Read ewe Fiawo II 6 Bible Online

Fiawo II 6 - ewe bible

Fiawo II 6

¹Eye nyagblɔɖilawo ƒe nusrɔ̃viwo gblɔ na Elisa bena: Kpɔ ɖa, teƒe, si míele le gbɔwò la, xaxa na mí akpa.

²Na, ne miayi Yordan nu, eye mía dome amesiame natsɔ ati tso afima vɛ, ne míawɔ nɔƒe ɖe afima, afisi míanɔ. Eɖo ŋu na wo bena: Miheyi!

³Eye wo dometɔ ɖeka gblɔ bena: Ne edze ŋuwò la, ekema yi kpli mí. Eɖo ŋu bena: Mayi!

⁴Tete wòyi kpli wo, eye wova Yordan nu hede asi atilalã me.

⁵Esime wo dometɔ ɖeka le atia lãm la, fia la ge ɖe taa me. Tete wòdo ɣli gblɔ bena: Ao, nye aƒetɔ, ɖe meɣee!

⁶Eye Mawu ƒe ame la gblɔ bena: Afika woge dze? Efia teƒe lae, eye wòlã ati tsɔ ƒu gbe ɖi, tete fía la ho ɖe dzi.

⁷Eye wògblɔ be: Lée! Tete wòɖo asi ɖa lée.

⁸Eye Aram-fia ho aʋa ɖe Israel ŋu, eye wòde adaŋu kple eƒe dɔlawo gblɔ bena: Afi kple afime maƒu nye asaɖa ɖo.

⁹Ke Mawu ƒe ame la dɔ ame ɖo ɖe Israel-fia, ne woagblɔ nɛ bena: Kpɔ nyuie, ne màgato teƒe sia ŋu ayi o, elabena Aramtɔwo ƒu asaɖa anyi ɖe afima.

¹⁰Eye Israel-fia ɖɔ ame ɖe teƒe, si Mawu ƒe ame la fiae hexlɔ̃ nui le eŋu la, eye wòkpɔ eɖokui dzi nyuie le afima ŋu; menye zi ɖeka o, eye menye zi eve o.

¹¹Tete Aram-fia ƒe dzi de asi dzodzo me nyanyanya le nya sia ŋuti, eye wòyɔ eƒe dɔlawo gblɔ na wo bena: Miate ŋu agblɔe nam mia dometɔ, si le Israel-fia la dzi dem oa?

¹²Tete eƒe dɔlawo dometɔ ɖeka gblɔ bena: Kpao, nye aƒetɔ fia, ke boŋ nyagblɔɖila Elisa, si le Israel lae, nɔa wò nya, siwo nègblɔna le wò xogã me la, gblɔm na Israel-fia.

¹³Egblɔ be: Miyi ɖakpɔ afisi wòle, ne mado ame dɔ, ne woalée vɛ. Eye wova gblɔ nɛ be: Kpɔ ɖa, ele Dotan.

¹⁴Tete wòdo sɔwo kple tasiaɖamwo kple aʋakɔ gãa de ɖo ɖe afima, eye wova le zã me heɖe to ɖe dua.

¹⁵Esi Mawu ƒe ame la ƒe dɔla fɔ ŋdi kanya, eye wòdo go la, kpɔ ɖa, aʋakɔa ɖe kple sɔwo kpakple tasiaɖamwo de to de dua. Eye eƒe ɖekakpui la gblɔ bena: Oo, nye aƒetɔ, nuka wo ge míala?

¹⁶Edo ŋu bena: Megavɔ̃ o, elabena amesiwo le mía dzi la, sɔ gbɔ wu amesiwo le wo dzi.

¹⁷Eye Elisa do gbe ɖa gblɔ bena: Yehowa, ʋu eƒe ŋkuwo, ne woakpe nu! Tete Yehowa ʋu ɖekakpui la ƒe ŋkuwo, eye wòkpɔ nu, eye kpɔ ɖa dzosɔwo kple dzotasiaɖamwo le to la ŋu kpaŋkpaŋ ƒo xlã Elisa.

¹⁸Esi woɖi abu va egbɔ la, Elisa do gbe ɖa na Yehowa gblɔ bena: Na ameha sia ƒe ŋku nagbã! Eye wòna woƒe ŋkuwo gbã le Elisa ƒe nya la nu.

¹⁹Eye Elisa gblɔ na wo bena: Menye mo lae nye esia o, eye menye du lae nye esia o; mikplɔm ɖo, ne makplɔ mi yi ŋutsu, si dim miele la gbɔe. Eye wòkplɔ woyi Samaria.

²⁰Esime wova Samaria la, Elisa gblɔ be: Yehowa, ʋu amesiawo ƒe ŋkuwo, ne woakpɔ nu! Tete Yehowa ʋu woƒe ŋkuwo, eye wokpɔ be, yewole Samaria titina.

²¹Esi Israel-fia kpɔ wo la, egblɔ na Elisa bena: Fofonye, madza woa? Madza woa, fofonye?

²²Edo ŋu bena: Magadza wo o! Ɖe nèbe, yeadza amesiwo metsɔ wò yi kple wò dati de aboyoe o la? Tsɔ abolo kple tsi ɖo wo kɔ me, ne woaɖu nu ano nu, eye wòayi woƒe aƒetɔ gbɔ.

²³Tete wòwɔ amedzro gãa de na wo, woɖu nu no nu, eye wòdo mɔ wo woyi woƒe aƒetɔ gbɔ. Eye Aramtɔwo ƒe adzohawo megava Israel-nyigba dzi kpɔ o.

²⁴Esia megbe la Aram-fia Ben-Hadad ƒo eƒe aʋakɔ blibo la nu ƒu, eye woho va ɖe to ɖe Samaria.

²⁵Eye dɔ gãa ɖe to le Samaria; kpɔ da, wode to ɖee, vaseɖe esime tedzita ɖeka xɔ klosalo sekel blanyi, eye ahɔnemi kab eneliawo ɖeka xɔ klosalo sekel atɔ̃.

²⁶Esime Israel-fia le tsa ɖim le gli dzi la, nyɔnua ɖe do ɣli yɔe gblɔ bena: Nye aƒetɔ fia, xɔ nam!

²⁷Eɖo ŋu bena: Esi Yehowa mele xɔxɔm na wò o la, afika nyea mato axɔ na wò? Lugbɔƒe loo alo weinfiãƒea?

²⁸Fia la gagblɔ nɛ bena: Nya ka le asiwò? Eɖo ŋu bena: Nyɔnu sia gblɔ nam be: Tsɔ viwòŋutsu miaɖu egbea, eye miaɖu vinyeŋutsu etsɔ.

²⁹Eye míeɖa vinye heɖu. Ke esi ŋu ke, eye megblɔ ne be: tsɔ viwò míaɖu la, kpɔ ɖa, etsɔ via ɣla.

³⁰Esime fia la se nyɔnua ƒe nyawo la, edze eƒe awuwo hele tsa ɖim le glia dzi; eye dukɔ la kpɔe be, eta akpanya de eƒe awuwo te.

³¹Eye wògblɔ bena: Mawu afiam agafiam ɖe dzi, ne Elisa, Safat vi ƒe ta aganɔ eŋu fi!

³²Esi Elisa bɔbɔ nɔ eƒe me, eye ame tsitsiwo bɔbɔ nɔ egbɔ la, fia la ɖɔ ame ɖo ɖe eŋgɔ. Ke hafi ɖɔla la nava egbɔ la, egblɔ na ame tsitsiawo bena: Miele ekpɔm be, hlɔ̃mevi sia ɖɔ ɖo ɖa, be woatso ta le nunyea? Miɖo ŋku anyi, ne dɔla la va la, ekema mitutui kple ʋɔtru, eye mido nɔa! Ɖe menye eƒe aƒetɔ ƒe afɔzi le eyome gbɔna oa?

³³Ke esi wogale nu ƒom kpli wo la, kpo ɖa, fia la do ɖe egbɔ gblɔ bena: Kpɔ ɖa, dzɔgbevɔ̃e sia tso Yehowa gbɔ, nukata maganɔ mɔ kpɔm na Yehowa?