Read ewe Fiawo II 25 Bible Online

Fiawo II 25 - ewe bible

Fiawo II 25

¹Eye wòva me le eƒe fiaɖuɖu ƒe ƒe asiekelia me, le dzinu ewolia ƒe ŋkeke ewolia dzi be, Babel-fia Nebukadnezar kple eƒe aʋakɔ blibo la ho ɖe Yerusalem ŋu, woɖe to ɖee, eye woƒu kpo ɖe eŋu godoo va kpe.

²Eye woɖe to ɖe du la vaseɖe fia Zedekiya ƒe ƒe wuiɖekɛlia me.

³Le dzinu enelia ƒe ŋkeke asiekelia dzi, esime dɔwuame nu sẽ le dua me, eye aboloa ɖeke meli na dukɔ hahoo la o la,

⁴woɖe mɔ ɖe du la ŋu, eye aʋawɔlawo katã si le zã me to fia ƒe abɔ ƒe agbo, si le gli eve dome la ƒe mɔ dzi, esime Kaldeatɔwo ƒo xlã dua, eye woto tagbamɔ.

⁵Ke Kaldeatɔwo ƒe aʋakɔ ti fia la yome va tui le Yerixo-tagba, eye eƒe aʋakɔ blibo la ka le eŋu.

⁶Eye wòlé fia la hekplɔe va Babel-fia gbɔ le Ribla, eye wodrɔ̃ ʋɔnui.

⁷Wowu Zedekiya viwo le eŋku me, eye wogbã ŋku na Zedekiya hede gãe kplɔ yi Babel.

⁸Le dzinu atɔ̃lia ƒe ŋkeke adrelia dzi, si nye fia Nebukadnezar Babel-fia ƒe ƒe wuiasiekelia me la, Nebuzaradan, fia ŋu asrafowo ƒe amegã, si nye Babel-fia ƒe dɔla la, va Yerusalem,

⁹eye wòtɔ dzo Yehowa ƒe aƒe kple fia ƒe aƒe kple Yerusalem-xɔwo katã kpakple bubumewo ƒe xɔwo katã.

¹⁰Kaldeatɔwo ƒe aʋakɔ, si le fia ŋu asrafowo ƒe amegã ŋu la, gbã Yerusalem-gliwo katã hã va kpe.

¹¹Eye Nebuzaradan, fia ŋu asrafowo ƒe amegã, ɖe aboyo dukɔ la ƒe susɔea, si kpɔtɔ ɖe dua me kple amesiwo si yi Babel-fia gbɔ kpakple ameha la ƒe susɔea.

¹²Ke fia ŋu asrafowo ƒe amegã la gblẽ anyigba dzi ame dahewo ɖi, ne woanye weingbledelawo kple agbledelawo.

¹³Eye Kaldeatɔwo gbã akɔblisɔti, siwo le Yehowa ƒe aƒe la me kple anyinɔawo kpakple akɔbligazɔ, si le Yehowa ƒe aƒe la me, eye wolɔ akɔbliawo yi Babel.

¹⁴Wotsɔ zeawo, sofiawo, hɛawo kple treawo kpakple akɔblinuawo katã, siwo ŋu dɔ wòwɔna la, hã dzoe.

¹⁵Eye fia ŋu asrafowo ƒe amegã la tsɔ sonuawo kple ʋutreawo, sikatɔwo kple klosalotɔwo siaa dzoe,

¹⁶sɔti eve kple gazɔ ɖeka kpakple anyinɔawo, siwo fia Salomo wɔ bena Yehowa ƒe aƒe la; nusiawo katã ƒe akɔbli mele dada me o.

¹⁷Sɔti ɖeka kɔ abɔklugui wuienyi, eye wotsɔ akɔbli wɔ ta do eta me; ta la ƒe kɔkɔme le abɔklugui etɔ̃, wowɔ gaɖɔ kple yevuboɖawo ɖe ta la ŋu godoo va kpe, wo katã nye akɔbli; alea wowɔe ɖe sɔti evelia ƒe ta hã ŋui.

¹⁸Eye fia ŋu asrafowo ƒe amegã lé nunɔlagã Seraya kple nunɔlagã yometɔ Zefanya kpakple kpuinudzɔla etɔ̃;

¹⁹eye le dua me la elé aƒemenu dzikpɔla ɖeka, amesi le aʋawɔlawo nu, kple ŋutsu, siwo tsia tre ɖe fia la ŋku me dome ame atɔ̃ siwo wokpɔ le dua me kple aʋafia ƒe agbalẽŋlɔla, amesi da dukɔ hahoo la dea aʋakɔ me kpakple dukɔ hahoo la dome ŋutsu, blaade, siwo wokpɔ le dua me.

²⁰Eye Nebuzaradan, fia ŋu asrafowo ƒe amegã la, le wo hekplɔ wo, ve na Babel-fia le Ribla.

²¹Eye Babel-fia wu wo le Ribla le Xamat-nyigba dzi. Ale woɖe aboyo Yuda tso eƒe anyigba dzi enye si.

²²Eye Babel-fia Nebukadnezar tso Gedalya, Safan vi Axikam ƒe vi, ɖo dukɔ, si wogblẽ de Yuda-nyigba dzi la dzikpɔlae.

²³Esi aʋakɔ la ƒe amegãwo katã kple woƒe amewo se be, Babel-fia tso Gedalya do dzikpɔlae la, wova Gedalya gbɔ le Mizpa; eye Ismael, Netanya vi, Yoxanan, Kareax vi, kple Seraya, Tanxumet vi, tso Netofat kpakple Yaazanya, Maaxati vi, kple woƒe amewo hã le eme.

²⁴Tete Gedalya ka atam na woawo kple woƒe amewo gblɔ na wo bena: Migavɔ̃ Kaldeatɔwo ƒe dɔlawo o! Mina anyigba la dzi, eye misubɔ Babel-fia, ekema anyo na mi.

²⁵Eye wòva me le dzinu adrelia me be, Ismael, Elisama vi Netanya ƒe vi, amesi tso fiaƒome la me kple ŋutsu ewo, siwo kpe de eŋu la, wova wu Gedalya kple Yudatɔ kpakple Kaldeatɔ, siwo le eŋu le Mizpa.

²⁶Eye dukɔ blibo la, ɖeviwo kple tsitsiawo siaa, kple aʋakɔ la ƒe amegãwo dzo yi Egipte, elabena wole Kaldeatɔwo vɔ̃m.

²⁷Esime wode aboyo Yuda-fia Yoyaxin ƒe blaetɔ̃ vɔ adre megbe, le dzinu wuievelia ƒe ŋkeke blave vo adrelia dzi la, Babel-fia. Ewil Merodax de Yuda-fia Yoyaxin tso gaxɔ me le ƒe, si me wòzu fia.

²⁸Eƒo nu kplii fafɛ, eye wòtsɔ eƒe zikpui ɖo fia, siwo le eŋu le Babel la ƒe zikpuiwo ŋgɔ.

²⁹Ena wodo li eƒe gaxɔ me awuwo, eye wòdu nu le egbɔ ɣesiaɣi le eƒe agbe me ŋkekewo katã me.

³⁰Eye wòxɔ eƒe gbesiagbe nuɖuɖu, si wòhiã gbesiagbe la, tso Babel-fia gbɔ le eƒe agbe me ŋkekewo katã me.