwo wonye o, ke boŋ amegbetɔwo ƒe asinu dɔwɔwɔwoe, ati kple kpewo wonye, eyata wo srɔ̃ wo.

¹⁹Eyata Yehowa, mia Mawu, ɖe mi tso esi me dzro, ne anyigba dzi tiaɖuƒewo katã nadze sii bena, wò ɖeka koe nye Yehowa Mawu!

²⁰Tete Yesaya, Amoz vi, dɔ ame ɖo ɖe Xizkiya gblɔ bena: Ale Yehowa, Israel ƒe Mawu la, gblɔ esi: Gbe, si nèdo ɖa nam le Asur-fia Sanxerib ŋuti la, mesee.

²¹Ale Yehowa gblɔ ɖe eŋu enye si: Ɖetugbi, Zion vinyɔnu, ɖe alɔme le ŋuwo, eye wòke wò, Yerusalem vinyɔnu ʋuʋu ta ɖe yowòme.

²²Ameka nedo vloe, eye ameka ŋu neɖu fewu le, ameka ta nèɖo ɣli ɖo, eve ameka ŋu nèfɔ mo dzi ɖo? Israel ƒe kɔkɔetɔ lae loo!

²³Edo vlo Aƒetɔ la to wò dɔlawo dzi gblɔ bena: Metsɔ nye tasiaɖam gbogboawo va toawo ta me kple Libanon ƒe tsutsuẽ aƒe, eye melã eƒe sederti kɔkɔwo kple eƒe sesewu nyuitɔwo, azɔ mege ɖe eƒe nɔƒe kɔkɔwo kple eƒe abɔmeti dodowo gbɔ;

²⁴meɖe vudo, eye meno du bubu me tɔwo ƒe tsi, eye metsɔ nye afɔƒome na Egipte tɔsisiwo katã mie.

²⁵Mesee kpɔ be, metre ewɔwɔ tso tititi ke, eye meɖoe tso gbaɖegbe ke oa? Azɔ mena wòva me, be wogblẽ du sesẽwo wòzu glikpo.

²⁶Wo me nɔlawo ƒe lãme tu, dzi ɖe le wo ƒo, eye ŋu kpe wo; woɖi agblemenu kple gbe mumu, xɔtagbe kple bli, si tsi tonu hafi va ƒu.

²⁷Menya wò anyinɔnɔ, wo dodo kple wò gbɔgbɔ kpakple wò agbodzedze ɖe ŋunye.

²⁸Esi wò agbodzedze ɖe ŋunye kple wò dada va nye to me ŋuti la, eyata made nye ga wò ŋɔti, eye made nye numega nu na wò akplɔ wò agbugbɔ ato mɔ, si neto va la.

²⁹Eye esia anye dzesi na wò. Le ƒe sia me la miaɖu nusiwo mie le wo ɖokui si, eye le ƒe evelia me la miaɖu flu me nuwo, eye le ƒe etɔ̃lia me la miaƒã nu aŋe nu, eye miade weingblewo aɖu wo me kutsetsewo.

³⁰Yuda ƒe aƒe la ƒe amesiwo woɖe, eye wòkpɔtɔ la, aɖe ke aɖo ta to me, eye woatse ku ɖe dzi me.

³¹Elabena ame susɔeawo ado tso Yerusalem, eye amesiwo woɖe la, atso Zion-to la dzi; Yehowa Zebaot ƒe ŋuʋaʋã la le esia wo ge.

³²Eyata ale Yehowa gblɔ ɖe Asur-fia ŋu enye si; Mava du sia me o, eye mada aŋutrɔ ɖe eme o, mate ɖe eŋu kple akpoxɔnu o, eye maƒu kpo ɖe eŋu o.

³³Agbugbɔ ato mo, si dzi wòto va, eye mava du sia me o Yehowa ƒe gbee nye esia!

³⁴Makpɔ du sia ta, eye maɖee, le nye ŋutɔ kple nye dɔla Dawid ta.

³⁵Eye wòva me le zã ma me be, Yehowa ƒe dɔla do ɖawu ame akpe alafa ɖeka kple blanyi vɔ atɔ̃ le Asurtɔwo ƒe asaɖa me. Esi wofɔ ŋdi kanya la, kpɔ ɖa, ame kukuwo sɔŋ koe li.

³⁶Tete Asur-fia Sanxerib ho dzo gbugbɔ yi aƒe, eye woɖanɔ Niniwe.

³⁷Eye wòva me, esime wòle gbe dom ɖa le eƒe mawu Nisrox ƒe me la, evia Adramelex kple Sarezer wowui kple yi, eye wòsi yi Ararat-nyigba dzi, eye via Esar-Xadon zu fia ɖe eteƒe.