Read ewe Kronika I 17 Bible Online

Kronika I 17 - ewe bible

Kronika I 17

¹Esime Dawid le eƒe fiasã me la, Dawid gblɔ na nyagblɔɖila Natan bena: Kpɔ ɖa, nye la mele sedertixɔ me, ke Yehowa ƒe nubablaɖaka ya le kuntruwo le.

²Tete Natan gblɔ na Dawid bena: Nusianu, si le dzi me na wò la, wɔe, elabena Mawu li kpli wò.

³Ke eva me le zã me be, Mawu ƒe gbe va Natan gbɔ bena:

⁴Yi, nagblɔ na nye dɔla Dawid be: Ale Yehowa gblɔ esi: Menye wòe atu xɔ nam manɔ me o;

⁵elabena tso gbesigbe mekplɔ Israel la, nyemenɔ xɔa ɖeke me vaseɖe egbe o, ke boŋ metsa tso agbadɔ me yi agbadɔ me, eye tso nɔƒe yi nɔƒe.

⁶Afisiafi, si menɔ Israel blibo la dome to la, de megblɔ na Israel ƒe ʋɔnudrɔ̃la, siwo medo, be woanyi nye dukɔ la dometɔa ɖe kpɔ be, nukaŋuti mietu sedertixɔa ɖeke nam oa?

⁷Eyata ale nagblɔ na nye dɔla Dawid enye si: Ale Yehowa Zebaot gblɔ esi: Mekplɔ wo tso alẽwo yome le lãnyiƒe, be naɖu amegã ɖe nye dukɔ Israel dzi.

⁸Menɔ anyi kpli wò le afisiafi, si neyi, eye metsrɔ̃ wò tutɔwo katã da le ŋgɔwò; eye mede ŋkɔ ŋuwò abe amegã, siwo le anyigba dzi la ƒe ŋkɔwo ene.

⁹Mana nɔƒe nye dukɔ Israel, eye mana wòaɖo zunu anyi, be wòanɔ enɔƒe, eye magatsi dzi azɔ o, eye ame vɔ̃ɖiwo míagatsrɔ̃ wo abe tsã ene o,

¹⁰eye abe le ɣeyiɣi, si me meɖo ʋɔnudrɔ̃lawo ɖe nye dukɔ Israel dzi la ene o. Mabɔbɔ wò futɔwo katã de anyi, eye mele gbe ƒã dem na wò be, Yehowa atso aƒe na wò.

¹¹Ne wò ŋkekewo de, nèyi fofowòwo gbɔ la, ekema mado wò dzidzimevi, si tso viwòwo dome la, yowòme, eye mali ke eƒe fiaduƒe.

¹²Eya ava lu xɔ nam, eye mali ke eƒe fiazikpui tegbee.

¹³Manye fofoa, eye eya anye vinye, eye nyemana nye amenuveve nadzo le egbɔ, abe alesi mena wòdzo le ŋgɔwònɔla gbɔ ene o;

¹⁴ke boŋ matsɔe ado nye aƒe kple nye fiaɖuƒe me tegbee, eye eƒe fiazikpui ali ke tegbee.

¹⁵Eye Natan ƒo nu kple Dawid le nyã siawo katã kple ŋutega blibo la nu pɛpɛpɛ.

¹⁶Tete fia Dawid va bɔbɔ nɔ Yehowa ŋku me, eye wògblɔ bena: Yehowa Mawu, ameka menye, eye nuka nye aƒenye be, nèkplɔm vaseɖe fifi!

¹⁷Oo Mawu, esia nye nu tsɛ le ŋkuwò me, hafi nègado nusi ava gbaɖegbe la ŋugbe ɖe wò dɔla ƒe aƒe ŋu, eye nèkpɔm, abe alesi amegbetɔ kpɔa nui enea? Yehowa Mawu, wò, amesi kɔm ɖe dzi!

¹⁸Nya ka Dawid agagblɔ na wò akpe ɖe wò dɔla ƒe bubu la ŋu, elabena ènya wò dɔla.

¹⁹Yehowa, le wò dɔla kple wò tamebubu la la nèwɔ nu gã siawo katã, be naɖe wò nutsuwɔwɔwo katã afia.

²⁰Yehowa, le nusiwo katã míese kple miaƒe towo nu la, amea ɖeke mede nuwò o, eye mawua ɖeke meli kpe ɖe ŋuwò o.

²¹Dukɔ ka de wò dukɔ Israel nu, anyigba dzi dukɔ, si ɖeɖe ko mawua ɖe yi, be yeaɖee awɔ dukɔ na eɖokui, ne yeawɔ nu gã dziŋɔwo ahade ŋkɔ eɖokui ŋu, abe alesi nènyã dukɔwo le wò dukɔ, si neɖe tso Egipte la ŋgɔ ene?

²²Etsɔ wò dukɔ Israel wɔ dukɔe na ɖokuiwò tegbee, eye wò, Yehowa, nèzu woƒe Mawu!

²³Eyata Yehowa, nɔ nya, si nègblɔ ɖe wò dɔla kple eƒe aƒe ŋu la dzi tegbee, eye nawɔ, abe alesi nègblɔ ene!

²⁴Woaɖo ŋu ɖe wò ŋkɔ ŋu, eye woade du woahagblɔ be: Yehowa Zebaot, Israel ƒe Mawu la, enye Mawu na Israel, eye wò dɔla Dawid ƒe aƒe li ke le ŋkuwò me!

²⁵Elabena wò, nye Mawue, gblɔe ɖe wò dɔla ƒe to me be, yele xɔ tu ge nɛ; eyata dzi ɖo wò dɔla ƒo wòle gbe sia dom ɖa le ŋkuwò me.

²⁶Azɔ Yehowa, wòe nye Mawu, eye nègblɔ nya nyui sia na wò dɔla;

²⁷eyata lɔ̃, ne nayra wò dɔla ƒe aƒe, ne wòanɔ ŋkuwò me tegbee, elabena ne wò Yehowa nèyra la, yayra la nɔa anyi tegbee!