Read ewe Fiawo II 24 Bible Online

Fiawo II 24 - ewe bible

Fiawo II 24

¹Eŋɔli Babel-fia Nebukadnezar ho va, eye Yoyakim zu etevi ƒe etɔ̃; tete wòdze aglã de eŋu.

²Eye Yehowa kplɔ Kaldeatɔwo ƒe adzohawo, Moabitɔwo ƒe adzohawo kple Amon-viwo ƒe adzohawo dee; èkplɔ wo de Yuda, ne woatsrɔ̃e, le Yehowa ƒe nya, si wògblɔ to eƒe dɔla, siwo nye nyagblɔɖilawo dzi la nu.

³Le Yehowa ƒe nya la nu ko esia va Yuda dzi ɖo, ne wòatee ɖa le eƒe ŋku ta le Manase ƒe nuvɔ̃wo kple nusiwo katã wòwɔ la ŋuti;

⁴hekpe ɖe ʋu maɖifɔ, si wòkɔ ɖe anyi, eye wotsɔ ʋu maɖifɔ yɔ Yerusalem taŋ la ŋuti; eyata Yehowa meba, yeatsɔe ake o.

⁵Yoyakim ŋutinya susɔea kple nusiwo katã wòwɔ la, woŋlɔ wo ɖe Yuda-fiawo ƒe ŋutinyagbalẽ me.

⁶Eye Yoyakim mlɔ fofoawo gbɔ, eye via Yoyaxin zu fia ɖe eteƒe.

⁷Ke Egipte-fia megaho tso eƒe anyigba dzi azɔ o, elabena Babel-fia xɔ anyigba, siwo katã nye Egipte-fia tɔ tso Egipte-toʋu la nu vaseɖe Frat-tɔsisi la nu.

⁸Yoyaxin xɔ ƒe wuienyi, esime wòzu fia, eye woɖu fia dzinu etɔ̃ le Yerusalem. Dadaa ŋkɔ nye Nexusta, Elnatan ƒe vinyɔnu, tso Yerusalem.

⁹Ewo nusi nye vɔ̃ le Yehowa ŋku me, abe alesi fofoa wɔ pɛpɛpɛ ene.

¹⁰Ɣemaɣi Babel-fia Nebukadnezar ƒe dɔlawo ho ɖe Yerusalem ŋu, eye woɖe to ɖe du la.

¹¹Eye esime eƒe dɔlawo ɖe to ɖee la, Babel-fia Nebukadnezar va dze du la dzi.

¹²Tete Yuda-fia Yoyaxin do yi Babel-fia gbɔ, eya kple dadaa kple eƒe dɔlawo, eƒe amegãwo kple eƒe aƒemenu dzikpɔlawo, eye Babel-fia ɖe aboyoe le eƒe fiaɖuɖu ƒe ƒe enyilia me.

¹³Eye wòlɔ Yehowa ƒe me kesinɔnuwo katã kple fia ƒe me kesinɔnuwo katã tso afima, eye wògbã sikanu, siwo katã Israel-fia Salomo wɔ ɖe Yehowa ƒe xɔ la me, abe alesi Yehowa gblɔ ene.

¹⁴Eɖe aboyo Yerusalem blibo la kple amegãwo katã kpakple aʋawɔlawo katã, atikpalawo katã kple nutulawo. Aboyomeawo le ame akpe ewo, amea ɖeke mekpɔtɔ o, negbe dukɔ hahoo la ƒe ame dahewo ko.

¹⁵Èkplɔ Yoyaxin yi Babel, eye wòkplɔ fia dada, fia srɔ̃wo kple eƒe aƒemenu dzikpɔlawo kpakple anyigba dzi bubumewo tso Yerusalem yi aboyo me le Babel.

¹⁶Ŋutsu aʋawɔlawo katã le ame akpe adre, eye atikpalawo kple nutulawo le ame akpe ɖeka; wo katã nye aʋawɔla veviwo, eye Babel-fia ɖe aboyo wo yi Babel.

¹⁷Eye Babel-fia tsɔ etɔɖia Matanya ɖo fia ɖe eteƒe hetrɔ ŋkɔ nɛ bena Zedekiya.

¹⁸Zedekiya xɔ ƒe blave vɔ ɖeka, esime wòzu fia, eye woɖu fia ƒe wuiɖekɛ le Yerusalem. Dadaa ŋkɔ nye Xamutal, Yeremya ƒe vinyɔnu, tso Libna.

¹⁹Eye wòwɔ nusi nye vɔ le Yehowa ŋku me, abe alesi Yoyakim wɔ pɛpɛpɛ ene.

²⁰Elabena le Yehowa ƒe dɔmedzoe la ta wòva me na Yerusalem kple Yuda alea, vaseɖe esime wòte wo da le eƒe ŋku la. Eye Zedekiya dze aglã ɖe Babel-fia ŋu.