Read ewe Kronika I 24 Bible Online

Kronika I 24 - ewe bible

Kronika I 24

¹Aron viwo ƒe hawo nye esi: Aron viwo nye: Nadab, Abihu, Eleazar kple Itamar.

²Ke Nadab kple Abihu wotre kuku na wo fofo, eye viŋutsua ɖeke menɔ wo si o, eyata Eleazar kple Itamar wòzu nunɔlawo.

³Eye Dawid kple Zadok, amesi tso Eleazar viwo dome, kpakple Aximelex tso Itamar viwo dome mã wo ɖe woƒe dɔ me haha.

⁴Ke esi Eleazar viwo ƒe tatɔwo sɔ gbɔ wu Itamar viwo tɔ la, womã wo, ale be Eleazar viwo ƒe aƒekɔwo ƒe tatɔwo le ame wuiade, eye Itamar viwo ƒe aƒekɔwo tɔ le wo ame enyi.

⁵Edzidze nu hafi ma woa kple eve la, elabena woawoe nye kɔkɔeƒe la nu amegãwo kple Mawu ƒe amegãwo tso Eleazar viwo kple Itamar viwo dome.

⁶Eye agbalẽŋlɔla Semaya, Netaneel vi tso Lewi-viwo dome, ŋlɔ wo ɖi le fia la kple amegãwo, nunɔla Zadok kple Aximelex, Abyatar vi, kpakple nunɔlawo kple Lewi-viwo ƒe aƒekɔwo ƒe tatɔwo ŋku me; ne wodzidze nu ɖe Eleazar ƒe aƒekɔ ɖeka dzi la, ekema wodzidzea nu ɖe Itamar to ɖeka dzi.

⁷Dzidze gbãtɔ dze Yoyarib dzi, evelia dze Yedaya dzi,

⁸etɔ̃lia dze Xarim dzi, enelia dze Seorim dzi,

⁹atɔ̃lia dze Milkiya dzi, adelia dze Miyamin dzi,

¹⁰adrelia dze Hakoz dzi, enyilia dze Abiya dzi,

¹¹asiekelia dze Yesua dzi, ewolia dze Sexanya dzi,

¹²wuiɖekɛlia dze Elyasib dzi, wuievelia dze Yakim dzi,

¹³wuietɔ̃lia dze Xupa dzi, wuienelia dze Yesebab dzi,

¹⁴wuiatɔ̃lia dze Bilga dzi, wuiadelia dze Imer dzi,

¹⁵wuiadrelia dze Xezir dzi wuienyilia dze Hapizez dzi,

¹⁶wuiasiekelia dze Petaxya dzi, blavelia dze Yexezkel dzi,

¹⁷blave vɔ ɖekɛlia dze Yaxin dzi, blave vo evelia dze Gamul dzi,

¹⁸blave vɔ etɔ̃lia dze Delaya dzi, eye blave vɔ enelia dze Maazya dzi.

¹⁹Esia nye woƒe ɖoɖomewo hena woƒe dɔwɔwɔ, ne woayi Yehowa ƒe aƒe la me le ɖoɖo, si wo fofo Aron do na wo la nu, abe alesi Yehowa, Israel ƒe Mawu la, de se nɛ ene.

²⁰Lewi-vi susɔeawo nye esi: Subael tso Amram viwo dome, Yexdeya tso Subael viwo dome,

²¹Yisiya enye tatɔ le Rexabya viwo dome,

²²Selomot tso Yizhar viwo dome, Yaxat tso Selomot viwo dome.

²³Xebron viwo nye: Yeriya, amesi nye tatɔ, evelia nye Amarya, etɔ̃lia nye Yaxaziel, enelia nye Yekamam.

²⁴Uziel viwo nye: Mixa, Samir tso Mixa viwo dome.

²⁵Mixa nɔvi nye Yisiya; Zaxarya tso Yisiya viwo dome.

²⁶Merari viwo nye Maxli kple Musi kpakple via Yaazya viwo.

²⁷Merari vi, siwo via Yaazya dzi, wonye Soham, Zakur kple Ibri.

²⁸Maxli dzi Eleazar, ke eya medzi ŋutsuvia ɖeke o.

²⁹Kis towo nye esi Kis vi nye: Yeraxmeel.

³⁰Musi viwo nye: Maxli, Eder kple Yerimot. Esiawo nye Lewi-viwo ƒe viwo le woƒe aƒekɔwo nu.

³¹Eye woawo hã dzidze nu abe wo nɔvi Aron viwo ke ene, le fia Dawid, Zadok kple Aximelex kpakple nunɔlawo kple Lewi-viwo ƒe aƒekɔwo ƒe tatɔwo ŋku me; aƒekɔwo ƒe ame tsitsiwo kple woƒe tsɛwo siaa.