Read ewe Kronika I 15 Bible Online

Kronika I 15 - ewe bible

Kronika I 15

¹Eye wòtu xɔwo na eɖokui ɖevi Dawid ƒe du la me, eye wòwɔ nɔƒe na Mawu ƒe aɖaka la, eye wòtu agbadɔ nɛ.

²Emegbe Dawid de se be, amea ɖeke mekpɔ mɔ atsɔ Mawu ƒe aɖaka la o, negbe Lewi-viwo ko, elabena woawoe Yehowa tia, be woatsɔ Mawu ƒe aɖaka la, eye woasubɔe tegbee.

³Tete Dawid yɔ Israel blibo la va Yerusalem, ne woaɖatsɔ Yehowa ƒe aɖaka la ava nɔƒe, si wòwɔ nɛ la.

⁴Eye Dawid ƒo Aron-viwo kple Lewi-viwo nu ƒu.

⁵Amesiwo tso Kehat viwo dome, wonye amegã Uriel kple nɔviawo, wole ame alafa ɖeka blave;

⁶amesiwo tso Merari viwo dome, wonye amegã Asaya kple nɔviawo, wole ame alafa eve blave;

⁷amesiwo tso Gerson viwo dome, wonye amegã Yoel kple nɔviawo, wole ame alafa ɖeka blaetɔ̃;

⁸amesiwo tso Elizafan-viwo dome, wonye amegã Semaya kple nɔviawo, wole ame alafa eve;

⁹amesiwo tso Xebron-viwo dome, wonye amegã Eliel kple nɔviawo, wole ame blanyi;

¹⁰amesiwo tso Uziel viwo dome, wonye amegã Aminadab kple nɔviawo, wole ame alafa ɖeka kple wuieve.

¹¹Eye Dawid na woyɔ Zadok kple Abyatar, siwo nye nunɔlawo, kple Lewi-viwo Uriel, Asaya, Yoel, Semaya, Eliel kple Aminadab,

¹²eye wògblɔ na wo bena: Miawoe nye Lewi-viwo ƒe aƒekɔwo ƒe tatɔwo, miawo kple mia nɔviwò mikɔ mia ɖokui ŋu, eye miɖakɔ Yehowa, Israel ƒe Mawu ƒe aɖaka la va teƒe, si mewo nɛ.

¹³Elabena esi mieno eteƒe gbemagbe o la, eyata Yehowa, mía Mawu, ɖe ame le mía dome, elabena míebia gbee se, abe alesi dze ene o.

¹⁴Tete nunɔla kple Lewi-viwo ko wo ɖokui ŋu, ne woaɖakɔ Yehowa, Israel ƒe Mawu ƒe aɖaka la.

¹⁵Eye Lewi-viwo tsɔ kpoawo kɔ Mawu ƒe aɖaka la ɖe woƒe abɔta, abe alesi Mose de se le Yehowa ƒe nya nu ene.

¹⁶Eye Dawid gblɔ na Lewi-viwo ƒe amegãwo be, woaɖe wo nɔvi, siwo nye hadzilawo, ne woatsɔ hadzinuawo, siwo nye: saŋkuwo, kasaŋkuwo kple gakogoewo, eye woana dzidzɔha nade dzi.

¹⁷Tete Lewi-viwo ɖe Heman, Yoel vi, woɖe Asaf, Berexya vi, tso nɔviawo dome kple Etam, Kusaya vi, tso nɔvia Merari-viwo dome;

¹⁸eye wo nɔvi, siwo le ɖoɖo evelia me, kpe ɖe wo ŋu: Zaxarya, Yaaziel, Semiramot, Yexiel, Uni, Eliab, Benaya, Maaseya, Malitya, Elitelehu, Mikneya, Obed-Edom kple Yeiel, amesiawo nye agbonudzɔlawo.

¹⁹Hadzilawo Heman, Asaf kple Etan, woawoe ƒoa akɔbligakogoe la sesĩe,

²⁰eye Zaxarya, Aziel, Semiramot, Yexiel, Uni, Eliab, Maaseya kple Benaya wonye amesiwo ƒoa kasaŋku wòɖina abe ɖetugbiwo ƒe gbe ene;

²¹eye Malitya, Elifelehu, Mikneya, Obed-Edom, Yeiel kple Azaz ya wonye amesiwo tso kasaŋku ka enyitɔ doa ha ɖae.

²²Wotsɔ Kenanya, Lewi-viwo ƒe amegã, ɖo agbatsɔtsɔ nu, elabena enya mɔnu le agbatsɔtsɔ ŋu.

²³Berexya kple Elkana wonye agbonudzɔlawo le aɖaka la gbɔ.

²⁴Sebanya, Yosafat, Netaneel, Amasai, Zaxarya, Benaya kple Eliezer wonye nunɔlawo, amesiwo kua kpẽ le Mawu ƒe aɖaka la ŋgɔ, eye Obed-Edom kple Yexiya wonye agbonudzɔlawo le aɖaka la gbɔ.

²⁵Tete Dawid kple Israel-ame tsitsiwo kpakple ame akpewo ƒe tatɔwo woyi, be woaɖakɔ Yehowa ƒe nubablaɖaka la kple dzidzɔ tso Obed-Edom ƒe me.

²⁶Eye esi Mawu kpe ɖe Lewi-vi, siwo tsɔ Yehowa ƒe nubablaɖaka ŋuti la, wotsɔ nyitsu adre kple agbo adre sa vɔe.

²⁷Dawid kple Lewi-vi, siwo tsɔ aɖaka la, hadzilawo kpakple agbatsɔlawo kple hadzilawo ƒe tatɔ Kenanya wodo aklaladziwui, eye Dawid ɖo aklalakɔmewu.

²⁸Israel blibo la le aseye tsom, le kpẽ kple dze kum, le gakogoe ƒom, eye wole saŋku kple kasaŋku ƒom sesĩe hetso Yehowa ƒe nubablaɖaka la yii.

²⁹Esi Yehowa ƒe nubablaɖaka la ɖo Dawid ƒe dua me la, Mixal, Saul vinyɔnu, do ko ɖe fesre nu kpo alesi fia Dawid le kpo tim le ɣe ɖumee; tete woɖu fewu le eŋu le eƒe dzi me.